ભાજપના કેટલાક લોકો જ પાર્ટીને નુકસાન પહોંચાડતા હોવાનો આક્ષેપ; દારૂ-જુગારના અડ્ડાઓ સાથે સાંઠગાંઠના પણ ગંભીર આરોપ
નર્મદા
ભરૂચના સાંસદ મનસુખ વસાવાએ પોતાની જ પાર્ટીના કેટલાક કાર્યકરો અને હોદ્દેદારો સામે ખુલ્લેઆમ નારાજગી વ્યક્ત કરતાં ભાજપના આંતરિક વિખવાદને જાહેર મંચ પર ઉજાગર કર્યો છે. નર્મદા જિલ્લાના દેડિયાપાડા સ્થિત જાનકી આશ્રમમાં યોજાયેલી બેઠક દરમિયાન તેમણે કેટલાક ભાજપના આગેવાનો પર સહકાર ન આપવાનો અને પાર્ટીના હિતોને નુકસાન પહોંચાડવાનો આક્ષેપ કર્યો હતો.
ભાજપના લોકો જ ભાજપને નડતા હોવાનો આક્ષેપ
બેઠક દરમિયાન મનસુખ વસાવાએ જણાવ્યું હતું કે ઘણી વખત વિરોધ પક્ષ કરતાં પોતાની જ પાર્ટીના કેટલાક લોકો વધુ મુશ્કેલી ઉભી કરે છે. ચૂંટણી હોય કે અન્ય સંગઠનાત્મક કામગીરી, કેટલાક કાર્યકરો અને હોદ્દેદારો ઈરાદાપૂર્વક અવરોધ ઉભા કરતા હોવાનું તેમણે જણાવ્યું હતું. તેમણે ચેતવણી આપતા કહ્યું કે યોગ્ય સમય આવતાં આવા તમામ લોકોને જનતા સમક્ષ ખુલ્લા પાડવામાં આવશે.
દારૂ અને જુગારના અડ્ડા મુદ્દે ગંભીર આરોપ
સાંસદે વિસ્તારમાં ચાલી રહેલા દારૂ અને જુગારના ગેરકાયદે ધંધાનો મુદ્દો પણ ઉઠાવ્યો હતો. તેમણે આરોપ લગાવ્યો કે ભાજપના કેટલાક સ્થાનિક આગેવાનો આવા અસામાજિક તત્ત્વોને પ્રત્યક્ષ કે પરોક્ષ રીતે મદદ કરી રહ્યા છે. આવા લોકો પોતાને સમાજસેવક ગણાવે છે, પરંતુ વાસ્તવમાં સમાજને નુકસાન પહોંચાડી રહ્યા હોવાનું તેમણે જણાવ્યું હતું.
જાહેરસભામાં નામ જાહેર કરવાની ચીમકી
મનસુખ વસાવાએ મંચ પરથી સ્પષ્ટ શબ્દોમાં કહ્યું કે ગેરકાયદે પ્રવૃત્તિઓમાં સંડોવાયેલા લોકો કોઈપણ પક્ષના હોય, તેમને છોડવામાં આવશે નહીં. તેમણે જણાવ્યું કે આગામી દિવસોમાં જાહેરસભા યોજીને આવા તત્ત્વોના નામ અને તેમની ભૂમિકા પ્રજા સમક્ષ લાવવામાં આવશે. આ દરમિયાન તેમણે આમ આદમી પાર્ટી, કોંગ્રેસ અને ભાજપ સહિત તમામ રાજકીય પક્ષોના લોકો સામે કાર્યવાહી કરવાની વાત પણ કરી હતી.
રાજકીય વર્તુળોમાં ચર્ચા તેજ
સાંસદના નિવેદન બાદ રાજકીય વર્તુળોમાં ચર્ચા તેજ બની છે. પોતાની જ પાર્ટીના કાર્યકરો સામે જાહેરમાં આટલી કડક ભાષામાં નિવેદન આપતાં ભાજપના સ્થાનિક સંગઠનમાં આંતરિક મતભેદો હોવાની અટકળો પણ શરૂ થઈ છે. આગામી દિવસોમાં મનસુખ વસાવા દ્વારા કરવામાં આવેલા આક્ષેપો અંગે શું પગલાં લેવાય છે તેના પર સૌની નજર મંડાઈ છે.
