જોન એરિયાસના વહેલા ગોલે અપાવી જીત; હવે 8 જુલાઈએ સ્વિટ્ઝરલેન્ડ સામે થશે ટક્કર
નવી દિલ્હી
ફિફા વર્લ્ડ કપ 2026માં શાનદાર ફોર્મમાં રહેલી કોલંબિયાની ટીમે પોતાનો અજેય અભિયાન યથાવત રાખતાં પ્રી-ક્વાર્ટર ફાઇનલમાં સ્થાન મેળવી લીધું છે. રાઉન્ડ ઓફ 32ની મેચમાં કોલંબિયાએ ઘાનાને 1-0થી હરાવી અંતિમ 16માં પ્રવેશ કર્યો. કેન્સાસ સિટી સ્ટેડિયમમાં રમાયેલી આ મેચમાં કોલંબિયાએ શરૂઆતથી જ આક્રમક રમતનું પ્રદર્શન કર્યું અને સમગ્ર મેચ દરમિયાન ઘાના પર દબાણ જાળવી રાખ્યું.
14મી મિનિટે જોન એરિયાસે નોંધાવ્યો નિર્ણાયક ગોલ
મેચની 14મી મિનિટે જોન એરિયાસે લુઇસ જાવિયર સુઆરેઝના સુંદર પાસને ગોલમાં ફેરવી કોલંબિયાને મહત્વપૂર્ણ લીડ અપાવી હતી. પ્રથમ હાફમાં કોલંબિયાએ લીડ બમણી કરવાની અનેક તક ઊભી કરી હતી. લુઇસ ડિયાઝનો શક્તિશાળી શોટ લક્ષ્યથી થોડો બહાર ગયો હતો, જ્યારે જોહાન મોજિકાના હેડરને ઘાનાના ગોલકીપર લોરેન્સ અતી-ઝિગીએ શાનદાર બચાવ કરીને ગોલ બનતો અટકાવ્યો હતો.
બીજા હાફમાં પણ કોલંબિયાનું જ વર્ચસ્વ
બીજા હાફમાં પણ કોલંબિયાએ મેચ પર સંપૂર્ણ નિયંત્રણ જાળવી રાખ્યું હતું. 56મી મિનિટે લુઇસ ડિયાઝે બોલને જાળમાં પહોંચાડ્યો હતો, પરંતુ ઓફસાઇડના કારણે ગોલ અમાન્ય જાહેર થયો હતો. ત્યારબાદ પણ કોલંબિયાએ સતત હુમલાઓ કર્યા, પરંતુ બીજો ગોલ કરવામાં સફળતા મળી નહોતી.
ઘાનાને એક પણ અસરકારક તક મળી નહીં
ઘાનાની ટીમ આખી મેચ દરમિયાન કોલંબિયાની મજબૂત ડિફેન્સ લાઇનને તોડી શકી નહોતી. ખાસ વાત એ રહી કે ઘાનાનો એક પણ શોટ ગોલપોસ્ટની વચ્ચે એટલે કે ‘ઓન ટાર્ગેટ’ રહ્યો નહોતો. અંતિમ ક્ષણોમાં કોલંબિયાએ સંયમપૂર્વક રક્ષણાત્મક રમત અપનાવી પોતાની સરસાઈ જાળવી રાખી અને ઘાનાને બરાબરી કરવાનો કોઈ મોટો મોકો આપ્યો નહીં.
હવે સ્વિટ્ઝરલેન્ડ સામે થશે મુકાબલો
આ જીત સાથે કોલંબિયાએ રાઉન્ડ ઓફ 16માં સ્થાન પાક્કું કર્યું છે. હવે તેનો આગામી મુકાબલો 8 જુલાઈએ વેન્કુવરમાં સ્વિટ્ઝરલેન્ડ સામે રમાશે. સ્વિટ્ઝરલેન્ડે પોતાના અગાઉના મુકાબલામાં અલ્જીરિયાને 2-0થી હરાવી પ્રી-ક્વાર્ટર ફાઇનલમાં પ્રવેશ કર્યો હતો. બંને ટીમો અત્યાર સુધી ટૂર્નામેન્ટમાં મજબૂત પ્રદર્શન કરી રહી હોવાથી આ મુકાબલો રોમાંચક બનવાની અપેક્ષા છે.
