પાટણમાં તળાવો અને કેનાલો સૂકાભઠ્ઠ, ખેડૂતોનો આક્રોશ: પાક સુકાતાં આર્થિક સંકટ ઘેરાયું

સરસ્વતી તાલુકામાં સિંચાઈના પાણી માટે ખેડૂતોની પોકાર; પાટણને દુષ્કાળગ્રસ્ત જાહેર કરવા અથવા કેનાલોમાં તાત્કાલિક પાણી છોડવાની માંગ, સાંસદ ભરતસિંહ ડાભી અને પૂર્વ ધારાસભ્ય ચંદનજી ઠાકોરે મુખ્યમંત્રીને કરી રજૂઆત

પાટણ:

અનિયમિત વરસાદ અને સિંચાઈના પાણીની અછતને પગલે પાટણ જિલ્લાના ખેડૂતોની મુશ્કેલીઓ વધી રહી છે. રાજ્ય સરકાર દ્વારા ચાર જિલ્લાઓને દુષ્કાળગ્રસ્ત જાહેર કરવામાં આવ્યા બાદ પાટણ જિલ્લાને બાકાત રાખવામાં આવતાં ખેડૂતોમાં નારાજગી જોવા મળી રહી છે. ખાસ કરીને સરસ્વતી તાલુકાના રણાવ, મેલુસણ, મોરપા, ઘેચેલી, ધારૂસણા અને કાનોસણ સહિતનાં ગામોમાં પાણીના અભાવે ઊભા પાક સુકાઈ રહ્યા છે. તળાવો પાણી વિના સૂકાભઠ્ઠ બન્યાં છે, જ્યારે સિંચાઈ માટેની કેનાલોમાં પણ પાણીના બદલે ધૂળ ઊડી રહી છે. આ પરિસ્થિતિમાં ખેડૂતોને પાક બચાવવો મુશ્કેલ બન્યો છે અને તેમની આર્થિક ચિંતામાં વધારો થયો છે.

સુકાયેલા તળાવમાં એકઠા થઈ ખેડૂતોએ સરકાર સામે કર્યો વિરોધ

સરસ્વતી તાલુકાના રણાવ ગામે ખેડૂતો સુકાઈ ગયેલા તળાવમાં એકઠા થયા હતા અને સરકાર સામે ઉગ્ર સૂત્રોચ્ચાર કરીને પોતાની વ્યથા વ્યક્ત કરી હતી. ખેડૂતોની મુખ્ય માંગ છે કે સિંચાઈ માટે કેનાલો અને તળાવોમાં તાત્કાલિક પાણી છોડવામાં આવે. જો પાણીની વ્યવસ્થા શક્ય ન હોય તો પાટણ જિલ્લાને પણ દુષ્કાળગ્રસ્ત જાહેર કરીને અસરગ્રસ્ત ખેડૂતોને યોગ્ય વળતર આપવામાં આવે.

ખેડૂતોએ એરંડા, કપાસ અને ઘાસચારા સહિતના પાકનું વાવેતર કરવા માટે પ્રતિ વીઘે રૂ. 10 હજારથી રૂ. 12 હજાર સુધીનો ખર્ચ કર્યો હોવાનું જણાવ્યું છે. મોંઘાં બિયારણ, ખાતર અને અન્ય ખેતી ખર્ચ કર્યા બાદ વરસાદ ખેંચાતાં તથા સિંચાઈનું પાણી ન મળતાં પાક સુકાવાની અણી પર પહોંચ્યો છે. પરિણામે ખેડૂતોને પાક પાછળ કરેલું રોકાણ ગુમાવવાની ભીતિ સતાવી રહી છે.

સુજલામ સુફલામ અને દાંતીવાડા કેનાલમાં પાણી છોડવાની માંગ

સરસ્વતી તાલુકામાંથી પસાર થતી મુખ્ય સુજલામ સુફલામ કેનાલ તેમજ દાંતીવાડા માઇનોર કેનાલમાં પાણીના અભાવે ખેડૂતોની મુશ્કેલી વધી છે. ખેડૂતોના જણાવ્યા મુજબ, પાકને બચાવવા માટે તળાવો પાસે મોંઘાં મશીનો અને પંપ વસાવવામાં આવ્યા હતા, પરંતુ તળાવોમાં જ પાણી ન હોવાથી આ સાધનો પાછળ કરેલો ખર્ચ પણ હાલ નિરર્થક બની રહ્યો છે.

ખેડૂતોની રજૂઆત છે કે નર્મદા ડેમમાં પાણીનો જથ્થો હોવા છતાં તેમને સિંચાઈ માટે પાણી મળતું નથી. કેનાલોમાં તાત્કાલિક પાણી છોડવામાં આવે તો એરંડા, કપાસ, ઘઉં અને ઘાસચારાના પાકને બચાવવામાં મદદ મળી શકે છે. આથી સરકાર તાત્કાલિક નિર્ણય લઈને પાણીની વ્યવસ્થા કરે તેવી માગ ઊઠી છે.

ઘાસચારાની અછતથી પશુપાલન વ્યવસાય પણ મુશ્કેલીમાં

પાણીની અછતની અસર માત્ર ખેતી પૂરતી મર્યાદિત રહી નથી, પરંતુ પશુપાલન વ્યવસાય પર પણ સંકટ ઘેરાઈ રહ્યું છે. ગ્રામ્ય વિસ્તારોમાં ઘાસચારાની અછત સર્જાતાં બજારમાં ઘાસના એક પૂળાનો ભાવ રૂ. 40થી રૂ. 50 સુધી પહોંચ્યો હોવાનું જણાવાયું છે. મોંઘા ભાવે ઘાસચારો ખરીદવો સામાન્ય ખેડૂતો અને માલધારીઓ માટે મુશ્કેલ બની રહ્યો છે. ખેતીની આવક ઘટવાની ભીતિ અને પશુઓના નિભાવ ખર્ચમાં વધારો થતાં પરિવારોની આર્થિક સ્થિતિ વધુ કથળી રહી છે.

સાંસદ અને પૂર્વ ધારાસભ્યની મુખ્યમંત્રીને રજૂઆત

ખેડૂતોની સમસ્યાને ધ્યાનમાં રાખીને પાટણના ભાજપના સાંસદ ભરતસિંહ ડાભી તેમજ પૂર્વ ધારાસભ્ય ચંદનજી ઠાકોરે રાજ્યના મુખ્યમંત્રીને પત્ર લખીને કેનાલોમાં તાત્કાલિક પાણી છોડવાની રજૂઆત કરી છે. બીજી તરફ, ખેડૂતો સરસ્વતી તાલુકાની સ્થિતિનો તાત્કાલિક સર્વે કરાવી પાકના નુકસાન અને પાણીની અછતના આધારે વિસ્તારને અસરગ્રસ્ત જાહેર કરવાની માંગ કરી રહ્યા છે.

હાલ ખેડૂતો સામે પાક બચાવવા અને પશુઓ માટે ઘાસચારાની વ્યવસ્થા કરવાનો પડકાર છે. તેથી સરકાર દ્વારા તાત્કાલિક પાણી છોડવામાં આવે અથવા અસરગ્રસ્ત ખેડૂતોને રાહત સહાય અને યોગ્ય વળતર આપવામાં આવે તેવી માંગ પ્રબળ બની છે. હવે સરકાર આ રજૂઆતોને ધ્યાનમાં રાખીને શું નિર્ણય લે છે તેના પર પાટણ જિલ્લાના ખેડૂતોની નજર મંડાયેલી છે.