બોયઝ અને ગર્લ્સ વિભાગમાં ટોચના બે ખેલાડીઓ હૈદરાબાદમાં યોજાનારી નેશનલ ચેસ ચેમ્પિયનશિપમાં ગુજરાતનું પ્રતિનિધિત્વ કરશે
અમદાવાદ
ગુજરાત સ્ટેટ ચેસ એસોસિએશન દ્વારા ગુજરાત સ્ટેટ અન્ડર-15 (બોયઝ અને ગર્લ્સ) સિલેક્શન ફોર નેશનલ ચેસ ચેમ્પિયનશિપ-2026નું આયોજન 12 અને 13 સપ્ટેમ્બર દરમિયાન અમદાવાદ ખાતે કરવામાં આવ્યું હતું. બોયઝ વિભાગની સ્પર્ધા સ્પોર્ટ્સ ક્લબ ખાતે, જ્યારે ગર્લ્સ વિભાગની સ્પર્ધા રાઇફલ ક્લબ ખાતે યોજાઈ હતી. બે દિવસીય ટુર્નામેન્ટના અંતે બંને વિભાગમાં ટોચના પાંચ ખેલાડીઓના પરિણામો જાહેર કરવામાં આવ્યા હતા.
બોયઝ વિભાગમાં સમર્થ શ્રીની વરીયર પ્રથમ
બોયઝ વિભાગમાં સમર્થ શ્રીની વરીયરએ શાનદાર પ્રદર્શન કરીને કુલ 6.5 પોઈન્ટ સાથે પ્રથમ સ્થાન મેળવ્યું હતું. આરવ કુમાર 6 પોઈન્ટ સાથે બીજા ક્રમે રહ્યો હતો, જ્યારે વિયાન મખાણીએ 6 પોઈન્ટ સાથે ત્રીજું સ્થાન મેળવ્યું હતું.
બોયઝ વિભાગમાં હેરીન પટેલ અને જિયાન ગોંડલિયાએ 5.5-5.5 પોઈન્ટ મેળવીને અનુક્રમે ચોથું અને પાંચમું સ્થાન મેળવ્યું હતું.
ગર્લ્સ વિભાગમાં અદિત્રી શોમનો વિજય
ગર્લ્સ વિભાગમાં અદિત્રી શોમએ 6.5 પોઈન્ટ સાથે પ્રથમ સ્થાન હાંસલ કર્યું હતું. ખનક કાપડિયા 6 પોઈન્ટ સાથે બીજા ક્રમે રહી હતી. આશ્વી સિંઘએ 5.5 પોઈન્ટ સાથે ત્રીજું સ્થાન મેળવ્યું હતું.
આ ઉપરાંત વેદાંતિકા ચૌધરીએ 5.5 પોઈન્ટ સાથે ચોથું અને માન્યા બાલાણીએ 5 પોઈન્ટ સાથે પાંચમું સ્થાન મેળવ્યું હતું.
વિજેતાઓને ટ્રોફી અને રોકડ ઈનામ
બંને વિભાગમાં પ્રથમ પાંચ સ્થાન મેળવનાર ખેલાડીઓને ટ્રોફી ઉપરાંત કુલ રૂ.13,000ના રોકડ ઈનામોથી સન્માનિત કરવામાં આવ્યા હતા. ગુજરાત સ્ટેટ ચેસ એસોસિએશનના ભાવેશ પટેલ દ્વારા વિજેતા ખેલાડીઓને ટ્રોફી અને ઈનામો અર્પણ કરવામાં આવ્યા હતા.
ટોચના બે ખેલાડીઓ રાષ્ટ્રીય સ્પર્ધામાં ગુજરાતનું પ્રતિનિધિત્વ કરશે
બોયઝ અને ગર્લ્સ બંને વિભાગમાંથી પ્રથમ બે સ્થાન મેળવનાર ખેલાડીઓ હવે હૈદરાબાદ ખાતે યોજાનારી નેશનલ અન્ડર-15 ચેસ ટુર્નામેન્ટમાં ગુજરાત રાજ્યનું પ્રતિનિધિત્વ કરશે. આ પસંદગી સાથે રાજ્યના યુવા ચેસ ખેલાડીઓને રાષ્ટ્રીય સ્તરે પોતાની પ્રતિભા દર્શાવવાની તક મળશે.
