કેન્દ્રીય ગૃહમંત્રીના સુરક્ષા ગાર્ડની ઓળખ આપી એસડીએમને ધમકાવનારની ધરપકડ

સેનામાં સિનિયર કોન્સ્ટેબલ તરીકે તૈનાત યુવક જમીન વિવાદને લઈને ઢીમરખેડાના એસડીએમની ઓફિસમાં ગયો હતો

કટની

મધ્યપ્રદેશના કટની જિલ્લામાં જમીન વિવાદને લઈને ઢીમરખેડા એસડીએમ ઓફિસ પહોંચેલા એક વ્યક્તિએ પોતાને દેશના ગૃહમંત્રી અમિત શાહનો ખાનગી સુરક્ષા ગાર્ડ ગણાવ્યો અને એસડીએમને સમસ્યાનો ઉકેલ લાવવાનું કહીને ધમકી આપતા જોવા મળ્યો હતો. આ ઘટનાથી ગુસ્સે થઈને અધિકારીએ તરત જ સ્થાનિક પોલીસ સ્ટેશનના ઈન્ચાર્જને ફરિયાદ નોંધાવી અને આરોપી યુવકની ધરપકડ માટે સૂચનાઓ આપી હતી.

આ અંગે માહિતી આપતાં કટની પોલીસે જણાવ્યું કે સેનામાં સિનિયર કોન્સ્ટેબલ તરીકે તૈનાત યુવકની એસડીએમની ફરિયાદ પર ધરપકડ કરવામાં આવી હતી અને પોલીસ સ્ટેશન લાવવામાં આવ્યા હતા, જ્યાં આરોપી વિરુદ્ધ કેસ નોંધવામાં આવ્યો હતો. 

પોલીસે વધુમાં જણાવતા કહ્યું કે આરોપી યુવક જબલપુરના મઝગવાનો રહેવાસી છે. તેના સંબંધીની જમીનના સંબંધમાં ઢીમરખેડા એસડીએમ ઓફિસ પહોંચ્યો હતો, જ્યાં તે ગૃહમંત્રી અમિત શાહનો સુરક્ષા ગાર્ડ હોવાનો દાવો કરીને એસડીએમને તેની તરફેણમાં કાર્યવાહી કરવાની ધમકી આપી રહ્યો હતો.