ખાનક શાહ અને નક્ષ પટેલને ડબલ ક્રાઉન, ધૈર્ય પરમાર અને કૌશા ભૈરાપુરે બન્યા સિનિયર ચેમ્પિયન

પ્રથમ અમદાવાદ જિલ્લા રેન્કિંગ ટેબલ ટેનિસ ટૂર્નામેન્ટનું ભવ્ય સમાપન; વિવિધ વયજૂથોમાં ખેલાડીઓનો ઉત્કૃષ્ટ દેખાવ

અમદાવાદ,

ટેબલ ટેનિસ એસોસિએશન ઓફ અમદાવાદ (TTAA) દ્વારા ક્લબ O7, શેલા ખાતે આયોજિત પ્રથમ અમદાવાદ જિલ્લા રેન્કિંગ ટેબલ ટેનિસ ટુર્નામેન્ટ-2026નું શનિવારે રોમાંચક ફાઇનલ્સ સાથે સફળ સમાપન થયું હતું. શહેરના પ્રતિભાશાળી ખેલાડીઓએ વિવિધ વયજૂથોમાં ઉચ્ચ કક્ષાની રમતનું પ્રદર્શન કરતાં ચેમ્પિયનશિપ માટે જોરદાર સંઘર્ષ કર્યો હતો. ટુર્નામેન્ટમાં ખાનક શાહ અને નક્ષ પટેલ સૌથી સફળ ખેલાડીઓ તરીકે ઉભરી આવ્યા હતા. બંનેએ પોતાની-પોતાની વયજૂથની બે-બે સ્પર્ધાઓમાં વિજય મેળવી ડબલ ક્રાઉન હાંસલ કર્યો હતો. સિનિયર વર્ગમાં ધૈર્ય પરમાર અને કૌશા ભૈરાપુરેએ અનુક્રમે પુરુષ અને મહિલા સિંગલ્સના ખિતાબ પોતાના નામે કર્યા હતા.

સિનિયર સિંગલ્સમાં ધૈર્ય અને કૌશાનો દબદબો

ટુર્નામેન્ટની સૌથી વધુ ચર્ચાસ્પદ મેન્સ સિંગલ્સ ફાઇનલમાં ત્રીજા ક્રમાંકિત ધૈર્ય પરમારે ટોચના ક્રમાંકિત સોહમ ભટ્ટાચાર્યાને 4-2 (12-10, 11-6, 11-13, 11-4, 9-11, 11-7)થી હરાવી ચેમ્પિયન બનવાનો ગૌરવ મેળવ્યો હતો. બંને ખેલાડીઓ વચ્ચે જોરદાર ટક્કર જોવા મળી હતી, પરંતુ નિર્ણાયક ક્ષણોમાં ધૈર્યે વધુ સચોટ રમત દાખવી હતી.

વુમન્સ સિંગલ્સની ફાઇનલમાં ટોચની ક્રમાંકિત કૌશા ભૈરાપુરેએ ફિઝા પવારને 4-2 (11-3, 11-6, 11-8, 5-11, 6-11, 11-5)થી હરાવી ખિતાબ જીત્યો હતો. શરૂઆતની ત્રણ ગેમમાં એકતરફી લીડ મેળવ્યા બાદ કૌશાએ મેચ પર મજબૂત પકડ જાળવી રાખી હતી.

ખાનક શાહનો શાનદાર દેખાવ

ખાનક શાહે સમગ્ર ટુર્નામેન્ટ દરમિયાન સતત શ્રેષ્ઠ રમતનું પ્રદર્શન કર્યું હતું. જુનિયર (U-17) ગર્લ્સ સિંગલ્સની ફાઇનલમાં તેણે ફિઝા પવારને 3-0 (11-8, 11-8, 11-9)થી હરાવી પ્રથમ ખિતાબ જીત્યો હતો. ત્યારબાદ સબ-જુનિયર (U-15) ગર્લ્સ સિંગલ્સની ફાઇનલમાં પણ ફિઝા પવાર સામે 3-1 (14-12, 14-12, 9-11, 11-9)થી વિજય મેળવી બીજો ખિતાબ પોતાના નામે કર્યો હતો.

જોકે, જુનિયર (U-19) ગર્લ્સ સિંગલ્સની ફાઇનલમાં તેને ત્રીજા ક્રમાંકિત નિત્યા ચોક્સી સામે સાત ગેમ સુધી ચાલેલી રોમાંચક મેચમાં 3-4થી પરાજયનો સામનો કરવો પડ્યો હતો. નિત્યાએ 4-3 (11-8, 11-9, 3-11, 11-6, 10-12, 7-11, 11-8)થી જીત મેળવી ચેમ્પિયનશિપ જીતી હતી.

નક્ષ પટેલનો પણ ડબલ વિજય

નક્ષ પટેલે સબ-જુનિયર (U-15) બોયઝ સિંગલ્સમાં વાત્સલ પટેલને 3-1 (11-6, 11-5, 8-11, 11-4)થી હરાવી ખિતાબ જીત્યો હતો. ત્યારબાદ કેડેટ (U-13) બોયઝ સિંગલ્સની ફાઇનલમાં તેણે બીજા ક્રમાંકિત શ્લોક દવેને 3-0 (12-10, 11-6, 11-5)થી પરાજય આપીને ટુર્નામેન્ટમાં પોતાનો બીજો ખિતાબ જીત્યો હતો.

જુનિયર વર્ગમાં જોરદાર ટક્કર

જુનિયર (U-19) બોયઝ સિંગલ્સની ફાઇનલ ટુર્નામેન્ટની સૌથી રોમાંચક મેચોમાંથી એક રહી હતી. ચોથા ક્રમાંકિત અભિલક્ષ પટેલે ત્રીજા ક્રમાંકિત હિમાંશ દહિયાને 4-3 (6-11, 11-8, 5-11, 12-10, 8-11, 11-7, 11-7)થી હરાવી ખિતાબ જીત્યો હતો. સાત ગેમ સુધી ચાલેલી આ મેચે દર્શકોને અંત સુધી બેઠા રાખ્યા હતા.

અંડર-17 બોયઝ સિંગલ્સમાં દ્વિજ ભાલોડિયાએ ટોચના ક્રમાંકિત મલવ પંચાલને 3-2 (8-11, 11-6, 8-11, 11-2, 11-4)થી હરાવી ચેમ્પિયન બન્યો હતો.

ઉભરતી પ્રતિભાઓએ પણ છોડી છાપ

કેડેટ (U-13) ગર્લ્સ સિંગલ્સમાં ઝિનાલી પટેલે જેન્સી મોદીને 3-2થી હરાવી ખિતાબ જીત્યો હતો. હોપ્સ (U-11) બોયઝ સિંગલ્સમાં સાહસ મંગલે રુશિલ ત્રિવેદીને 3-1થી હરાવ્યો હતો, જ્યારે ગર્લ્સ વિભાગમાં વિહા રાઠોડે મિશા સોનીને 3-1થી હરાવી ચેમ્પિયનશિપ પોતાના નામે કરી હતી.

હોપ્સ (U-09) બોયઝ સિંગલ્સમાં શિવાન સેજવાણી અને ગર્લ્સ વિભાગમાં દુર્વા શાહ વિજેતા બન્યા હતા.

ડબલ્સ અને વેટરન્સ વિભાગમાં પણ જોરદાર સ્પર્ધા

ઓપન ડબલ્સમાં અભિલાશ રાવલ અને અભિલક્ષ પટેલની જોડીએ સોહમ ભટ્ટાચાર્યા અને સાહિબજોત સિંહ જાગ્ગીની જોડીને હરાવી ખિતાબ જીત્યો હતો. આ સાથે અભિલક્ષ પટેલે જુનિયર (U-19) બોયઝ સિંગલ્સ અને ઓપન ડબલ્સ એમ બે ખિતાબ જીતી પોતાની સફળતા વધુ યાદગાર બનાવી હતી.

વેટરન્સ વિભાગમાં મેન્સ 39+ સિંગલ્સમાં નમન ખંડારે નિરવ પટેલને 3-1થી હરાવ્યો હતો. મેન્સ 49+ સિંગલ્સમાં દિવ્યેશ વોરાએ હશિત પાઠક સામે 3-1થી જીત મેળવી હતી, જ્યારે મેન્સ 59+ સિંગલ્સમાં રણજિત નગાડિયાએ સંજય તાયલને 3-1થી હરાવી ખિતાબ જીત્યો હતો.