પાર્ટીના સંસ્થાપક ઈમરાન ખાનની સૂચના અનુસાર પાર્ટીએ કેન્દ્ર અને પંજાબમાં વિપક્ષમાં બેસવાનો નિર્ણય કર્યો
ઈસ્લામાબાદ
પાકિસ્તાનની જેલમાં બંધ પૂર્વ વડાપ્રધાન ઈમરાન ખાનની પાર્ટી પાકિસ્તાન તહરીક-એ-ઈન્સાફ (પીટીઆઈ)એ શુક્રવારે ચૂંટણીને લઈને મોટી જાહેરાત કરી હતી. જેમાં પાર્ટીએ કહ્યું હતું કે તે નેશનલ અને પંજાબ પ્રોવિન્શિયલ એસેમ્બલીમાં વિપક્ષમાં બેસશે. પાર્ટીના આ નિર્ણયની જાહેરાત પીટીઆઈના બેરિસ્ટર અલી સૈફે કરી છે.
અગાઉ એક દિવસ પહેલા પીટીઆઈએ ઓમર અયુબ ખાનને વડાપ્રધાન પદના ઉમેદવાર અને અસલમ ઈકબાલને પંજાબના મુખ્યમંત્રી તરીકે જાહેર કર્યા હતા. ઈસ્લામાબાદમાં કૌમી વતન પાર્ટીની મુલાકાત કર્યા બાદ મીડિયા સાથે વાત કરતા સૈફે કહ્યું હતું કે પાર્ટીના સંસ્થાપક ઈમરાન ખાનની સૂચના અનુસાર પાર્ટીએ કેન્દ્ર અને પંજાબમાં વિપક્ષમાં બેસવાનો નિર્ણય કર્યો છે. તેમણે વધુમાં કહ્યું હતું કે ‘જો પરિણામો બદલાયા ન હોત તો અમે સત્તામાં હોત.’
નોંધનીય છે કે પાકિસ્તાનમાં 8મી ફેબ્રુઆરીએ સામાન્ય ચૂંટણી યોજાઈ હતી, જેમાં કોઈ પણ પાર્ટીને સ્પષ્ટ બહુમતી મળી નથી અને ન તો છેડછાડ દ્વારા સરકાર બનાવવાનો કોઈ પ્રયાસ થઈ રહ્યો છે. પીટીઆઈ સમર્થિત અપક્ષ ઉમેદવારોએ 92 બેઠકો જીતી હતી, જ્યારે પાકિસ્તાન મુસ્લિમ લીગ-નવાઝ અને પાકિસ્તાન પીપલ્સ પાર્ટીએ અનુક્રમે 75 અને 54 બેઠકો પર જીતી હતી.
પાકિસ્તાનમાં નવી સરકાર બનાવવા માટે સતત પ્રયાસો ચાલુ છે. આવી સ્થિતિમાં પીએમએલ-એન પાર્ટીએ શાહબાઝ શરીફને વડાપ્રધાન પદ માટે નામાંકિત કર્યા છે. આ સાથે બિલાવલ ભુટ્ટોની પાકિસ્તાન પીપલ્સ પાર્ટી (પીપીપી)એ સરકારની રચના માટે પીએમએલ-એનને બહારથી સમર્થન આપવાનો નિર્ણય કર્યો છે. તેમજ નવાઝ શરીફે તેમની પુત્રી મરિયમ નવાઝને પંજાબના મુખ્યમંત્રી પદના ઉમેદવાર બનાવ્યા છે.
