કોંગ્રેસે જે રીતે આપ સાથે ઈન્ડિયા ગઠબંધનમાં રહેવાનો નિર્ણય કર્યો છે તેના કારણે તેની શક્યતાઓ નબળી પડી છે
નવી દિલ્હી
પંજાબમાં ભાજપને અત્યાર સુધી સત્તાની રેસમાંથી બહાર જ જોવામાં આવી રહી છે. લોકસભા ચૂંટણીમાં પણ તે ક્યારેય ચોંકાવનારી સફળતા પ્રાપ્ત નથી કરી શકી. તો પછી છેલ્લા બે દિવસોમાં જ્યારે કોંગ્રેસ સાંસદ રવનીત સિંહ બિટ્ટૂથી લઈને આપના સુશીલ કુમાર રિંકૂ પણ ભાજપમાં સામેલ થઈ ગયા તો એ સવાલ ઉઠવો સ્વાભાવિક છે કે, આવું કેમ થઈ રહ્યું છે? એક તરફ ભાજપને પંજાબમાં નબળી પાર્ટી તરીકે જોવામાં આવી રહી છે તો બીજી તરફ અન્ય પાર્ટીના નેતા તેમાં કેમ આવી રહ્યા છે. એ પણ ત્યારે જ્યારે ભાજપે પંજાબમાં છેલ્લા 28 વર્ષોમાં પહેલી વખત એકલા જ ચૂંટણી લડવાનો નિર્ણય લીધો છે.
આની પાછળનું કારણ એ માનવામાં આવી રહ્યું છે કે, ભાજપ શહેરી વિસ્તારોમાં મજબૂત છે. આ ઉપરાંત કોંગ્રેસે જે રીતે આમ આદમી પાર્ટી સાથે ઈન્ડિયા ગઠબંધનમાં રહેવાનો નિર્ણય કર્યો છે તેના કારણે તેની શક્યતાઓ નબળી પડી છે. અકાલી દળ એકલુ છે અને તે પહેલાની સરખામણીમાં મજબૂત નથી. આવી સ્થિતિમાં કોંગ્રેસ અને આમ આદમી પાર્ટીના કેટલાક નેતાઓને લાગે છે કે, તેઓ ભાજપમાં જઈને જીત મેળવી શકે છે. રવનીત સિંહ બિટ્ટૂ, સુશીલ કુમાર રિંકૂ અને પરણીત કૌર જેવા નેતાઓને ભાજપ ટિકીટ પણ આપી શકે છે. રવનીત સિંહ બિટ્ટૂનું પંજાબના રાજકારણમાં મોટું કદ છે અને તેમના દાદા બેઅંત સિંહ રાજ્યના સીએમ રહી ચૂક્યા છે.
બીજી તરફ પરણીત કૌર પણ જાટ શીખ છે જે પૂર્વ સીએમ કેપ્ટન અમરિંદર સિંહના પત્ની છે. ભાજપે રાજદ્વારી તરણજીત સિંહ સંધુને પણ પાર્ટીમાં સામેલ કર્યા છે તેઓ પણ જાટ શીખ છે. પંજાબમાં ભાજપને એવા નેતાઓની તલાશ રહી છે જેઓ જાટ શીખ હોય. શીખ પરંપરા સાથે જોડાયેલા નેતાઓના માધ્યમથી ભાજપ ત્યાંના ધાર્મિક લોકોના મત મેળવવા માગે છે જેના પર અકાલી દળ અત્યાર સુધી દાવો કરતું આવ્યું છે. માત્ર હિંદુ મતોના ભરોસે ભાજપને ત્યાં સફળતા મળવી મુશ્કેલ લાગી રહી છે. આવી સ્થિતિમાં આ નેતાઓની એન્ટ્રી તેમના માટે મહત્વની છે. મનપ્રીત બાદલ પહેલાથી જ ભાજપમાં સામેલ છે.
