સાધનોની મર્યાદા વચ્ચે ગુજરાતની કલ્પનાબેન ચૌર્યાની આંતરરાષ્ટ્રીય ક્રિકેટમાં એન્ટ્રી, ભારતની બ્લાઇન્ડ મહિલા ટીમમાં સ્થાન

દૃષ્ટિની ક્ષમતા ન હોવા છતાં ક્રિકેટ પ્રત્યેનો અદમ્ય જુસ્સો : વિશ્વવિજેતા ભારતીય ટીમમાં ગુજરાતની દીકરીની પસંદગી, 2થી 8 ડિસેમ્બર દરમિયાન નેપાળ સામે રમશે પાંચ ટી-20 મેચની શ્રેણી

ગુજરાતની એક સામાન્ય પરિવારમાંથી આવતી અને મર્યાદિત સંસાધનો વચ્ચે ક્રિકેટમાં આગળ વધવાની હિંમત ધરાવતી કલ્પનાબેન ચૌર્યાએ પોતાની પ્રતિભા અને સંઘર્ષના બળે આંતરરાષ્ટ્રીય ક્રિકેટમાં સ્થાન મેળવ્યું છે. ભારતની મહિલા બ્લાઇન્ડ ક્રિકેટ ટીમમાં ગુજરાતનું પ્રતિનિધિત્વ કરવાની તક મળવી તેમના માટે ગૌરવની વાત છે. ખાસ વાત એ છે કે ક્રિકેટ જેવી રમત માટે જરૂરી સારા સાધનો, પૂરતી સુવિધાઓ અને સંસાધનોની ઉપલબ્ધતા ન હોવા છતાં તેમણે રમત પ્રત્યેનો જુસ્સો જાળવી રાખ્યો છે.

અમદાવાદ/ગુરુગ્રામ :

ભારતીય મહિલા બ્લાઇન્ડ ક્રિકેટ ટીમમાં ગુજરાતની કલ્પનાબેન ચૌર્યાની પસંદગી થતાં રાજ્યના રમતજગતમાં આનંદની લાગણી પ્રસરી છે. ક્રિકેટ એસોસિએશન ફોર ધ બ્લાઇન્ડ ઇન ઇન્ડિયા (CABI) દ્વારા જાહેર કરવામાં આવેલી 17 સભ્યોની ભારતીય મહિલા ટીમમાં કલ્પનાબેનને સ્થાન મળ્યું છે. ભારતની વિશ્વવિજેતા ટીમ હવે નેપાળ સામે પાંચ મેચની આંતરરાષ્ટ્રીય ટી-20 શ્રેણીમાં મેદાનમાં ઉતરશે.

આ શ્રેણી 2થી 8 ડિસેમ્બર, 2026 દરમિયાન ગુરુગ્રામના ધ બોલ પાર્ક ક્રિકેટ ગ્રાઉન્ડ ખાતે રમાશે. ભારત અને નેપાળ વચ્ચે રમાનારી આ શ્રેણીને IIFL હોમ ફાઇનાન્સ દ્વારા CSR પહેલ અંતર્ગત સહયોગ આપવામાં આવી રહ્યો છે.

મર્યાદિત સાધનો છતાં સપનાંને સાકાર કરવાની સફર

કલ્પનાબેન ચૌર્યાની પસંદગી માત્ર એક ખેલાડીની ટીમમાં એન્ટ્રી નથી, પરંતુ રમત પ્રત્યેની તેમની લગન અને સંઘર્ષનું મહત્ત્વ દર્શાવે છે. ગુજરાતની આ દીકરીને ક્રિકેટમાં આગળ વધવા માટે અન્ય ખેલાડીઓની જેમ તમામ આધુનિક સુવિધાઓ અને સારા સાધનો મળતા નથી. મર્યાદિત સંસાધનો વચ્ચે રમતની પ્રેક્ટિસ અને પોતાની પ્રતિભાને નિખારવાનો પડકાર હોવા છતાં તેમણે હિંમત હારી નથી.

સામાન્ય રીતે ક્રિકેટમાં આગળ વધવા માટે સારી કિટ, તાલીમની સુવિધા, કોચિંગ અને નિયમિત પ્રેક્ટિસ માટેની વ્યવસ્થા મહત્ત્વની હોય છે. પરંતુ સાધનોની મર્યાદા કોઈ ખેલાડીની પ્રતિભા કે સપનાંને રોકી શકતી નથી, તેનું ઉદાહરણ કલ્પનાબેન બની રહ્યાં છે. તેમની પસંદગીથી ગુજરાતની અન્ય દિવ્યાંગ દીકરીઓને પણ રમતક્ષેત્રે આગળ વધવાની પ્રેરણા મળશે.

વિશ્વવિજેતા ટીમમાં ગુજરાતનું પ્રતિનિધિત્વ

ભારતીય મહિલા બ્લાઇન્ડ ક્રિકેટ ટીમ અગાઉ યોજાયેલા પ્રથમ મહિલા ટી-20 બ્લાઇન્ડ ક્રિકેટ વર્લ્ડ કપમાં વિશ્વવિજેતા બની હતી. આ ઐતિહાસિક સ્પર્ધામાં ભારતે નેપાળને હરાવીને ખિતાબ જીત્યો હતો. હવે બંને ટીમ ફરી એકવાર સામસામે ટકરાશે.

ભારતીય ટીમની કેપ્ટનશિપ દીપિકા ટી.સી. સંભાળશે, જ્યારે ગંગા કદમ વાઇસ કેપ્ટન તરીકે જવાબદારી નિભાવશે. કલ્પનાબેન ચૌર્યા B1 કેટેગરીમાં ટીમમાં સામેલ છે. આ ટીમમાં દિલ્હી, રાજસ્થાન, બિહાર, ગુજરાત, કર્ણાટક, મધ્યપ્રદેશ, ઓડિશા અને મહારાષ્ટ્રની ખેલાડીઓનો સમાવેશ થાય છે.

16 નવેમ્બરથી ગુરુગ્રામમાં તાલીમ શિબિર

આંતરરાષ્ટ્રીય શ્રેણી પહેલાં ભારતીય મહિલા ટીમ 16 નવેમ્બરથી ગુરુગ્રામમાં સઘન તાલીમ શિબિરમાં ભાગ લેશે. આ શિબિરમાં ખેલાડીઓની ક્રિકેટ કુશળતા, ફિટનેસ, શારીરિક ક્ષમતા, રણનીતિ અને ટીમના સંયોજન પર વિશેષ ધ્યાન આપવામાં આવશે.

CABIના ચેરમેન ડૉ. મહાન્તેશ જી. કિવદાસન્નવરે જણાવ્યું હતું કે, વિશ્વવિજેતા મહિલા ટીમ દેશની દૃષ્ટિની ક્ષતિ ધરાવતી મહિલાઓ માટે પ્રેરણારૂપ છે. નેપાળ સામેની શ્રેણી ખેલાડીઓને આંતરરાષ્ટ્રીય અનુભવ આપશે અને મહિલા બ્લાઇન્ડ ક્રિકેટને વધુ મજબૂત બનાવશે.

કલ્પનાબેનની પસંદગી ગુજરાત માટે ગૌરવની સાથે એક સંદેશ પણ છે કે પ્રતિભાને તક અને પ્રોત્સાહન મળે તો મર્યાદિત સાધનો વચ્ચે પણ આંતરરાષ્ટ્રીય મંચ સુધી પહોંચી શકાય છે. હવે જરૂર છે કે આવી પ્રતિભાશાળી દીકરીઓને યોગ્ય તાલીમ, આધુનિક સાધનો અને આર્થિક સહયોગ મળે, જેથી તેમની રમતની સફર વધુ મજબૂત બની શકે.