વિપક્ષ ગઠબંધન ઈન્ડિયા ભાજપ સામે મોરચો બનાવવામાં નિષ્ફળ રહ્યો હોવાનો જમ્મુ-કાશ્મીરના પૂર્વ મુખ્યમંત્રીનો અભિપ્રાય
જમ્મુ
વડાપ્રધાન નરેન્દ્ર મોદીના 400 સીટો પાર કરવાના દાવાને હવે વિપક્ષી ગઠબંધન ઈન્ડિયાના નેતાઓ પણ માનવા લાગ્યા હોય તેમ જમ્મુ-કાશ્મીરના પૂર્વ મુખ્યમંત્રી ઓમર અબ્દુલ્લાનું કહેવું છે કે એનડીએ (એનડીએ) એટલે કે નેશનલ ડેમોક્રેટિક એલાયન્સ માટે 400થી વધુ સીટો જીતવી શક્ય છે. એપ્રિલ-મેમાં લોકસભાની ચૂંટણી યોજાઈ શકે છે.
ઓમર અબ્દુલ્લાએ કહ્યું કે હવે એનડીએ દ્વારા 400નો આંકડો વટાવી જવાનો કરાતો દાવો શક્ય લાગે છે. જ્યારે તેમને પૂછવામાં આવ્યું કે શું આ લક્ષ્ય હાંસલ કરી શકાય છે, તો તેમણે જવાબ આપ્યો, ‘હા ખરેખર’. પીએમ મોદી દ્વારા નિર્ધારિત 400થી વધુ બેઠકો જીતવાનું લક્ષ્ય શક્ય લાગે છે કારણ કે વિપક્ષ ખૂબ જ નબળો છે.
તેમણે કહ્યું કે વિપક્ષ ગઠબંધન ઈન્ડિયા ભાજપ સામે મોરચો બનાવવામાં નિષ્ફળ રહ્યો છે. બે મહિના પહેલા એવું લાગતું ન હતું કે આ લક્ષ્ય હાંસલ કરી શકાશે, પરંતુ હવે તે સાચું જણાય છે. નેશનલ કોન્ફરન્સના નેતાએ કહ્યું કે તેનું કારણ એ છે કે વિપક્ષ બહુ મજબૂત નથી. હવે જ્યારે લોકસભા ચૂંટણીમાં થોડો વધુ સમય બચ્યો છે, મને આશા છે કે વિપક્ષના સાથીઓ તેમના મતભેદોને દૂર કરશે અને એનડીએને સતત ત્રીજી વખત સત્તામાં આવતા અટકાવશે.
ઓમર અબ્દુલ્લા કહે છે કે અત્યારે ગઠબંધન ખૂબ જ નબળું છે અને આ બધા માટે કોંગ્રેસને જવાબદાર ઠેરવી શકાય નહીં. બિહારના મુખ્યમંત્રી નીતીશ કુમારના પક્ષ બદલવા અંગે તેમણે કહ્યું કે તેઓ પોતે ગઠબંધન છોડી ચૂક્યા છે અને અન્યોએ પણ તેમને અલવિદા કહી દીધું છે.
