ઈલેક્ટ્રિક વાહનોના બ્રેક્સ અને ટાયર 1,850 ગણું વધુ પ્રદૂષણ ફેલાવે છે, વોલ સ્ટ્રીટ જર્નલ ઓપ-એડમાં પ્રકાશિત અભ્યાસમાં દાવો
નવી દિલ્હી
ઉત્સર્જન ડેટાનું વિશ્લેષણ કરતી કંપની એમિશન એનાલિટિક્સ દ્વારા તાજેતરના એક અભ્યાસમાં દાવો કરવામાં આવ્યો હતો કે ઇલેક્ટ્રિક વાહનો પેટ્રોલ અને ડીઝલ કાર કરતાં વધુ કણોનું પ્રદૂષણ ફેલાવે છે. અભ્યાસમાં જાણવા મળ્યું કે ઈલેક્ટ્રિક વાહનો (ઈવી) ના બ્રેક્સ અને ટાયર 1,850 ગણું વધુ પ્રદૂષણ ફેલાવે છે.
જેમ જેમ લોકોની ક્લાઈમેટ ચેન્જને લઇને ચિંતા વધી રહી છે તેમ તેમ પર્યાવરણને અનુકૂળ પરિવહનના વિકલ્પોમાં પણ લોકોનો રસ વધી રહ્યો છે. ઘણા લોકો એવું માને છે કે પરંપરાગત પેટ્રોલ અને ડીઝલ કાર કરતાં ઇલેક્ટ્રિક વાહનો (ઈવીએસ) પર્યાવરણ માટે વધુ સારા હોય છે, કારણ કે તે ઓછા ગ્રીનહાઉસ ગેસનું ઉત્સર્જન કરે છે. જો કે, ઉત્સર્જન ડેટાનું વિશ્લેષણ કરતી કંપની એમિશન એનાલિટિક્સનો તાજેતરનો અભ્યાસ આ ધારણાને ખોટી સાબિત કરે છે. વોલ સ્ટ્રીટ જર્નલ ઓપ-એડમાં પ્રકાશિત અભ્યાસ ઈલેક્ટ્રિક અને ગેસોલિનથી ચાલતી બંને કારમાં બ્રેક અને ટાયરને કારણે થતા કણોના પ્રદૂષણની સમસ્યા તરફ ધ્યાન દોરે છે.
અભ્યાસના મુખ્ય તારણ એ છે કે ઈવીએસ તેના ભારે વજનને કારણે, કાર્યક્ષમ એક્ઝોસ્ટ ફિલ્ટરવાળા આધુનિક ગેસ સંચાલિત વાહનોની તુલનાએ બ્રેક અને ટાયરમાંથી વધારે માત્રામાં હાનિકારક કેમિકલ છોડે છે. અભ્યાસમાં દાવો કરાયો છે કે આ હાનિકારક કેમિકલ પેટ્રોલ કે ડીઝલથી ચાલતા વાહનોની તુલનાએ ઈવીમાં 1850 ગણું વધારે મુક્ત થાય છે. ટાયરનો ઘસારો પણ ચિંતા વધારે છે. એમિશન એનાલિટિક્સના અહેવાલ અનુસાર ઈવીએસનું ભારે વજન ટાયરને નુકસાન પહોંચાડે છે જેના લીધે હાનિકારક રાસાયણિક કણો હવામાં ફેલાય છે. એવું એટલા માટે કેમ કે મોટાભાગના ટાયર ક્રૂડ ઓઈલમાંથીમ ળી આવતા સિંથેટિક રબરમાંથી બને છે.
અભ્યાસ બેટરીના વજન ઉપર પણ ધ્યાન આપવામાં આવ્યું છે. ઈલેક્ટ્રિક વાહનોમાં સામાન્ય રીતે પરંપરાગત ગેસોલિન એન્જિન કરતાં વજનમાં ભારે બેટરી હોય છે. આ વધારાનું વજન બ્રેક્સ અને ટાયર પર ભારણ વધારે છે, જેનાથી નુકસાન વધી જાય છે. રિપોર્ટમાં ટેસ્લા મોડલ વાય અને ફોર્ડ એફ-150 લાઈટનિંગના ઉદાહરણો અપાયા હતા. બંનેની બેટરીનું વજન આશરે 1,800 પાઉન્ડ છે. અભ્યાસમાં દાવો કરવામાં આવ્યો છે કે અડધા ટન જેટલું વજન ધરાવતી બેટરીવાળા ઈલેક્ટ્રિક વાહનોના ઘસારાથી ઉત્સર્જન આધુનિક ગેસોલીન કારથી નીકળતા ઉત્સર્જનથી 400 ગણું વધારે હોઈ શકે છે.
