AMCA માટે સ્વદેશી યુદ્ધ એન્જિન: રિલાયન્સ અને રોલ્સ-રોયસ વચ્ચે વ્યૂહાત્મક ભાગીદારીની જાહેરાત

ભારતમાં એરોસ્પેસ ગેસ ટર્બાઇન કોમ્પ્લેક્સ વિકસાવવાની દિશામાં બંને કંપનીઓ આગળ વધશે; ડિઝાઇનથી લઈને ઉત્પાદન અને થ્રુ-લાઈફ સપોર્ટ સુધીની ક્ષમતાઓ વિકસાવવાનો લક્ષ્યાંક

લંડન/મુંબઈ

ભારતના એડવાન્સ્ડ મીડિયમ કોમ્બેટ એરક્રાફ્ટ (AMCA) કાર્યક્રમને સ્વદેશી એન્જિન ક્ષમતા આપવાની દિશામાં મહત્વપૂર્ણ પગલું ભરાયું છે. રિલાયન્સ ઇન્ડસ્ટ્રીઝ લિમિટેડ અને વૈશ્વિક એન્જિનિયરિંગ કંપની રોલ્સ-રોયસે AMCA માટે સાર્વભૌમ સ્વદેશી યુદ્ધ એન્જિનની ડિઝાઇન, વિકાસ, ઉત્પાદન અને ડિલિવરી માટે ભાગીદારી કરવાની વ્યૂહાત્મક ઇચ્છાની જાહેરાત કરી છે. આ સહયોગ ભારતની અદ્યતન એરોસ્પેસ અને ડિફેન્સ મેન્યુફેક્ચરિંગ ક્ષમતાને વધુ મજબૂત બનાવવાની દિશામાં મહત્વપૂર્ણ માનવામાં આવી રહ્યો છે.

ભારતમાં એરોસ્પેસ ગેસ ટર્બાઇન કોમ્પ્લેક્સની યોજના

ભાગીદારી હેઠળ બંને કંપનીઓ ભારતમાં સમર્પિત એરોસ્પેસ ગેસ ટર્બાઇન કોમ્પ્લેક્સ સ્થાપવાની તકો શોધશે. આ કોમ્પ્લેક્સને પાવર અને પ્રોપલ્શન ટેક્નોલોજી માટે ઉત્કૃષ્ટતા કેન્દ્ર તરીકે વિકસાવવાનો ઉદ્દેશ છે. અહીં યુદ્ધ વિમાનના એન્જિન સાથે જોડાયેલી ડિઝાઇન, વિકાસ, ઉત્પાદન, પરીક્ષણ અને જાળવણી જેવી વિવિધ ક્ષમતાઓને એક જ ઇકોસિસ્ટમમાં વિકસાવવાની દિશામાં કામ કરવામાં આવશે.

વૈશ્વિક ટેક્નોલોજી અને ભારતીય ઔદ્યોગિક ક્ષમતાનું જોડાણ

આ ભાગીદારીમાં રોલ્સ-રોયસની અદ્યતન એન્જિનિયરિંગ અને એરો-ઇન્જિન ટેક્નોલોજી સાથે રિલાયન્સની ટેક્નોલોજી, ઉત્પાદન, ઔદ્યોગિક માળખું અને મોટા પાયે અમલીકરણની ક્ષમતાને જોડવામાં આવશે. બંને કંપનીઓના મતે, આ સંયોજન ભારતમાં AMCA એન્જિનના સંયુક્ત વિકાસ માટે મજબૂત આધાર ઊભો કરી શકે છે.

અનંત અંબાણીએ શું કહ્યું?

રિલાયન્સ ઇન્ડસ્ટ્રીઝના એક્ઝિક્યુટિવ ડિરેક્ટર અનંત અંબાણીએ જણાવ્યું કે ભારતની વ્યૂહાત્મક સ્વાયત્તતા માટે અત્યાધુનિક ટેક્નોલોજીમાં સાર્વભૌમ ક્ષમતા જરૂરી છે. તેમણે કહ્યું કે રોલ્સ-રોયસની અદ્યતન પ્રોપલ્શન ક્ષેત્રની કુશળતા અને રિલાયન્સની ટેક્નોલોજી તથા ઉત્પાદન ક્ષમતાને જોડીને ભારતમાં સ્વદેશી એરો-એન્જિન ઇકોસિસ્ટમ ઊભી કરવાનો પ્રયાસ કરવામાં આવશે. તેમનો ઉદ્દેશ ભારતને આત્મનિર્ભર બનાવવાની સાથે અદ્યતન પ્રોપલ્શન ટેક્નોલોજીમાં વૈશ્વિક સ્તરે સ્પર્ધાત્મક બનાવવાનો છે.

રોલ્સ-રોયસના CEOનું નિવેદન

રોલ્સ-રોયસના CEO તુફાન એર્ગિનબિલિચએ આ ભાગીદારીને મહત્વપૂર્ણ તક ગણાવી હતી. તેમણે જણાવ્યું કે રોલ્સ-રોયસની અદ્યતન એન્જિનિયરિંગમાં લાંબા સમયની કુશળતાને ભારતીય ઉદ્યોગની સ્વદેશી ક્ષમતાઓ સાથે જોડવાથી દેશમાં મજબૂત અને આત્મનિર્ભર એરોસ્પેસ ઇકોસિસ્ટમ ઊભી કરવામાં મદદ મળશે.

ડિઝાઇનથી થ્રુ-લાઈફ સપોર્ટ સુધી ક્ષમતા

પ્રસ્તાવિત સહયોગનો વ્યાપ માત્ર એન્જિન ઉત્પાદન પૂરતો મર્યાદિત નહીં રહે. ડિઝાઇન, વિકાસ, ઉત્પાદન, પરીક્ષણ, પ્રોડક્શન અને સમગ્ર જીવનચક્ર દરમિયાન સપોર્ટ એટલે કે થ્રુ-લાઈફ સપોર્ટ સુધીની એન્ડ-ટુ-એન્ડ ભારતીય ક્ષમતા વિકસાવવાનો લક્ષ્યાંક છે. આ સાથે સંરક્ષણ ઉપરાંત નાગરિક એરોસ્પેસ તેમજ નવી પાવર અને પ્રોપલ્શન સિસ્ટમ્સમાં પણ સહયોગની સંભાવનાઓ શોધવામાં આવશે.

‘આત્મનિર્ભર ભારત’ને મળશે વેગ

આ ભાગીદારી ભારત સરકારના ‘આત્મનિર્ભર ભારત’ અને સ્વદેશી રક્ષણ ઉત્પાદનના વિઝનને ટેકો આપી શકે છે. AMCA જેવા અદ્યતન ફાઇટર જેટ માટે સ્વદેશી એન્જિન ક્ષમતા વિકસાવવાથી ભારતની વ્યૂહાત્મક સ્વાયત્તતા વધારવા ઉપરાંત દેશમાં અદ્યતન એરોસ્પેસ ટેક્નોલોજી, સંશોધન, ઉત્પાદન અને સપ્લાય ચેઇનનું ઇકોસિસ્ટમ વિકસાવવાની નવી તકો ઊભી થઈ શકે છે.