આઈપીએલમાં ચેમ્પિયન કેપ્ટન, ઘરેલુ ક્રિકેટમાં 84.6 ટકા જીતનો રેકોર્ડ; આયર્લેન્ડ અને ઈંગ્લેન્ડના પ્રવાસમાં ટીમનું નેતૃત્વ કરશે
નવી દિલ્હી
ભારતીય ક્રિકેટ કંટ્રોલ બોર્ડ (BCCI)એ આયર્લેન્ડ અને ઈંગ્લેન્ડ પ્રવાસ માટે જાહેર કરાયેલી ટી-20 ટીમની કમાન શ્રેયસ અય્યરને સોંપી છે. આ નિર્ણય પાછળ તેમના આઈપીએલ અને ઘરેલુ ક્રિકેટમાં કેપ્ટન તરીકેના સતત સફળ પ્રદર્શનને મુખ્ય કારણ માનવામાં આવી રહ્યું છે. અનુભવી બેટ્સમેન શ્રેયસ અય્યર હવે પ્રથમ વખત ભારતની ટી-20 ટીમનું નેતૃત્વ કરશે, જ્યારે તિલક વર્માને ઉપ-કેપ્ટન બનાવવામાં આવ્યા છે.
આઈપીએલમાં સાબિત કરી નેતૃત્વ ક્ષમતા
શ્રેયસ અય્યરે 2018માં દિલ્હી કેપિટલ્સની કમાન સંભાળી હતી અને 2020માં ટીમને પ્રથમ વખત આઈપીએલ ફાઈનલ સુધી પહોંચાડી હતી. ત્યારબાદ તેમણે કોલકાતા નાઇટ રાઇડર્સને 2024માં આઈપીએલ ચેમ્પિયન બનાવ્યું હતું. આ સફળતા બાદ પંજાબ કિંગ્સે 2025ની હરાજીમાં તેમને 26.75 કરોડ રૂપિયામાં ખરીદ્યા હતા. તેમની આગેવાનીમાં પંજાબ ફાઈનલ સુધી પહોંચ્યું હતું, જ્યારે 2026માં પ્લેઓફમાં સ્થાન ન મળવા છતાં તેમની કેપ્ટનશીપની પ્રશંસા થઈ હતી.
100થી વધુ મેચમાં 55 ટકાથી વધુ જીત
આઈપીએલમાં શ્રેયસ અય્યરે દિલ્હી, કોલકાતા અને પંજાબનું નેતૃત્વ કરતાં કુલ 101 મેચમાં કેપ્ટનશીપ કરી છે. જેમાં ટીમને 55 મેચમાં જીત, 41માં હાર, ત્રણ મેચ ટાઈ અને બે મેચનું પરિણામ આવ્યું નહોતું. કેપ્ટન તરીકે તેમનો જીતનો દર 55.81 ટકા રહ્યો છે, જે તેમની વ્યૂહાત્મક નેતૃત્વ ક્ષમતાની સાબિતી આપે છે.
ઘરેલુ ક્રિકેટમાં પણ રહ્યો દબદબો
ઘરેલુ ક્રિકેટમાં પણ શ્રેયસ અય્યરનો રેકોર્ડ પ્રભાવશાળી રહ્યો છે. 2022-23ની સૈયદ મુશ્તાક અલી ટ્રોફીમાં તેમણે મુંબઈને ચેમ્પિયન બનાવ્યું હતું. ટી-20 ફોર્મેટમાં મુંબઈની કેપ્ટનશીપ કરતાં તેમણે 13માંથી 11 મેચમાં જીત અપાવી હતી, જ્યારે માત્ર બે મેચમાં પરાજય મળ્યો હતો. આ રીતે તેમનો જીતનો દર 84.6 ટકા રહ્યો છે.
ભારતીય ટીમ હવે આયર્લેન્ડ અને ઈંગ્લેન્ડ સામેની ટી-20 શ્રેણીમાં શ્રેયસ અય્યરના નેતૃત્વમાં મેદાનમાં ઉતરશે. આઈપીએલ અને ઘરેલુ ક્રિકેટમાં મળેલી સફળતાના આધારે હવે તેમની સામે આંતરરાષ્ટ્રીય ક્રિકેટમાં પણ પોતાની કેપ્ટનશીપનો છાપ છોડવાનો પડકાર રહેશે.
