મેગ્નસ કાર્લસને સિન્દારોવનો વિજયરથ રોક્યો, વિદિત ગુજરાથીએ ડુબોવને હરાવી પાઇપર્સને 9-7થી જીત અપાવી
બેંગલુરુ
ગ્લોબલ ચેસ લીગ (GCL)ની પેનલ્ટિમેટ રાઉન્ડમાં ડિફેન્ડિંગ ચેમ્પિયન Alpine APL Pipersએ ટોચના બે ટીમો વચ્ચેના રોમાંચક મુકાબલામાં FYERS American Gambitsને 9-7થી હરાવ્યું છે. ટેક મહિન્દ્રા અને FIDEની સંયુક્ત પહેલ એવા GCLમાં વિશ્વના નંબર-1 ખેલાડી મેગ્નસ કાર્લસન અને ભારતીય ગ્રાન્ડમાસ્ટર વિદિત ગુજરાથીએ ટીમની જીતમાં મહત્વની ભૂમિકા ભજવી હતી.
કાર્લસને સિન્દારોવની સતત ત્રણ જીતનો અંત આણ્યો
આ મુકાબલા પહેલાં Pipers અને American Gambits બંને સમાન મેચ પોઇન્ટ તથા ગેમ પોઇન્ટ સાથે આગળ વધી રહ્યા હતા. ફાઇનલમાં સ્થાન મેળવવાની દોડમાં આ મેચ બંને ટીમો માટે અત્યંત મહત્વની હતી. આઇકોન બોર્ડ પર કાર્લસને 2026ના કૅન્ડિડેટ્સ વિજેતા જવાખિર સિન્દારોવ સામે શરૂઆતથી જ રમત પર નિયંત્રણ જાળવી રાખ્યું હતું. 36 ચાલ બાદ સિન્દારોવે શરણાગતિ સ્વીકારતાં કાર્લસને તેના સતત ત્રણ જીતના સિલસિલાનો અંત લાવ્યો.
કાર્લસનને પ્લેયર ઓફ ધ મેચનો એવોર્ડ આપવામાં આવ્યો. જીત બાદ કાર્લસને પોતાની ટીમના પ્રદર્શનને શ્રેષ્ઠ ગણાવ્યું અને કહ્યું કે તેની મેચમાં સિન્દારોવે સારો પ્રતિકાર કર્યો હતો, પરંતુ અંતે તે જીત મેળવવામાં સફળ રહ્યો. કાર્લસને એ પણ જણાવ્યું કે ટ્રોફી માટે વિદિત વધુ હકદાર છે અને એવોર્ડની ટ્રોફી ભારતીય ગ્રાન્ડમાસ્ટરને સોંપી હતી.
વિદિતે ડુબોવને હરાવી ટીમની જીત પાકી કરી
સુપરસ્ટાર મેન બોર્ડ પર વિદિત ગુજરાથી અને દાનિલ ડુબોવ વચ્ચેની મેચ અત્યંત લાંબી અને રોમાંચક રહી હતી. રમત દરમિયાન ટાઇમ સ્ક્રેમ્બલની સ્થિતિ સર્જાઈ હતી, પરંતુ વિદિતે શાંત મનથી રમત આગળ ધપાવી હતી. વધારાના ઘોડા અને પ્યાદાનો લાભ લેતાં તેણે ડુબોવના હાથી સામે પોતાની સ્થિતિ મજબૂત બનાવી અને 96 ચાલની લાંબી લડાઈ બાદ વિજય મેળવ્યો.
વિદિતની જીતે Pipersની જીતને સીલ કરી દીધી અને ટીમે American Gambits સામે ફરી એક વખત સંપૂર્ણ વર્ચસ્વ દર્શાવ્યું.
દિવ્યા દેશમુખની સમયના દબાણમાં હાર
ભારતીય મહિલા વર્લ્ડ કપ વિજેતા દિવ્યા દેશમુખ માટે GCLની ડેબ્યૂ સિઝનનો સંઘર્ષ ચાલુ રહ્યો. શુક્રવારની મેચમાં તે Bibisara Assaubayeva સામે 34મી ચાલે સમય પૂરો થતાં હારી ગઈ હતી. Pipers માટે આ મેચમાં તે એકમાત્ર હાર રહી હતી.
વિદિતે મેચ બાદ જણાવ્યું કે મુકાબલો ખૂબ જ નજીકનો હતો અને શરૂઆતમાં ટીમ સ્પષ્ટ રીતે જીતની સ્થિતિમાં ન હતી. જોકે, પોતે સારી રમત રમ્યાનો સંતોષ વ્યક્ત કરતાં તેણે ટીમ માટે જીત મેળવી શકી તે મહત્વનું ગણાવ્યું.
ટ્રિવેની કોન્ટિનેન્ટલ કિંગ્સની 13-7થી ધમાકેદાર જીત
દિવસની બીજી મેચમાં બે વખતની ચેમ્પિયન Triveni Continental Kingsએ PBG Alaskan Knightsને 13-7થી હરાવીને પોતાની તાકાત સાબિત કરી. સુપરસ્ટાર મહિલા બોર્ડ પર Zhu Jinerએ Kateryna Lagnoને 44 ચાલમાં હરાવી ટૂર્નામેન્ટની પોતાની પ્રથમ જીત નોંધાવી. Alexandra Kosteniukએ Nino Batsiashviliની ભૂલનો લાભ ઉઠાવી જીત મેળવી.
પ્રોડિજી બોર્ડ પર Pranav Venkateshએ Abhimanyu Mishraને 42 ચાલ બાદ શરણાગતિ સ્વીકારવા મજબૂર કર્યો. કોન્ટિનેન્ટલ કિંગ્સે બ્લેક મોહરાથી ત્રણ જીત મેળવી કુલ 12 પોઇન્ટ મેળવ્યા.
બીજી તરફ Alaskan Knights માટે Arjun Erigaisiએ Wei Yi સામે અને 15 વર્ષના Yagiz Kaan Erdogmusએ Aravindh Chithambaram સામે જીત મેળવી હતી, પરંતુ આ જીતો ટીમને ફાઇનલની દોડમાં આગળ વધારવા માટે પૂરતી સાબિત થઈ નહોતી.
