બુમરાહની વાપસી માટે આકાશ દીપ અથવા મોહમ્મદ સિરાજમાંથી કોઈ એકને પડતા મૂકવા પડશે
નવી દિલ્હી
પાંચ મેચની શ્રેણીમાં 3-1ની અજેય સરસાઈ મેળવનારી ભારતીય ટીમ શ્રેણીની છેલ્લી મેચમાં ઈંગ્લેન્ડ સામે ટકરાશે. બંને ટીમો વચ્ચેની આ મેચ ધર્મશાલાના હિમાચલ પ્રદેશ ક્રિકેટ એસોસિએશન સ્ટેડિયમમાં રમાશે. જસપ્રીત બુમરાહ ચોથી ટેસ્ટમાં આરામ કર્યા બાદ પ્લેઈંગ ઈલેવનમાં પરત ફરશે. બુમરાહ માટે આકાશ દીપ અથવા મોહમ્મદ સિરાજને સ્થાન બનાવવું પડશે.
જસપ્રીત બુમરાહને ચોથી ટેસ્ટ મેચમાં વર્કલોડના કારણે આરામ આપવામાં આવ્યો હતો. હવે બુમરાહ પાંચમી ટેસ્ટમાં વાપસી કરવા માટે તૈયાર છે. આ શ્રેણીમાં બુમરાહનું અત્યાર સુધીનું પ્રદર્શન શાનદાર રહ્યું છે. ભારતીય ફાસ્ટ બોલરે ત્રણ મેચમાં 17 વિકેટ પોતાના નામે કરી છે. બુમરાહની વાપસી સાથે ટીમ ઈન્ડિયાનું પેસ એટેક વધુ મજબૂત બનશે. બુમરાહની વાપસી માટે આકાશ દીપ અથવા મોહમ્મદ સિરાજમાંથી કોઈ એકને પડતા મૂકવા પડશે.
જો કે, ધર્મશાલામાં ફાસ્ટ બોલરોને પિચમાંથી વધુ મદદ મળે છે, આવી સ્થિતિમાં કેપ્ટન રોહિત પણ ત્રણ ફાસ્ટ બોલરો સાથે જવાનો નિર્ણય લઈ શકે છે. જો રોહિત ત્રણ ઝડપી બોલરો સાથે જાય તો કુલદીપ યાદવને બહાર બેસવું પડી શકે છે.
સતત બે ટેસ્ટ મેચમાં બેટથી ખરાબ રીતે ફ્લોપ થયેલા રજત પાટીદારને પ્લેઈંગ 11માંથી બહાર બેસવું પડી શકે છે. રાંચી ટેસ્ટના પ્રથમ દાવમાં રજત માત્ર 17 રન બનાવીને આઉટ થયો હતો જ્યારે બીજી ઈનિંગમાં રજત ખાતું ખોલાવ્યા વિના જ પેવેલિયન પરત ફર્યો હતો. રજતની જગ્યાએ દેવદત્ત પડિકલને પ્લેઈંગ ઈલેવનમાં તક મળી શકે છે. પડિક્કલને સ્થાનિક ક્રિકેટમાં તેના જોરદાર પ્રદર્શનના આધારે ભારતીય ટીમમાં સામેલ કરવામાં આવ્યો છે.
ઈંગ્લેન્ડ સામે ભારતની સંભવિત પ્લેઈંગ ઈલેવન
ટીમ ઈન્ડિયા સંભવિત પ્લેઈંગ 11: યશસ્વી જયસ્વાલ, રોહિત શર્મા, શુભમન ગિલ, રજત પાટીદાર/દેવદત્ત પડિકલ, રવિન્દ્ર જાડેજા, સરફરાઝ ખાન, ધ્રુવ જુરેલ, આર અશ્વિન, જસપ્રિત બુમરાહ, મોહમ્મદ સિરાજ, આકાશ દીપ/કુલદીપ યાદવ.
