વન-ડે વર્લ્ડ કપમાં રોહિત શર્મા સૌથી વધુ રન બનાવશેઃ સેહવાગ

આઈસીસીએ વીરેન્દ્ર સેહવાગનો આ વીડિયો પોતાના ઓફિશિયલ ઈન્સ્ટાગ્રામ પર પોસ્ટ કર્યો

નવી દિલ્હી
પૂર્વ ભારતીય ઓપનર વિરેન્દ્ર સેહવાગે હાલમાં જ આવનારા વર્લ્ડ કપ 2023માં સૌથી વધુ રન બનાવનાર ખેલાડીનું નામ લઈને મોટી ભવિષ્યવાણી કરી છે. સેહવાગનું કહેવું છે કે ભારતીય હોવાને કારણે તે આ માટે ભારતીય ખેલાડીની પસંદગી કરશે, પરંતુ અહીં તેણે ટીમ ઈન્ડિયાના સ્ટાર બેટ્સમેન વિરાટ કોહલીનું નામ લીધું નથી. આઈસીસીએ વીરેન્દ્ર સેહવાગનો આ વીડિયો પોતાના ઓફિશિયલ ઈન્સ્ટાગ્રામ પર પોસ્ટ કર્યો છે.
વીરેન્દ્ર સેહવાગે વર્લ્ડ કપ 2023માં સૌથી વધુ રન બનાવનાર બેટ્સમેન વિશે મોટી ભવિષ્યવાણી કરી અને આઈસીસીને કહ્યું, ‘મને લાગે છે કે ઘણા ઓપનર રન બનાવશે કારણ કે ભારતની પિચો સારી છે અને ઓપનરોને લાંબા સમય સુધી બેટિંગ કરવાની તક મળશે. મને લાગે છે કે જો મારે કોઈ એકની પસંદગી કરવી હોય તો મને લાગે છે કે તે રોહિત શર્મા હશે. કેટલાક અન્ય નામો પણ છે, પરંતુ હું જાણું છું કે હું ભારતીય છું અને મારે ભારતીય ખેલાડી પસંદ કરવો જોઈએ.
રોહિત શર્માને પસંદ કરવાનું કારણ જણાવતા સેહવાગે કહ્યું કે જેમ જેમ વર્લ્ડ કપ નજીક આવે છે તેમ હિટમેનની એનર્જી અને પ્રદર્શનમાં ઘણો બદલાવ આવે છે. આ વખતે તે કેપ્ટન પણ છે તેથી તે ઘણા રન બનાવશે. જણાવી દઈએ કે ભારતમાં 5 ઓક્ટોબરથી વર્લ્ડ કપ 2023 શરૂ થવા જઈ રહ્યો છે. ટીમ ઈન્ડિયા 8 ઓક્ટોબરે ઓસ્ટ્રેલિયા સામે પોતાના અભિયાનની શરૂઆત કરશે.