દિલ્હી 2018થી સતત ચાર વખત વિશ્વની સૌથી પ્રદૂષિત રાજધાની રહી છે, હવામાનની ખરાબ ગુણવત્તામાં ભારત બાંગ્લાદેશ અને પાકિસ્તાન બાદ ત્રીજા ક્રમે
નવી દિલ્હી
સ્વિસ જૂથ આઈક્યુ એરે વિશ્વના સૌથી પ્રદૂષિત શહેરો અને દેશની રાજધાનીઓની યાદી બહાર પાડી છે, જેમાં ભારતની રાજધાની દિલ્હી ફરી એકવાર વિશ્વની સૌથી પ્રદૂષિત રાજધાની બની ગઈ છે. પીઈટીએઆઈ દ્વારા બહાર પાડવામાં આવેલી માહિતી અનુસાર, બિહારનું બેગુસરાય વિશ્વના સૌથી પ્રદૂષિત શહેરોની યાદીમાં છે.
સ્વિસ જૂથ આઈક્યુ એર અનુસાર, ભારત 2023માં 54.4 માઇક્રોગ્રામ પ્રતિ ઘન મીટરની સરેરાશ વાર્ષિક પીએમ 2.5 સાથે 134 દેશોમાં બાંગ્લાદેશ અને પાકિસ્તાન પછી ત્રીજા ક્રમે સૌથી ખરાબ હવાની ગુણવત્તા ધરાવતું હતું. સ્વિસ સંસ્થા આઈક્યુ એર દ્વારા 2023નો અહેવાલ જણાવે છે કે બાંગ્લાદેશમાં 79.9 માઇક્રોગ્રામ પ્રતિ ઘન મીટર અને પાકિસ્તાનમાં 73.7 માઇક્રોગ્રામ પ્રતિ ઘન મીટરની નબળી હવાની ગુણવત્તા હતી. ભારત વર્ષ 2022માં 53.3 માઇક્રોગ્રામ પ્રતિ ઘન મીટરની સરેરાશ પીએમ 2.5 સાથે આઠમા સૌથી પ્રદૂષિત દેશ તરીકે સ્થાન પામ્યું હતું. 2022ના રેન્કિંગમાં શહેરનું નામ આવ્યું ન હતું. દિલ્હી 2018થી સતત ચાર વખત વિશ્વની સૌથી પ્રદૂષિત રાજધાની રહી છે.
રિપોર્ટમાં કહેવામાં આવ્યું છે કે ભારતમાં 1.36 અબજ લોકો પીએમ 2.5ના સંપર્કમાં રહ્યા હતા. 2022ના વર્લ્ડ એર ક્વોલિટી રિપોર્ટમાં 131 દેશો અને પ્રદેશોના 7,323 સ્થળોનો ડેટા સામેલ છે. 2023માં, આ સંખ્યા વધીને 134 દેશો અને પ્રદેશોમાં 7,812 સ્થાનોના ડેટા સામેલ કરાયા છે. નોંધનીય છે કે વિશ્વમાં દર નવમાંથી એક મૃત્યુ પ્રદૂષણને કારણે થાય છે. જે માનવ સ્વાસ્થ્ય માટે સૌથી મોટો ખતરો બની રહ્યો છે. ડબલ્યુએચઓના અહેવાલો અનુસાર, વાયુ પ્રદૂષણ વિશ્વભરમાં દર વર્ષે અંદાજિત 70 લાખ અકાળ મૃત્યુ માટે જવાબદાર છે.
