યંગ ફાઉન્ડેશનના ઉપક્રમે નેઈલ આર્ટ, ગૂંથણ અને સિવણ કામની તાલીમ; દીકરીઓને આત્મનિર્ભર બનવાનો સંદેશ
સુરત, કામરેજ:
કામરેજ વિસ્તારમાં ધારાસભ્ય અને ગુજરાત સરકારના આરોગ્ય મંત્રી પ્રફુલ પાનશેરીયાના માર્ગદર્શન હેઠળ ‘યંગ ફાઉન્ડેશન’ દ્વારા દીકરીઓ માટે આયોજિત 10 દિવસીય વિશેષ આર્ટ એન્ડ ક્રાફ્ટ તાલીમ શિબિરનું સફળતાપૂર્વક સમાપન થયું હતું. શિબિરમાં પાસોદ્રા, કઠોદરા, લસકાણા, યોગીચોક સહિત આસપાસના વિસ્તારોની 250થી વધુ દીકરીઓએ ઉત્સાહપૂર્વક ભાગ લઈને વિવિધ સર્જનાત્મક કૌશલ્યો શીખ્યા હતા.
કલા અને કૌશલ્ય દ્વારા આત્મનિર્ભરતા તરફ પહેલ
સમાપન સમારોહમાં આરોગ્ય મંત્રી પ્રફુલ પાનશેરીયાએ જણાવ્યું હતું કે, આ શિબિરનો મુખ્ય હેતુ દીકરીઓમાં રહેલી સર્જનાત્મક પ્રતિભાને પ્રોત્સાહન આપવાનો અને તેમને કૌશલ્ય વિકાસ દ્વારા આત્મનિર્ભર બનાવવાનો છે. તેમણે જણાવ્યું કે, આવી તાલીમ માત્ર શોખ પૂરતી મર્યાદિત નથી, પરંતુ ભવિષ્યમાં રોજગાર અને સ્વરોજગારની નવી તકો પણ ઊભી કરી શકે છે.
વિવિધ કળાઓનું નિષ્ણાતો દ્વારા માર્ગદર્શન
દસ દિવસ સુધી ચાલેલી શિબિરમાં નિષ્ણાત ટ્રેનરો દ્વારા દીકરીઓને નેઈલ આર્ટ, ગૂંથણ અને સિવણ કામ સહિતની વિવિધ હસ્તકલાઓનું વ્યવહારુ પ્રશિક્ષણ આપવામાં આવ્યું હતું. તાલીમ દરમિયાન દીકરીઓએ ઉત્સાહપૂર્વક ભાગ લઈ પોતાની સર્જનાત્મકતા અને કૌશલ્યને વધુ વિકસાવ્યું હતું.
મોબાઈલ કરતાં સર્જનાત્મક પ્રવૃત્તિઓ પર ભાર
પ્રફુલ પાનશેરીયાએ દીકરીઓને સંબોધતા જણાવ્યું કે, ટેકનોલોજીના વર્તમાન યુગમાં મોબાઈલનો મર્યાદિત ઉપયોગ કરીને વધુ સમય શૈક્ષણિક, સર્જનાત્મક અને વ્યક્તિત્વ વિકાસની પ્રવૃત્તિઓમાં ફાળવવો જોઈએ. તેમણે કહ્યું કે, આવી પ્રવૃત્તિઓ જીવનમાં આત્મવિશ્વાસ વધારવા ઉપરાંત નવી ઓળખ અને કારકિર્દી ઘડવામાં પણ મદદરૂપ બને છે.
દીકરીઓના સર્વાંગી વિકાસ માટે સતત પ્રયાસ
‘યંગ ફાઉન્ડેશન’ અને ભારતીય જનતા પાર્ટીની ટીમના સંયુક્ત ઉપક્રમે યોજાયેલી આ શિબિરના અંતે આયોજકોએ તાલીમ પૂર્ણ કરનાર તમામ દીકરીઓને શુભેચ્છા પાઠવી હતી. આયોજકોના જણાવ્યા મુજબ, દીકરીઓમાં રહેલી સુષુપ્ત શક્તિઓને બહાર લાવી તેમને કૌશલ્યસભર અને આત્મનિર્ભર બનાવવાના હેતુથી ભવિષ્યમાં પણ આવી તાલીમ શિબિરોનું આયોજન કરવામાં આવશે. આ પહેલને વાલીઓ અને સ્થાનિક લોકો તરફથી પણ સારો પ્રતિસાદ મળ્યો હતો.
