લાસ વેગાસમાં યોજાતી સ્પર્ધામાં મહિલા 72 કિગ્રા કેટેગરીની ફાઇનલમાં યુક્રેનની ઇરિના ઝાબ્લોત્સ્કા સામે 0-6થી હાર; અગાઉ બે સતત પિનફોલ જીત સાથે ફાઇનલમાં મેળવી હતી એન્ટ્રી
લાસ વેગાસ
અમેરિકાના લાસ વેગાસમાં ચાલી રહેલી અંડર-23 વર્લ્ડ રેસલિંગ ચેમ્પિયનશિપમાં ભારતીય મહિલા પહેલવાન અમૃતાએ શાનદાર પ્રદર્શન કરીને સિલ્વર મેડલ જીત્યો છે. મહિલા 72 કિલોગ્રામ વજન વર્ગની ફાઇનલમાં અમૃતાને યુક્રેનની પહેલવાન ઇરિના ઝાબ્લોત્સ્કા સામે 0-6થી પરાજયનો સામનો કરવો પડ્યો હતો. જોકે, ફાઇનલ સુધીની તેની સફર પ્રભાવશાળી રહી હતી.
અમૃતાએ ટૂર્નામેન્ટના અગાઉના રાઉન્ડમાં સતત બે મુકાબલામાં પ્રતિસ્પર્ધીઓને પિનફોલ દ્વારા હરાવીને પોતાની મજબૂત દાવેદારી નોંધાવી હતી. તેના આ પ્રદર્શનથી ફાઇનલમાં સ્થાન મેળવવાનો માર્ગ મોકળો થયો હતો. જોકે, ગોલ્ડ મેડલ માટેના નિર્ણાયક મુકાબલામાં યુક્રેનની પહેલવાન સામે તેને સફળતા મળી નહોતી. પરિણામે અમૃતાએ સિલ્વર મેડલ સાથે બીજા સ્થાન પર સંતોષ માનવો પડ્યો હતો.
ચેમ્પિયનશિપમાં ભારતના કુલ ત્રણ મેડલ
અમૃતાના સિલ્વર મેડલ સાથે અંડર-23 વર્લ્ડ રેસલિંગ ચેમ્પિયનશિપમાં ભારતના કુલ મેડલની સંખ્યા ત્રણ થઈ છે. આ પહેલાં કોમલે મહિલા 59 કિલોગ્રામ વજન વર્ગમાં બ્રોન્ઝ મેડલ જીતીને ભારતને સફળતા અપાવી હતી.
આ ઉપરાંત, વિશ્ર્વજિત મોરેએ ગ્રીકો-રોમન રેસલિંગના 55 કિલોગ્રામ વજન વર્ગમાં સિલ્વર મેડલ જીતીને ઐતિહાસિક સિદ્ધિ નોંધાવી હતી. અંડર-23 સ્તરે આ કેટેગરીમાં ભારતનો આ પ્રથમ સિલ્વર મેડલ હતો.
આમ, આંતરરાષ્ટ્રીય સ્તરે ભારતીય પહેલવાનોનું પ્રદર્શન સતત ધ્યાન ખેંચી રહ્યું છે. અમૃતાના સિલ્વર મેડલ સહિત ભારતીય ખેલાડીઓએ અત્યાર સુધીમાં ત્રણ મેડલ જીતીને દેશનું ગૌરવ વધાર્યું છે. ચેમ્પિયનશિપમાં ભારતીય ટીમ પાસેથી હજુ વધુ સારા પ્રદર્શનની આશા રાખવામાં આવી રહી છે.
