રોનાલ્ડો અને ગોન્ઝાલો રામોસના ગોલથી પોર્ટુગલની જીત; VARના નિર્ણયથી ક્રોએશિયાનું સપનું તૂટ્યું
ટોરોન્ટો
ફિફા વર્લ્ડ કપ 2026ના રાઉન્ડ ઓફ-32માં પોર્ટુગલે રોમાંચક મુકાબલામાં ક્રોએશિયાને 2-1થી પરાજય આપી પ્રી-ક્વાર્ટર ફાઇનલ (રાઉન્ડ ઓફ-16)માં સ્થાન મેળવ્યું છે. ટોરોન્ટોમાં રમાયેલા આ મુકાબલામાં અંતિમ મિનિટો સુધી જબરદસ્ત નાટ્યાત્મક દ્રશ્યો જોવા મળ્યા હતા. પોર્ટુગલ તરફથી કેપ્ટન ક્રિસ્ટિયાનો રોનાલ્ડો અને ગોન્ઝાલો રામોસે ગોલ નોંધાવ્યા હતા, જ્યારે ક્રોએશિયા માટે ઈવાન પેરિશિચે એકમાત્ર ગોલ કર્યો હતો.
પ્રથમ હાફમાં ગોલ વિનાનો જંગ
મેચના પ્રથમ હાફમાં બંને ટીમો ગોલ કરવામાં નિષ્ફળ રહી હતી. પોર્ટુગલે શરૂઆતથી જ આક્રમક રમત દાખવી હતી અને અનેક ગોલ કરવાની તક ઊભી કરી હતી. રોનાલ્ડોએ શરૂઆતમાં હેડર દ્વારા મળેલી સરળ તક ગુમાવી હતી. પ્રથમ હાફમાં પોર્ટુગલનો બોલ પઝેશન અને હુમલાઓમાં દબદબો રહ્યો છતાં સ્કોર 0-0 રહ્યો હતો.
પેરિશિચે અપાવી લીડ, રોનાલ્ડોએ કરી બરાબરી
બીજા હાફની 53મી મિનિટે ઈવાન પેરિશિચે ગોલ ફટકારી ક્રોએશિયાને 1-0ની સરસાઈ અપાવી હતી. જોકે, 64મી મિનિટે VARની મદદથી પોર્ટુગલને પેનલ્ટી આપવામાં આવી. ક્રોએશિયાના ડિફેન્ડર દ્વારા બોક્સમાં ફાઉલ થયાનું નિર્ધારિત થતાં મળેલી પેનલ્ટીને રોનાલ્ડોએ સફળતાપૂર્વક ગોલમાં ફેરવી સ્કોર 1-1થી સમાન કરી દીધો હતો. ફિફા વર્લ્ડ કપના નોકઆઉટ તબક્કામાં રોનાલ્ડોનો આ પ્રથમ ગોલ હતો.
ઈન્જરી ટાઈમમાં રામોસે અપાવી જીત
નિયમિત સમય પૂર્ણ થયા બાદ ઉમેરાયેલા ઈન્જરી ટાઈમમાં પોર્ટુગલે નિર્ણાયક પ્રહાર કર્યો હતો. 90+4મી મિનિટે રાફેલ લિયાઓના ક્રોસ પર ગોન્ઝાલો રામોસે હેડર દ્વારા ગોલ નોંધાવી પોર્ટુગલને 2-1ની સરસાઈ અપાવી હતી. ત્યારબાદ ક્રોએશિયાએ સતત હુમલા કર્યા અને 90+15મી મિનિટે ગોલ પણ નોંધાવ્યો, પરંતુ VARની તપાસમાં ખેલાડી ઑફસાઇડ હોવાનું સામે આવતાં ગોલ રદ કરવામાં આવ્યો હતો. આ નિર્ણય બાદ ક્રોએશિયાની બરાબરીની આશા તૂટી ગઈ હતી.
રોનાલ્ડોએ બનાવ્યા બે ઐતિહાસિક રેકોર્ડ
41 વર્ષ અને 147 દિવસની ઉંમરે ક્રિસ્ટિયાનો રોનાલ્ડો ફિફા વર્લ્ડ કપના નોકઆઉટ મુકાબલામાં રમનાર સૌથી વધુ વયના ખેલાડી બન્યા છે. સાથે જ તેઓ 40 વર્ષની ઉંમર બાદ વર્લ્ડ કપના નોકઆઉટ તબક્કામાં ગોલ કરનાર પ્રથમ ખેલાડી પણ બન્યા છે. આ સાથે તેમણે પોતાના પૂર્વ સાથી પેપેનો રેકોર્ડ પાછળ છોડી દીધો છે.
હવે સ્પેન સામે ટક્કર
આ જીત સાથે પોર્ટુગલે રાઉન્ડ ઓફ-16માં પ્રવેશ કર્યો છે, જ્યાં તેનો મુકાબલો 2010ની ચેમ્પિયન સ્પેન સામે 7 જુલાઈએ ડલાસમાં રમાશે. બીજી તરફ, લુકા મોડ્રિચ માટે આ તેમનો છેલ્લો વર્લ્ડ કપ સાબિત થયો છે અને આ હાર સાથે ક્રોએશિયાનો અભિયાન સમાપ્ત થયો છે. મેચ બાદ રોનાલ્ડોએ પોતાના પૂર્વ રિયલ મેડ્રિડ સાથી મોડ્રિચને ગળે લગાવી ભાવુક ક્ષણ સર્જી હતી.
