દિલ્હીમાં અપમાનથી ત્રાસી પિતાએ પુત્રની લગ્ન પહેલાં જ હત્યા કરી

પુત્રના ચહેરા અને છાતી પર છરીના 15થી વધારે ઘા મારવામાં આવ્યા અને પુત્ર ઘટનાસ્થળે જ ફસડાઈ પડ્યો હતો

નવી દિલ્હી

દિલ્હીમાં એક જિમના માલિકની તેના લગ્નના થોડા કલાકો અગાઉ જ હત્યા કરવામાં આવી છે. આઘાતની વાત એ છે કે 29 વર્ષના યુવાનની હત્યા તેના જ પિતાએ કરી છે. ગૌરવ સિંઘલ નામનો યુવાન દિલ્હીમાં ફિટ બોક્સ નામે જિમ ચલાવતો હતો. તેના પિતા રંગાલાલ સાથે તેનો ઝઘડો ચાલતો હતો. લગ્નના થોડા કલાકો અગાઉ જ રંગાલાલે પોતાના પુત્રને છરીના અનેક ઘા મારીને મારી નાખ્યો છે. પોલીસે હત્યારા પિતાની ધરપકડ કરી છે.

સાઉથ દિલ્હીની આ ઘટનામાં લગ્નનો પ્રસંગ શોકમાં પરિવર્તિત થઈ ગયો છે. બુધવારે જિમ માલિક ગૌરવ સિંઘલના લગ્ન હતા અને લગ્નનો સમારોહ શરૂ થાય તેનાથી અમુક કલાકો અગાઉ જ તેના પિતાએ તેની હત્યા કરી છે. રંગાલાલનું કહેવું છે કે તેનો પુત્ર રોજેરોજ તેનું અપમાન કરતો હતો જેનાથી ત્રાસી જઈને તેણે આ હત્યા કરી છે. ગૌરવના ચહેરા અને છાતી પર છરીના 15થી વધારે ઘા મારવામાં આવ્યા હતા. ગૌરવ ઘટનાસ્થળે જ ફસડાઈ પડ્યો હતો.
પોલીસે જણાવ્યું કે ગૌરવના એરેન્જ્ડ મેરેજ થવાના હતા ત્યારે જ તેની હત્યા થઈ છે. બધા મહેમાનો આવી ગયા હતા અને મોટા વોલ્યુમથી મ્યુઝિક વાગતું હતું ત્યારે ખબર પડી કે ગૌરવની હત્યા કરવામાં આવી છે. તમામ મહેમાનો ગૌરવને શોધવા માટે દોડ્યા હતા જેનો મૃતદેહ નજીકના પાર્કમાંથી મળી આવ્યો હતો. તરત જ શોકગ્રસ્ત પરિવારજનો વિલાપ કરવા લાગ્યા હતા. તે સમયે ગૌરવનો પિતા રંગાલાલ ત્યાંથી ફરાર થઈ ગયો હતો.
ડીસીપી અંકિત ચૌહાણે જણાવ્યું કે ગૌરવને તેના સ્વજનો તાત્કાલિક નજીકની હોસ્પિટલે લઈ ગયા હતા જ્યાં તેને મૃત જાહેર કરાયો હતો. સાંજ સુધીમાં તેના હત્યારા પિતાને પકડી લેવાયા હતા. શરૂઆતમાં પરિવારજનોએ દલીલ કરી હતી કે બહારની કોઈ વ્યક્તિએ ગૌરવની હત્યા કરી છે પરંતુ થોડી જ વારમાં સ્પષ્ટ થઈ ગયું હતું કે જિમ માલિક યુવાનની હત્યા કોઈ બહારની વ્યક્તિએ નહીં પરંતુ તેના સગા પિતાએ કરી હતી. આ કેસમાં ગૌરવ સિંઘલના નાના ભાઈ અને બીજા કેટલાક લોકોને પણ ડિટેઈન કરીને તેમની પૂછપરછ કરવામાં આવી હતી.
એક પરિવારજને કહ્યું કે હત્યા થઈ ત્યારે કોઈને અવાજ સંભળાયો ન હતો. કારણ કે મોટા અવાજે ઢોલ અને મ્યુઝિક વાગી રહ્યું હતું. અમને કોઈની ચીસો પણ સંભળાઈ ન હતી. પોલીસની પાંચથી વધુ ટીમે તપાસ શરૂ કરી હતી અને કલાકોની અંદર જ કેસ સોલ્વ થઈ ગયો હતો.