ઈંગ્લેન્ડ સામે શ્રેણી જીતનારી ટીમઈન્ડિયાના ખેલાડીઓને બોનસ મળી શકે છે

બીસીસીઆઈ ટેસ્ટ મેચ રમી રહેલા ખેલાડીઓના પગારમાં વધારો પણ કરી શકે છે

નવી દિલ્હી

ભારતીય ક્રિકેટ ટીમના ખેલાડીઓ પર ઘણી વખત એવો આરોપ લગાવવામાં આવ્યો છે કે તેઓ ટેસ્ટ અને ડોમેસ્ટિક ક્રિકેટને બદલે આઈપીએલ પર વધુ ધ્યાન આપે છે. હવે ભારતીય ક્રિકેટ કંટ્રોલ બોર્ડ ટેસ્ટ ફોર્મેટને પ્રોત્સાહન આપવા માટે મોટું પગલું ભરી શકે છે. મળેલા અહેવાલો મુજબ બીસીસીઆઈ ટેસ્ટ મેચ રમી રહેલા ખેલાડીઓના પગારમાં વધારો કરી શકે છે. આ સાથે તમામ સીરિઝમાં રમનારા ખેલાડીઓને બોનસ પણ મળી શકે છે.

મળેલા અહેવાલો મુજબ આઈપીએલ 2024 પછી બીસીસીઆઈ ટેસ્ટ ખેલાડીઓના પગારમાં વધારો કરી શકે છે. બીસીસીઆઈ દરેક ટેસ્ટ સીરિઝમાં રમનારા ખેલાડીઓને બોનસ પણ આપી શકે છે. બોર્ડ મહત્વના કારણસર આ ફેરફાર કરવા માંગે છે. આઈપીએલમાં ફિટ રહેવા માટે ઘણા ખેલાડીઓ રણજી ટ્રોફી અને ડોમેસ્ટિક મેચો છોડી રહ્યા છે. હાલમાં જ ઈશાન કિશન આને લઈને ચર્ચામાં હતો. અહેવાલો અનુસાર બીસીસીઆઈની વિનંતી છતાં ઈશાન ઝારખંડ માટે મેચ રમ્યો ન હતો. શ્રેયસ અય્યર પણ રણજી ટ્રોફીની ક્વાર્ટર ફાઈનલ મેચ છોડી ગયો હતો.

બીસીસીઆઈ હાલમાં એક ટેસ્ટ મેચ માટે ખેલાડીઓને 15 લાખ રૂપિયા આપે છે. વર્ષ 2016માં તેમનો પગાર બમણો કરવામાં આવ્યો હતો. જ્યારે ખેલાડીઓને એક વન-ડે મેચ માટે 6 લાખ રૂપિયા મળે છે. ટી20 મેચ માટે ખેલાડીઓને 3 લાખ રૂપિયા પગાર મળે છે. ભારતીય ટીમના ખેલાડીઓને તેમના ગ્રેડ પ્રમાણે વાર્ષિક પગાર પણ આપવામાં આવે છે.

જણાવી દઈએ કે આઈપીએલ 2024 પછી ખેલાડીઓનો પગાર વધી શકે છે. ભારતીય ટીમ હાલ ઈંગ્લેન્ડ સામે 5 મેચની ટેસ્ટ સીરિઝ રમી રહી છે. ભારતે આ સીરિઝમાં 3-1ની અજેય લીડ મેળવી લીધી છે. ઈંગ્લેન્ડે સીરિઝની પ્રથમ મેચ 28 રને જીતી હતી. આ પછી ભારતે સતત ત્રણ મેચ જીતી હતી.