વૃદ્ધનું મુંબઈ એરપોર્ટ પર ઈમિગ્રેશન કાઉન્ટર ખાતે મોત થયું
મુંબઈ
વ્હીલચેર ના મળવાના કારણે 80 વર્ષના વૃદ્ધનું મૃત્યુ થયું હોવાની ઘટના મુંબઈ એરપોર્ટ પર બની છે. 80 વર્ષીય વૃદ્ધ પોતાનાં પત્ની સાથે ન્યૂયોર્કથી મુંબઈ આવ્યા હતા. વયોવૃદ્ધ હોવાના લીધે તેમણે એરપોર્ટ પર વ્હીલચેરની ફેસિલિટી બુક કરાવી હતી. એર ઈન્ડિયાની ફ્લાઈટમાં તેઓ ન્યૂયોર્કથી મુંબઈ આવ્યા હતા. જોકે, સોમવારે કમનસીબે વૃદ્ધનું મુંબઈ એરપોર્ટ પર ઈમિગ્રેશન કાઉન્ટર ખાતે મોત થયું હતું.
સૂત્રો પાસેથી પ્રાપ્ત થયેલી માહિતી અનુસાર, “વ્હીલચેરની અછત હોવાથી ફક્ત એક જ વ્હીલચેર આસિસ્ટન્ટ વૃદ્ધ દંપતી પાસે પહોંચ્યો હતો. વૃદ્ધ મહિલા વ્હીલચેર પર બેઠાં જ્યારે વૃદ્ધ પતિએ તેમની સાથે ચાલીને આવવાનું નક્કી કર્યું. ઈમિગ્રેશન એરિયા સુધી પહોંચવા માટે વૃદ્ધ દોઢ કિલોમીટર જેટલું ચાલ્યા હતા. પરંતુ ત્યાં પહોંચતા સુધીમાં જ તેમને હાર્ટ અટેક આવ્યો અને તેઓ ઢળી પડ્યા. જેથી તેમને એરપોર્ટ તાત્કાલિક પ્રાથમિક સારવાર આપવામાં આવી અને નાણાવટી હોસ્પિટલ ખાતે લઈ જવાયા હતા.”
મૃતક વૃદ્ધ ભારતીય મૂળના યુએસ પાર્સપોર્ટધારક હતા. વૃદ્ધ દંપતીએ વ્હીલચેરની સુવિધા માટે પ્રી-બુકિંગ કરાવ્યું હતું. ન્યૂયોર્કથી મુંબઈ આવનારી એર ઈન્ડિયાની ફ્લાઈટ AI-116માં તેમણે ઈકોનોમી ક્લાસની ટિકિટ બુક કરાવી હતી. આ ફ્લાઈટ રવિવારે ન્યૂયોર્કથી રવાના થઈ હતી. નામ ના આપવાની શરતે એરપોર્ટના સૂત્રોએ ટાઈમ્સ ઓફ ઈન્ડિયાને જણાવ્યું, “ફ્લાઈટમાં વ્હીલચેરની સુવિધા બુક કરાવનારા 32 પેસેન્જરો હતા પરંતુ ગ્રાઉન્ડ પર 15 વ્હીલચેર સાથેનો જ સ્ટાફ ઉપલબ્ધ હતો.”
આ ઘટના અંગે એર ઈન્ડિયા તરફથી પણ સ્પષ્ટીકરણ આપવામાં આવ્યું છે. એર ઈન્ડિયાના પ્રવક્તાએ કહ્યું, “વ્હીલચેરની માગ વધુ હતી, જેથી અમે તે વૃદ્ધને વિનંતી કરી હતી કે, તેઓ થોડીવાર રાહ જુએ. પરંતુ તેમણે વ્હીલચેરની રાહ જોવાના બદલે પોતાની પત્ની સાથે ચાલતા આવવાનું પસંદ કર્યું.” આ ઘટનાને દુર્ભાગ્યપૂર્ણ ગણાવતાં એર ઈન્ડિયાએ કહ્યું કે, તેઓ મૃતકના પરિવાર સાથે સતત સંપર્કમાં છે અને તેમને જોઈતી તમામ મદદ પૂરી પાડશે.
નામ ના આપવાની શરતે ગ્રાઉન્ડ સ્ટાફના મેમ્બરે જણાવ્યું, “ઘણીવાર એવું જોવા મળ્યું છે કે, વૃદ્ધ દંપતીઓ એરપોર્ટ પર પોતાના પતિ કે પત્નીથી અલગ થવા નથી માગતા. તેઓ એરક્રાફ્ટથી એરપોર્ટ ટર્મિનલ સુધી એકલા આવવાનું ટાળે છે. એમાંય જે વૃદ્ધોને ચાલવામાં તકલીફ હોય કે કાનમાં બહેરાશ હોય તેઓ તો એરક્રાફ્ટથી ટર્મિનલ બિલ્ડિંગ સુધી એકબીજાની સાથે જ આવવાનું પસંદ કરે છે.” હવે ઘડપણ ઉંમર જ એવી છે જેમાં પતિ-પત્નીને એકબીજાની સૌથી વધુ જરૂર પડે છે, ત્યારે જાહેરસ્થળોએ તેઓ એકબીજાથી વિખૂટા પડવા ના માગતા હોય તે સ્વાભાવિક છે.
આ તરફ સૂત્રો પાસેથી પ્રાપ્ત થયેલી જાણકારી અનુસાર, “ન્યૂયોર્કથી મુંબઈની ફ્લાઈટ સોમવારે સવારે 11.30 કલાકે મુંબઈ એરપોર્ટ પર લેન્ડ થવાની હતી. પરંતુ લેન્ડ થવામાં મોડું થયું હતું. આ ફ્લાઈટ સોમવારે બપોરે 2.10 કલાકે મુંબઈ પહોંચી હતી.”
ફ્લાઈટમાં ટિકિટ બુક કરાવતાં ઘણાં પેસેન્જરો એવા હોય છે જેમને ચાલવામાં તકલીફ ના હોવા છતાં તેઓ વ્હીલચેર બુક કરાવતા હોય છે અને આ બાબત એવિએશન ઈન્ડસ્ટ્રીના લોકો સારી રીતે જાણે છે. એક સિનિયર એરલાઈન અધિકારીએ આ મુદ્દે અભિપ્રાય આપતાં કહ્યું, “દશકા અગાઉ એર ઈન્ડિયા સહિતની એરલાઈનો વ્હીલચેરની સુવિધા બદલ ફી લેતી હતી. મેડિકલ સર્ટિફિકેટ હોય તેવા જ દર્દીઓને મફતમાં વ્હીલચેર આપવામાં આવતી હતી. જોકે, વિવિધ ગ્રુપ તરફથી આવેલા દબાણ બાદ એરલાઈન્સે મેડિકલ સર્ટિફિકેટની જરૂરિયાતને રદ્દ કરી નાખી હતી.”
