દાઉદ ઇબ્રાહિમને કરાચીમાં મારવાની યોજના! પૂર્વ IPS રાજેશ પાંડેનો મોટો દાવો

કરાચી સુધી પહોંચી ગયા હતા શૂટર્સ, પરંતુ માહિતી લીક થતાં ઓપરેશન થયું નિષ્ફળ; નેપાળના મિર્ઝા દિલશાદ બેગે કરી હતી મુખબિરીનો દાવો

લખનઉ:

ઉત્તર પ્રદેશના પૂર્વ IPS અધિકારી રાજેશ પાંડે દ્વારા અંડરવર્લ્ડ ડોન દાઉદ ઇબ્રાહિમને લઈને મોટો દાવો કરવામાં આવ્યો છે. એક પોડકાસ્ટ દરમિયાન તેમણે જણાવ્યું હતું કે દાઉદ ઇબ્રાહિમને પાકિસ્તાનના કરાચીમાં જ ઠાર કરવાની યોજના બનાવવામાં આવી હતી. આ માટે શૂટર્સ પણ કરાચી પહોંચી ગયા હતા, પરંતુ ઓપરેશનની માહિતી લીક થઈ જતાં આખી યોજના નિષ્ફળ ગઈ હતી. રાજેશ પાંડેના જણાવ્યા અનુસાર, આ માહિતી નેપાળના મિર્ઝા દિલશાદ બેગે લીક કરી હતી.

પોડકાસ્ટમાં પૂર્વ IPS અધિકારીએ કર્યો દાવો

ન્યૂઝ ચેનલ ‘ભારત સમાચાર’ સાથેના પોડકાસ્ટમાં રાજેશ પાંડેએ દાઉદ ઇબ્રાહિમ સંબંધિત અનેક દાવા કર્યા હતા. તેમના કહેવા મુજબ, દાઉદને કરાચીમાં નિશાન બનાવવાની યોજના અંગે મિર્ઝા દિલશાદ બેગે મુખબિરી કરી હતી. આ ઓપરેશન નિષ્ફળ ગયા બાદ નેપાળમાં પૂર્વ સાંસદ મિર્ઝા દિલશાદ બેગની હત્યા કરવામાં આવી હતી.

રાજેશ પાંડેએ એવો પણ દાવો કર્યો હતો કે બબલુ શ્રીવાસ્તવે તેમની સામે મિર્ઝા દિલશાદ બેગની હત્યા અંગે કબૂલાત કરી હતી. જોકે, આ તમામ બાબતોને પૂર્વ IPS અધિકારી દ્વારા કરવામાં આવેલા દાવા તરીકે જ જોવી જરૂરી છે.

1993ના મુંબઈ બ્લાસ્ટ બાદ દાઉદ પાકિસ્તાન ભાગ્યો હોવાનો દાવો

રાજેશ પાંડેના જણાવ્યા અનુસાર, 1993ના મુંબઈ સિરિયલ બ્લાસ્ટ બાદ ટીવી પર દાઉદ ઇબ્રાહિમે હુમલા કરાવ્યાના અહેવાલો આવવા લાગ્યા હતા. ત્યારબાદ ગેંગના કેટલાક લોકોએ દાઉદને આ અંગે પૂછપરછ કરી હતી. પાંડેએ દાવો કર્યો કે દાઉદે આ આરોપ નકારી કાઢ્યો હતો અને હુમલા ટાઇગર મેમને કરાવ્યા હોવાનું જણાવ્યું હતું.

તેમના જણાવ્યા મુજબ, ત્યારબાદ એક દિવસ અચાનક પાકિસ્તાનથી એક વિમાન આવ્યું અને દાઉદ ઇબ્રાહિમ, છોટા શકીલ તથા તેમની સાથે રહેલા કેટલાક લોકો પાકિસ્તાન જતા રહ્યા હતા. આ ફ્લાઇટ કરાચીથી દુબઈ આવી હતી અને ત્યાંથી તેમને લઈને આગળ ગઈ હતી.

દાઉદના જવાથી ગેંગમાં પડી બે ફાડ

પૂર્વ IPS અધિકારીના જણાવ્યા મુજબ, દાઉદે ગેંગના ઘણા સભ્યોના પાસપોર્ટ પોતાના પાસે રાખ્યા હતા. દાઉદ પાકિસ્તાન ભાગી ગયા બાદ જ્યારે અન્ય લોકો પાસપોર્ટ લેવા પહોંચ્યા ત્યારે તેમને ખબર પડી કે પાસપોર્ટ પણ દાઉદ સાથે લઈ ગયો હતો.

ત્યારબાદ ગેંગના કેટલાક સભ્યોએ કથિત રીતે બનાવટી પાસપોર્ટ તૈયાર કરાવ્યા અને અલગ-અલગ દેશોમાં જતા રહ્યા. પાંડેએ જણાવ્યું કે બબલુ શ્રીવાસ્તવ સિંગાપોર ગયો હતો, જ્યારે છોટા રાજન ઇન્ડોનેશિયા ગયો હતો. દાઉદે દેશ અને પોતાના સાથીઓ સાથે દગો કર્યો હોવાની લાગણી બાદ અંડરવર્લ્ડમાં ધ્રુવીકરણ વધ્યું હોવાનો પણ તેમણે દાવો કર્યો.

અરુણ ગવલીએ દાઉદના જીજાની હત્યા કરી હોવાનો દાવો

રાજેશ પાંડેએ જણાવ્યું કે 1994 સુધીમાં મુંબઈ બ્લાસ્ટમાં દાઉદની ભૂમિકા હોવાની વાત સ્પષ્ટ થઈ ગઈ હતી. તે સમયગાળામાં મહારાષ્ટ્રના રાજકારણમાં પણ મોટો બદલાવ આવ્યો હતો. તેમના જણાવ્યા મુજબ, 1994માં કોંગ્રેસ સરકાર દરમિયાન છોટા રાજન ગેંગના સભ્યોને નિશાન બનાવવામાં આવતા હતા, જ્યારે 1995માં શિવસેનાની સરકાર આવ્યા બાદ દાઉદ ગેંગના લોકો સામે કાર્યવાહી અને હત્યાઓની ઘટનાઓ વધી હતી.

તેમણે વધુમાં દાવો કર્યો કે બાલાસાહેબ ઠાકરેએ એક જાહેર સભામાં અરું ગવલીને લોકો સમક્ષ ઊભા રાખીને દાઉદથી ન ડરવાની વાત કરી હતી. ત્યારબાદ અરું ગવલીના ગેંગે દાઉદના સગા જીજા ઇબ્રાહિમ પારિકરની હત્યા કરી હોવાનો પણ રાજેશ પાંડેએ ઉલ્લેખ કર્યો હતો.

નોંધ: ઉપરોક્ત વિગતો પૂર્વ IPS અધિકારી રાજેશ પાંડેએ પોડકાસ્ટમાં કરેલા દાવાઓ પર આધારિત છે.