અમેરિકી રક્ષા મંત્રાલય પેન્ટાગોને ખુલાસો કર્યો, પેન્ટાગોને સ્પષ્ટપણે જણાવ્યું નથી કે આ ચાઈનીઝ બલૂન જાસૂસી માટે હતું કે નહીં
વોશિંગ્ટન
આ વર્ષે ફેબ્રુઆરીમાં અમેરિકા અને ચીન વચ્ચે જાસૂસી બલૂનને લઈને તણાવ સર્જાયો હતો. અમેરિકાના મોન્ટાના રાજ્યના આકાશમાં ચીનનો બલૂન જોવા મળ્યો હતો. ચીને તેને અંત સુધી હવામાનની માહિતી એકત્ર કરતું બલૂન ગણાવ્યું હતું. જો કે યુએસ એરફોર્સે તેને તોડી પાડ્યું હતું. હવે અમેરિકી રક્ષા મંત્રાલય પેન્ટાગોને ખુલાસો કર્યો છે કે જે ચીની જાસૂસી બલૂનને તોડી પાડવામાં આવ્યું હતું તેણે કોઈ ગુપ્ત માહિતી એકત્ર કરી ન હતી.
પેન્ટાગોને સ્પષ્ટપણે જણાવ્યું નથી કે આ ચાઈનીઝ બલૂન જાસૂસી માટે હતું કે નહીં. જો કે સંરક્ષણ મંત્રાલયના પ્રવક્તા બ્રિગેડિયર જનરલ પેટ રાઈડરે કહ્યું કે આ બલૂને ન તો કોઈ સંવેદનશીલ ડેટા એકત્રિત કર્યો છે અને ન તો તેને ચીનને મોકલ્યો છે. અમે જાણીએ છીએ કે આ બલૂન ગુપ્ત માહિતી એકત્ર કરવાની ક્ષમતા ધરાવતું હતું પરંતુ તે અમારું વિશ્લેષણ છે કે આ બલૂન યુએસ આકાશમાંથી પસાર થતી વખતે કોઈ સંવેદનશીલ માહિતી એકત્રિત કરી શક્યું નથી. રાઈડરે વધુમાં કહ્યું કે પેન્ટાગોને પહેલાથી જ ફુગ્ગાઓ પર ક્રેક ડાઉન કરીને આવા પ્રયાસને અટકાવ્યો છે.
અમેરિકાના આરોપો પર ચીને કહ્યું હતું કે તે એક નાગરિક વિમાન હતું જેનો ઉપયોગ હવામાનની તપાસ માટે કરવામાં આવે છે. ચીનના બલૂનના કારણે અમેરિકાના વિદેશ મંત્રી એન્ટની બ્લિંકને પણ તેમની ચીનની મુલાકાત સ્થગિત કરી દીધી હતી. બ્લિંકને થોડા દિવસો પહેલા જ ચીનની મુલાકાત લીધી હતી.
