ગાંધીનગરને 3-2થી હરાવી અમદાવાદે સબ-જૂનિયર બોયઝ ઇન્ટર-ડિસ્ટ્રિક્ટ ફૂટબોલ ટુર્નામેન્ટ-2026ની ટ્રોફી જીતી; પટેલ માનવે ફાઇનલમાં હેટ્રિક ફટકારી
ગાંધીનગર:
ગુજરાત સ્ટેટ ફૂટબોલ એસોસિએશન (GSFA) દ્વારા આયોજિત સબ-જૂનિયર બોયઝ ઇન્ટર-ડિસ્ટ્રિક્ટ ફૂટબોલ ટુર્નામેન્ટ-2026ની ફાઇનલમાં અમદાવાદ જિલ્લા ટીમે શાનદાર પ્રદર્શન કરતાં ગાંધીનગર જિલ્લાની ટીમને 3-2થી હરાવી ચેમ્પિયનશિપ પોતાના નામે કરી છે. ફાઇનલ મુકાબલામાં અમદાવાદના સ્ટ્રાઈકર પટેલ માને અદભૂત હેટ્રિક નોંધાવી ટીમની જીતમાં મહત્વની ભૂમિકા ભજવી હતી. બીજી તરફ, ગુજરાત સુપર લીગ-3નો પણ 1 સપ્ટેમ્બરથી અમદાવાદના ટ્રાન્સસ્ટેડિયા ખાતે ભવ્ય પ્રારંભ થયો છે.
ફાઇનલમાં અમદાવાદ અને ગાંધીનગર વચ્ચે રોમાંચક મુકાબલો
2 સપ્ટેમ્બરે રમાયેલી સબ-જૂનિયર બોયઝ ઇન્ટર-ડિસ્ટ્રિક્ટ ફૂટબોલ ટુર્નામેન્ટની ફાઇનલમાં અમદાવાદ અને ગાંધીનગર વચ્ચે શરૂઆતથી જ કાંટે કી ટક્કર જોવા મળી હતી. પ્રથમ હાફના અંતે અમદાવાદે 2-1ની લીડ મેળવી હતી. અમદાવાદ તરફથી પટેલ માને બે ગોલ નોંધાવ્યા હતા, જ્યારે ગાંધીનગર તરફથી વિષ્ણુ કરીરે 15મી મિનિટે ગોલ કરીને ટીમને મુકાબલામાં જાળવી રાખી હતી.
બીજા હાફમાં બરાબરી બાદ અમદાવાદનો નિર્ણાયક ગોલ
બીજા હાફમાં ગાંધીનગરની ટીમે જોરદાર વાપસી કરી હતી. 49મી મિનિટે અલમાન મન્સૂરીએ ગોલ કરીને સ્કોર 2-2થી બરાબર કરી દીધો હતો. ત્યારબાદ બંને ટીમોએ વિજય માટે આક્રમક રમત દર્શાવી હતી. મેચની 83મી મિનિટે અમદાવાદના પટેલ માને ફરી એક વખત બોલને ગોલપોસ્ટમાં પહોંચાડીને હેટ્રિક પૂર્ણ કરી હતી અને અમદાવાદને 3-2ની નિર્ણાયક લીડ અપાવી હતી. અંતે આ જ સ્કોર સાથે અમદાવાદે ચેમ્પિયનશિપ જીતી હતી.
વિજેતા ટીમોને ટ્રોફી અને મેડલ એનાયત
ફાઇનલ બાદ બંને ટીમોના ખેલાડીઓને ટ્રોફી અને મેડલ એનાયત કરવામાં આવ્યા હતા. ગુજરાત સ્ટેટ ફૂટબોલ એસોસિએશનના હોદ્દેદારો મૂળરાજસિંહ ચુડાસમા, સપત શાહ, જતિન ભાવસાર, નટવરસિંહ સિસોદિયા, ક્રીનેશ, જગ્ગી સહિતના આગેવાનોની ઉપસ્થિતિમાં ખેલાડીઓને સન્માનિત કરવામાં આવ્યા હતા. આ ટુર્નામેન્ટમાંથી ગુજરાતની નેશનલ ટીમના કેમ્પ માટે 25 ખેલાડીઓ અને 15 સ્ટેન્ડબાય ખેલાડીઓની પસંદગી પણ કરવામાં આવનાર છે.
ગુજરાત સુપર લીગ-3નો ભવ્ય પ્રારંભ
અગાઉ ગુજરાત સ્ટેટ ફૂટબોલ એસોસિએશન દ્વારા આયોજિત ગુજરાત સુપર લીગ-3નો 1 સપ્ટેમ્બર, 2026થી એકા અરેના ફૂટબોલ ગ્રાઉન્ડ, ટ્રાન્સસ્ટેડિયા, અમદાવાદ ખાતે શાનદાર પ્રારંભ થયો છે. લીગમાં છ ફ્રેન્ચાઇઝી ટીમો ભાગ લઈ રહી છે, જેમાં અમદાવાદ એવેન્જર્સ, ગાંધીનગર જાયન્ટ્સ, કર્ણાવતી નાઇટ્સ, સૌરાષ્ટ્ર સ્પાર્ટન્સ, સુરત સ્ટ્રાઈકર્સ અને વડોદરા વોરિયર્સનો સમાવેશ થાય છે. ટીમોમાં ગુજરાત તેમજ ગુજરાત બહારના પ્રતિભાશાળી ખેલાડીઓનો સમાવેશ કરવામાં આવ્યો છે.
ગાંધીનગર જાયન્ટ્સની વિજયી શરૂઆત
લીગની પ્રથમ મેચ ગાંધીનગર જાયન્ટ્સ અને કર્ણાવતી નાઇટ્સ વચ્ચે રમાઈ હતી. પ્રથમ હાફમાં બંને ટીમો વચ્ચે જોરદાર ટક્કર છતાં કોઈ ગોલ થયો નહોતો. બીજા હાફમાં ગાંધીનગર જાયન્ટ્સના પેનલ્ટી એરિયામાં આવેલા બોલને ડિફેન્ડરે ક્લિયર કરતાં બોલ જર્સી નંબર 73 ધરાવતા પલાશ બાર્બરને મળ્યો હતો. પલાશે સુંદર ફિનિશિંગ સાથે ગોલ કરીને ગાંધીનગરને 1-0ની સરસાઈ અપાવી હતી. અંતે ગાંધીનગર જાયન્ટ્સે 1-0થી મેચ જીતી હતી. શાનદાર પ્રદર્શન બદલ પલાશ બાર્બરને મેન ઓફ ધ મેચ જાહેર કરવામાં આવ્યો હતો.
AIFFના ડેપ્યુટી સેક્રેટરી જનરલની ઉપસ્થિતિ
ગુજરાત સુપર લીગ-3ની ઓપનિંગ સેરેમની દરમિયાન છ ટીમોના ઓનર અને કેપ્ટન સાથે ઓલ ઈન્ડિયા ફૂટબોલ ફેડરેશન (AIFF)ના ડેપ્યુટી સેક્રેટરી જનરલ એમ. સત્યનારાયણ સહિત ઉપસ્થિત મહેમાનોનો ગુજરાત સ્ટેટ ફૂટબોલ એસોસિએશનના સેક્રેટરી મૂળરાજસિંહ ચુડાસમાએ પરિચય કરાવ્યો હતો. લીગની ફાઇનલ 13 સપ્ટેમ્બર, 2026ના રોજ રમાશે.
