કોટક મ્યુચ્યુઅલ ફંડે 2025 માટેનું માર્કેટ આઉટલૂક રજૂ કર્યું

મુંબઈ

 કોટક મહિન્દ્રા એસેટ મેનેજમેન્ટ કંપની લિમિટેડે (“KMAMC” / “Kotak Mutual Fund”) આજે 2025 માટેનો તેનો માર્કેટ આઉટલૂક રિપોર્ટ રજૂ કર્યો હતો. કોટક મ્યુચ્યુઅલ ફંડે લોન્ચ કરેલો આ રિપોર્ટ આગામી વર્ષ માટે રોકાણકારો જે મુદ્દા ધ્યાનમાં રાખી શકે છે તે અંગે વિવિધ રોકાણ થીમ પર પ્રકાશ પાડે છે અને ભારતીય અર્થતંત્ર તથા મૂડી બજારો માટેની દિશા અંગે મેક્રો-ઇકોનોમિક પરિપ્રેક્ષ્ય રજૂ કરે છે.

આ રિપોર્ટ 2025માં બજારોને મદદ કરી શકે તેવી પાંચ મુખ્ય થીમ પર પ્રકાશ પાડે છેઃ

1. કેપિટલ સાયકલ રિવાઇવલ

ભારત પહેલેથી જ મહત્વની એવી મલ્ટી-યર કેપિટલ એક્સપેન્ડિચર (કેપેક્સ) સાયકલમાં જે મહત્વપૂર્ણ આર્થિક વિકાસને આગળ વધારે તેવી સંભાવના છે. કેન્દ્ર સરકાર અને લિસ્ટેડ કોર્પોરેટ કંપનીઓ દ્વારા ખર્ચમાં વધારો થવાની શક્યતા છે જ્યારે રાજ્ય સરકારોના ખર્ચ ઘટે તેમ જણાય છે. વિવિધ સેક્ટર્સમાં કોર્પોરેટ ઓર્ડર બુકમાં વિસ્તરણ આ સાયકલની બહોળી પ્રકૃતિ પર પ્રકાશ પાડે છે. પ્રોજેક્ટ્સની સંખ્યા છેલ્લે 2017માં જોવાઇ હતી તે સ્તરે પહોંચી ચૂકી છે. ખાનગી ક્ષેત્રની અંદાજિત કોસ્ટ રૂ. 55,122 અબજની એક દાયકાની ઊંચી સપાટીએ છે.

2. નાણાંકીય સેવાઓનો પ્રસાર

ફાઇનાન્શિયલ સર્વિસીઝ એ વૈવિધ્યપૂર્ણ ક્ષેત્ર છે જેમાં વિવિધ સબકેટેગરીઝમાં વિવિધ પ્રકારનું પર્ફોર્મન્સ જોવા મળે છે. બેંક ક્રેડિટ વૃદ્ધિ અને ડિપોઝીટમાં વૃદ્ધિ વચ્ચેનું અંતર ઘટી રહ્યું છે જે માર્જિન પર દબાણ હળવું કરી શકે છે. બેંકિંગ સેક્ટરને તંદુરસ્ત વળતર રેશિયો અને સુધરેલા કેપિટલ એડેક્વસી લેવલ જોવા મળ્યા છે જેના લીધે નવી મૂડીની જરૂરિયાત ઘટી છે. બેંકિંગ સેક્ટરને વેલ્યુએશન વ્યાપક બજારની સરખામણીમાં વ્યાજબી છે અને ખાનગી તથા જાહેર ક્ષેત્રની બેંકો બંને માટે લાંબા ગાળાની એવરેજની નજીક છે.

3. ટેક્નોલોજી – નવા યુગની સર્વિસ ઓફરિંગ

ક્લાઉડ સર્વિસીઝમાં વધુ ખર્ચના પગલે આઈટી સર્વિસીઝનો ખર્ચ વધે તેવી સંભાવના છે. ભારત એઆઈ, બ્લોકચેઇન અને સાયબર સિક્યોરિટી જેવી નવા જમાનાની સર્વિસીઝમાં તેની ઓફરિંગ્સ વિસ્તારી રહ્યું છે જે ગ્લોબલ ટેક ક્ષેત્રે તેને એક મહત્વના દેશ તરીકે સ્થાપિત કરે છે. આ સેક્ટર માટેના મુખ્ય ચાલકબળો પૈકીનું એક છે જનરેટિવ એઆઈનો ઉદ્ભવ. 2022થી 2027(અંદાજિત) દરમિયાન એઆઈની માંગ 15 ગણી વધવાની સંભાવના છે.

4. વપરાશ અને ગ્રામીણ સ્તરે પુનરુત્થાન

ભારતના વપરાશ ક્ષેત્રમાં કોવિડ રોગચાળા પછી મિશ્ર રિકવરી જોવા મળી છે જેમાં પ્રીમિયમ પ્રોડક્ટ્સ સારો દેખાવ કરી રહી છે જ્યારે સામૂહિક વપરાશ ઓછો છે. શહેરી વિસ્તારોએ ગ્રામીણ વપરાશને પાછળ પાડી દીધો છે. જોકે ગ્રામીણ સ્તરે ખર્ચ ધીરેધીરે રિકવરી બતાવી રહ્યો છે. વિભક્ત પરિવારોનું પ્રમાણ 2008માં 34 ટકા હતું જે 2022માં 50 ટકાએ પહોંચ્યું છે જે માળખાકીય રીતે વપરાશની માંગને આગળ વધારશે. અસંગઠિત રિટેલથી સંગઠિત રિટેલ તરફનું પ્રયાણ આ ક્ષેત્રને આગળ ધપાવતું વધુ એક પરિબળ છે.

5. હેલ્થકેર

માથાદીઠ જીડીપીમાં વધારા સાથે હેલ્થકેર પાછળનો ખર્ચ વધે તેવી સંભાવના છે. વસ્તીની ઉંમર વધે તેમ તબીબ ખર્ચ વધે તેવો ગ્લોબલ ટ્રેન્ડ રહ્યો છે. ફાર્માસ્યુટિકલ્સ અને વેક્સિનનો અગ્રણી ઉત્પાદક હોવાના લીધે ભારત આ વધતી માંગને પહોંચી વળવા માટે સારી સ્થિતિમાં છે. ભારત વૈકલ્પિક આઉટસોર્સિંગ ડેસ્ટિનેશન તરીકે ઊભરી રહ્યો છે કારણ કે કંપનીઓ ચીનથી અને કોન્ટ્રાક્ટ ડેવલપમેન્ટ એન્ડ મેન્યુફેક્ચરિંગ ઓર્ગેનાઇઝેશન્સ (સીડીએમઓ)ના ક્ષેત્રોમાં સપ્લાય ચેઇનને જોખમથી મુક્ત કરવા માંગે છે. સ્મોલ મોલેક્યુલ ડિસ્કવરીનું બજાર પણ ઘણું મોટું છે અને વિકસી રહ્યું છે જેમાં આરએન્ડડી ખર્ચમાં નોંધપાત્ર વધારો થઈ રહ્યો છે.

હાલની બજારની સ્થિતિ જોતાં ફિક્સ્ડ ઇન્કમ ઇન્વેસ્ટમેન્ટ્સ ઝડપથી આકર્ષક બની રહ્યા છે. પોર્ટફોલિયોનો કેટલોક ભાગ ફિક્સ્ડ ઇન્કમમાં ફાળવવાથી જોખમ ઘટાડી શકાય છે અને પોર્ટફોલિયોમાં સ્થિરતા પૂરી પાડવામાં મદદ મળી શકે છે. વ્યાજ દરો માળખાકીય ઘટાડા પરંતુ અપેક્ષિત અસ્થિરતા પર છે ત્યારે 12થી 18 મહિનાના ગાળા જેવા લાંબા ગાળાના સાધનો પર ધ્યાન આપવાથી રોકાણકારોને ભવિષ્યના સંભવિત રેટ કટનો લાભ મળી શકે છે. રિપોર્ટ મુજબ આરબીઆઈ અત્યારથી માંડીને ડિસેમ્બર 2025 સુધીમાં વ્યાજ દરોમાં 50-75 બેસિસ પોઇન્ટ્સનો કાપ મૂકી શકે છે. નાણાંકીય વર્ષ 2026 માટે કેન્દ્ર અને રાજ્યની સંયુક્ત ખાધ 7 ટકાની નજીક હોઈ શકે છે જેનાથી નાણાંકીય વર્ષ 2026માં ભારતનું રેટિંગ અપગ્રેડ થઈ શકે છે. સાનૂકૂળ મેક્રોઇકોનોમિક સ્થિતિઓ, સંભવિત રેટિંગ અપગ્રેડ, સંતુલિત માંગ-પુરવઠાની સ્થિતિ તથા વ્યાજ દરોમાં કાપ 10 વર્ષની સરકારી જામીનગીરીઓની ઉપજને નીચી રાખી શકે છે જે 6.25 ટકાથી 6.50 ટકાની રેન્જમાં ટ્રેડ થઈ શકે છે. આના પગલે હાલની બજાર સ્થિતિમાં ટકાઉ વળતર ઇચ્છતા લોકો માટે ફિક્સ્ડ ઇન્કમ ઇન્વેસ્ટમેન્ટ એક આકર્ષક તક બની શકે છે.

કોટક મહિન્દ્રા એએમસીના મેનેજિંગ ડિરેક્ટર નિલેશ શાહે જણાવ્યું હતું કે “બજારના કરેક્શન વાજબી મૂલ્યાંકન પર ફંડામેન્ટલી મજબૂત કંપનીઓમાં રોકાણ કરવાની તકો આપે છે. આવકમાં વૃદ્ધિ બજારને આગળ વધારશે અને પી/ઈ વિસ્તરણ માટે મર્યાદિત અવકાશ છે ત્યારે વળતરની અપેક્ષાઓ હળવી કરવી અને ટકાઉ, લાંબા ગાળાની વૃદ્ધિ પર ધ્યાન કેન્દ્રિત કરવું જરૂરી છે. ફિક્સ્ડ ઇન્કમ ઇન્વેસ્ટમેન્ટ હવે ઓછા જોખમે, ખાસ કરીને લાંબા ગાળા માટે વધુ સ્પર્ધાત્મક વળતર આપે છે. સરકારના વધતા ખર્ચ તથા મજબૂત વપરાશના વલણો આશાવાદને વેગ આપે છે ત્યારે ખાનગી બેંકો, ઓટો, ટેલિકોમ, ફાર્મા અને આઈટી જેવા સેક્ટર્સમાં વેલ્યુ ઓપોર્ચ્યુનિટીઝ રહેલી છે. આગામી લગ્નગાળો વપરાશ અને આર્થિક વૃદ્ધિને વેગ આપશે જે પસંદગીના અને શિસ્તબદ્ધ રોકાણ માટે યોગ્ય સમય બનાવે છે.”