મહારાષ્ટ્ર સરકાર અને જિયોબ્લાસ્ટ વચ્ચે ગેમિંગ અને ઈ-સ્પોર્ટ્સ ક્ષેત્રે વ્યૂહાત્મક એમઓયુ

યુવા કૌશલ્ય વિકાસ, સ્ટાર્ટઅપ્સ અને ડિજિટલ ઈનોવેશનને મળશે પ્રોત્સાહન; ‘ઈન્ડિયા રાઈઝિંગઃ રોડ ટુ EWC’ ભાગીદારીની પ્રથમ પહેલ બનશે

મુંબઈ:

ભારતમાં ગેમિંગ અને ઈ-સ્પોર્ટ્સ ક્ષેત્રને નવી દિશા આપવા માટે મહારાષ્ટ્ર સરકાર અને જિયોબ્લાસ્ટ (JioBLAST) વચ્ચે વ્યૂહાત્મક સમજૂતી કરાર (MoU) પર હસ્તાક્ષર કરવામાં આવ્યા છે. આ ભાગીદારી હેઠળ ગેમિંગ, ઈ-સ્પોર્ટ્સ, ડિજિટલ ઈનોવેશન, યુવા જોડાણ, કૌશલ્ય વિકાસ અને રાજ્યના ડિજિટલ અર્થતંત્રને મજબૂત બનાવવા માટે લાંબા ગાળે સહયોગ કરવામાં આવશે. આ ભાગીદારીની પ્રથમ પહેલ તરીકે ‘ઈન્ડિયા રાઈઝિંગઃ રોડ ટુ EWC’નું આયોજન મુંબઈમાં કરવામાં આવશે.

ગેમિંગ ઈકોસિસ્ટમને મળશે નવી ગતિ

આ એમઓયુ મહારાષ્ટ્ર સરકાર અને જિયોબ્લાસ્ટ વચ્ચે ગેમિંગ અને ઈ-સ્પોર્ટ્સ ક્ષેત્રના વિકાસ માટે વ્યૂહાત્મક માળખું તૈયાર કરે છે. ઉદ્યોગ સાથે સંકલન, નવીનતા, જ્ઞાનના આદાન-પ્રદાન અને ક્ષમતા નિર્માણ દ્વારા રાજ્યમાં મજબૂત ગેમિંગ ઈકોસિસ્ટમ વિકસાવવાનો તેનો મુખ્ય ઉદ્દેશ છે. ‘ઈન્ડિયા રાઈઝિંગઃ રોડ ટુ EWC’ દ્વારા ભારતીય ખેલાડીઓ, ગેમિંગ ક્રિએટર્સ અને ગેમિંગ સમુદાયને વૈશ્વિક ઈ-સ્પોર્ટ્સ પ્લેટફોર્મ સાથે જોડવાની તક મળશે.

છ મુખ્ય ક્ષેત્રોમાં સહયોગ

ભાગીદારી અંતર્ગત ગેમિંગ અને ઈ-સ્પોર્ટ્સ ઈકોસિસ્ટમને મજબૂત બનાવવાની સાથે ડિજિટલ અર્થતંત્રને પ્રોત્સાહન, યુવાનોના કૌશલ્ય વિકાસ, સ્ટાર્ટઅપ્સ અને શૈક્ષણિક સંસ્થાઓ સાથે સહયોગ, ઉદ્યોગલક્ષી કાર્યક્રમો તથા જ્ઞાન વિનિમય અને રોકાણ પ્રોત્સાહન જેવા છ મુખ્ય ક્ષેત્રોમાં સંયુક્ત રીતે કામગીરી કરવામાં આવશે.

મહારાષ્ટ્રને ગેમિંગ હબ બનાવવાનો પ્રયાસ

મહારાષ્ટ્ર સરકારના ઉદ્યોગ વિભાગના મુખ્ય સચિવ ડૉ. પી. અંબાલગને જણાવ્યું કે ગેમિંગ, ઈ-સ્પોર્ટ્સ અને ડિજિટલ મનોરંજન યુવા શક્તિ, નવીનતા અને ઉદ્યોગસાહસિકતાના મહત્વપૂર્ણ ક્ષેત્ર તરીકે ઉભરી રહ્યા છે. જિયોબ્લાસ્ટ સાથેની ભાગીદારી રાજ્યમાં ઉદ્યોગને અનુકૂળ વાતાવરણ, કૌશલ્ય વિકાસ અને ઈકોસિસ્ટમ નિર્માણને પ્રોત્સાહન આપશે. તેમણે વિશ્વાસ વ્યક્ત કર્યો કે આ પહેલ મહારાષ્ટ્રને દેશના અગ્રણી ગેમિંગ અને ડિજિટલ ઈનોવેશન કેન્દ્ર તરીકે સ્થાપિત કરવામાં મદદરૂપ બનશે.

4 જુલાઈએ મુંબઈમાં ઈન્ડિયા રાઈઝિંગનું સમાપન

જિયોબ્લાસ્ટના સીઈઓ ચાર્લી કાઉડ્રેએ જણાવ્યું કે ભારતમાં વિશ્વના સૌથી મોટા ગેમિંગ સમુદાયોમાંનો એક વસે છે અને મહારાષ્ટ્ર પાસે પ્રતિભા, આધુનિક ઈન્ફ્રાસ્ટ્રક્ચર તથા ઉદ્યોગસાહસિકતાનું મજબૂત માળખું છે. તેમણે કહ્યું કે ‘ઈન્ડિયા રાઈઝિંગઃ રોડ ટુ EWC’ દ્વારા પ્રથમ વખત Esports World Cupનું ભારતમાં ભૌતિક આયોજન મુંબઈમાં થશે.

4 જુલાઈ, 2026ના રોજ યોજાનારા સમાપન કાર્યક્રમમાં ચેસ LAN ફાઈનલનું આયોજન કરવામાં આવશે, જેમાં ભારતના ગ્રાન્ડમાસ્ટર વિદિત ગુજરાથી અને નેધરલેન્ડ્સના ગ્રાન્ડમાસ્ટર બેન્જામિન બોક વચ્ચે મુકાબલો યોજાશે. વિજેતા ખેલાડી Esports World Cup 2026ની ચેસ સ્પર્ધાના અંતિમ તબક્કામાં સ્થાન મેળવશે.

ઈ-સ્પોર્ટ્સ સાથે મનોરંજનનો સમન્વય

આ કાર્યક્રમમાં VALORANT અને MOBA Legends: 5v5! જેવી લોકપ્રિય ઈ-સ્પોર્ટ્સ સ્પર્ધાઓ ઉપરાંત અગ્રણી ગેમિંગ સંસ્થાઓના ક્રિએટર શોકેસ, કોમ્યુનિટી એક્ટિવિટીઝ અને લાઈવ એન્ટરટેઈનમેન્ટનું પણ આયોજન કરવામાં આવશે. આયોજકોના જણાવ્યા અનુસાર, આ એમઓયુ બિન-બંધનકર્તા કરાર છે અને ભવિષ્યના તમામ પ્રોજેક્ટ્સ તથા રોકાણો માટે અલગ મંજૂરી અને કરાર કરવામાં આવશે.