પરદા પાછળનો હીરો અમોલ મઝુમદાર: ખેલાડી તરીકે ટીમ ઈન્ડિયામાં સ્થાન ન મળ્યું, હવે કોચ બની ભારતને એશિયા કપ ચેમ્પિયન બનાવ્યું

ફર્સ્ટ ક્લાસ ક્રિકેટમાં 11 હજારથી વધુ રન છતાં આંતરરાષ્ટ્રીય ડેબ્યૂથી વંચિત રહ્યા, હવે મહિલા ટીમને સતત બે ઐતિહાસિક ખિતાબ અપાવ્યા

નવી દિલ્હી:

ક્રિકેટમાં સફળતા હંમેશા મેદાન પર રમનારા ખેલાડીઓના નામ સાથે જ જોડાય એવું જરૂરી નથી. કેટલીક વ્યક્તિઓ પર્દા પાછળ રહીને ટીમની જીતની કહાની લખે છે. ભારતીય ક્રિકેટમાં અમોલ મઝુમદાર તેનું ઉત્તમ ઉદાહરણ બનીને સામે આવ્યા છે. એક સમયે ફર્સ્ટ ક્લાસ ક્રિકેટમાં 11 હજારથી વધુ રન અને 30 સદી ફટકારવા છતાં ભારતીય પુરુષ ટીમમાં રમવાનું સપનું અધૂરું રહી ગયું હતું. જોકે, હવે એ જ અમોલ મઝુમદાર ભારતીય મહિલા ક્રિકેટ ટીમના મુખ્ય કોચ તરીકે સફળતાના નવા શિખરો સર કરી રહ્યા છે.

ખેલાડી તરીકે મહેનત છતાં ટીમ ઈન્ડિયામાં તક ન મળી

અમોલ મઝુમદાર વર્ષ 1994થી 2013 દરમિયાન મુંબઈ અને આસામ તરફથી ઘરેલુ ક્રિકેટ રમ્યા હતા. તેમણે ફર્સ્ટ ક્લાસ ક્રિકેટમાં 11 હજારથી વધુ રન બનાવ્યા હતા અને 30 વખત સદી ફટકારી હતી. તેમ છતાં ભારતીય પુરુષ ટીમના મજબૂત મિડલ ઓર્ડરમાં સ્થાન મેળવવા માટેની ભારે સ્પર્ધાને કારણે તેમને આંતરરાષ્ટ્રીય ક્રિકેટમાં ભારતનું પ્રતિનિધિત્વ કરવાની તક મળી નહોતી.

આ રીતે ભારતીય ટીમ માટે રમવાનું તેમનું સપનું અધૂરું રહી ગયું. જોકે, ખેલાડી તરીકે મળેલી નિરાશાને તેમણે પોતાની કારકિર્દીનો અંત બનવા દીધી નહીં. કોચ તરીકે તેમણે ક્રિકેટ સાથેનું પોતાનું જોડાણ વધુ મજબૂત બનાવ્યું.

2023માં મહિલા ટીમના મુખ્ય કોચ બન્યા

ઓક્ટોબર 2023માં ભારતીય ક્રિકેટ કંટ્રોલ બોર્ડ (BCCI)એ અમોલ મઝુમદારની ભારતીય મહિલા ક્રિકેટ ટીમના મુખ્ય કોચ તરીકે નિમણૂક કરી હતી. ત્યારથી તેમણે ટીમની રમત, વ્યૂહરચના અને ખેલાડીઓના આત્મવિશ્વાસ પર ખાસ ધ્યાન આપ્યું.

મઝુમદારના માર્ગદર્શન હેઠળ ભારતીય મહિલા ટીમે આંતરરાષ્ટ્રીય ક્રિકેટમાં નોંધપાત્ર સફળતા હાંસલ કરી છે. તેમની કોચિંગમાં ટીમે સતત બે મોટી સિદ્ધિઓ મેળવીને તેમની વ્યૂહાત્મક ક્ષમતાનો પરચો આપ્યો છે.

વર્લ્ડ કપ 2025 બાદ એશિયા કપ 2026માં પણ વિજય

અમોલ મઝુમદારની કોચિંગમાં ભારતીય મહિલા ટીમે 2025માં ભારતની ધરતી પર રમાયેલા વનડે વર્લ્ડ કપમાં ઐતિહાસિક સફળતા મેળવી હતી. ટીમ ઈન્ડિયાએ સેમિફાઇનલમાં ઓસ્ટ્રેલિયાને હરાવ્યા બાદ ફાઇનલમાં દક્ષિણ આફ્રિકાને પરાજય આપી પ્રથમ વખત વનડે વર્લ્ડ કપની ટ્રોફી પોતાના નામે કરી હતી.

હવે 2026ના મહિલા એશિયા કપમાં પણ ભારતે શાનદાર પ્રદર્શન કર્યું છે. દુબઈમાં રમાયેલી ફાઇનલમાં ભારતીય ટીમે શ્રીલંકાને 72 રનથી હરાવીને એશિયા કપનો ખિતાબ પોતાના નામે કર્યો. આ સાથે ભારતે આ ટૂર્નામેન્ટમાં આઠમી વખત ચેમ્પિયન બનવાની સિદ્ધિ મેળવી છે.

ટ્રોફી વિવાદમાં પણ ટીમ સાથે મજબૂતીથી ઊભા રહ્યા

એશિયા કપ જીત્યા બાદ ટ્રોફી સમારોહને લઈને પણ ચર્ચા થઈ હતી. ભારતીય ટીમે ACC અધ્યક્ષ મોહસિન નકવી પાસેથી ટ્રોફી સ્વીકારવાનો ઇનકાર કર્યો હતો. આ સમગ્ર ઘટનાક્રમ દરમિયાન અમોલ મઝુમદારે ટીમનો પક્ષ મજબૂતીથી રજૂ કર્યો હતો.

પ્રેસ કોન્ફરન્સમાં તેમણે જણાવ્યું હતું કે ટ્રોફી ન લેવાનો નિર્ણય BCCIનો હતો અને સમગ્ર ટીમ તેની સાથે છે. તેમણે સ્પષ્ટ કર્યું કે ભારત એશિયા કપ 2026નું ચેમ્પિયન છે અને તેમના માટે આ જ બાબત સૌથી વધુ મહત્વ ધરાવે છે.

ખેલાડી તરીકે અધૂરું સપનું, કોચ તરીકે ઐતિહાસિક સફળતા

અમોલ મઝુમદારની કહાની ભારતીય ક્રિકેટમાં સંઘર્ષ અને પુનરાગમનની પ્રેરણાદાયી કહાની બની છે. ખેલાડી તરીકે આંતરરાષ્ટ્રીય ક્રિકેટમાં પ્રવેશ ન મળી શક્યો, પરંતુ કોચ તરીકે તેમણે ભારતીય મહિલા ક્રિકેટને વિશ્વ અને એશિયા બંને સ્તરે ચેમ્પિયન બનાવવામાં મહત્વની ભૂમિકા ભજવી છે. મેદાન પર નહીં, પરંતુ પર્દા પાછળથી વ્યૂહરચના ઘડીને મઝુમદાર હવે ભારતીય ક્રિકેટની સફળતાના મહત્વપૂર્ણ શિલ્પી બનીને ઉભરી આવ્યા છે.