અમદાવાદમાં વેસ્ટર્ન એશિયન જુનિયર અને યુથ ચેસ ચેમ્પિયનશિપનો પ્રારંભ: છ દેશોના ખેલાડીઓ વચ્ચે ટક્કર થશે

22થી 31 ઓક્ટોબર દરમિયાન રાજપથ ક્લબ ખાતે સ્પર્ધાનું આયોજન; સ્ટાન્ડર્ડ, રેપિડ અને બ્લિટ્ઝ એમ ત્રણ ફોર્મેટમાં ખેલાડીઓ કૌશલ્ય અજમાવશે

અમદાવાદ

ગુજરાત સ્ટેટ ચેસ એસોસિએશનના આયોજન હેઠળ વેસ્ટર્ન એશિયન જુનિયર અને યુથ ચેસ ચેમ્પિયનશિપ 2026નો અમદાવાદના રાજપથ ક્લબ ખાતે ભવ્ય પ્રારંભ થયો છે. 22થી 31 ઓક્ટોબર દરમિયાન યોજાનારી આ ચેમ્પિયનશિપમાં ભારત સહિત છ દેશોના ખેલાડીઓ ભાગ લઈ રહ્યા છે. ભારત, શ્રીલંકા, નેપાળ, સીરિયા, ઓમાન અને સંયુક્ત આરબ અમીરાત (UAE)ના ખેલાડીઓ સ્ટાન્ડર્ડ, રેપિડ અને બ્લિટ્ઝ એમ ત્રણેય ફોર્મેટમાં પોતાની પ્રતિભા અને વ્યૂહાત્મક ક્ષમતાનું પ્રદર્શન કરશે.

આ ચેમ્પિયનશિપમાં જુનિયર કેટેગરી ખાસ આકર્ષણનું કેન્દ્ર બની છે. આ વિભાગમાં 2200 કે તેથી વધુ રેટિંગ ધરાવતા 14 ખેલાડીઓ ભાગ લઈ રહ્યા છે, જેના કારણે સ્પર્ધા અત્યંત રસપ્રદ બનવાની અપેક્ષા છે. અમદાવાદના સ્થાનિક ખેલાડી જીહાન તેજસ શાહ 2404 રેટિંગ સાથે જુનિયર કેટેગરીમાં સર્વોચ્ચ ક્રમાંકિત ખેલાડી તરીકે મેદાનમાં ઉતરશે.

સ્પર્ધાની મહત્તા વધારતી બાબત એ છે કે વિજેતા ખેલાડીઓને ગ્રાન્ડમાસ્ટર (GM) નોર્મ મેળવવાની તક ઉપરાંત સીધો ઇન્ટરનેશનલ માસ્ટર (IM) ટાઇટલ પ્રાપ્ત કરવાની તક પણ મળી શકે છે. આ ટાઇટલ માટેની પાત્રતા અને નિયમો અનુસાર જરૂરી શરતો પૂર્ણ કરનારા ખેલાડીઓ માટે આ ચેમ્પિયનશિપ કારકિર્દીમાં મહત્ત્વપૂર્ણ સિદ્ધિ હાંસલ કરવાની તક બની રહેશે. મહિલા ખેલાડીઓમાં ભારતની WIM અમુક્તા ગુંટાકા અગ્રણી ખેલાડી તરીકે ભાગ લઈ રહી છે.

અંડર-18 અને અંડર-16 કેટેગરીમાં ભારતીય ખેલાડીઓ પર નજર

અંડર-18 ઓપન કેટેગરીમાં ગુજરાતના સીએમ વેદાંત રૂપેશભાઈ વરસાડાને પ્રથમ ક્રમાંક આપવામાં આવ્યો છે, જ્યારે અંડર-18 ગર્લ્સ કેટેગરીમાં તમિલનાડુની શનમથિશ્રી ટોચના ક્રમાંકિત ખેલાડી તરીકે ભાગ લેશે. બંને ખેલાડીઓ પાસેથી સારા પ્રદર્શનની અપેક્ષા રાખવામાં આવી રહી છે.

અંડર-16 કેટેગરીમાં પણ મજબૂત ખેલાડીઓ વચ્ચે રસાકસી જોવા મળશે. ત્રિપુરાના એફએમ મહિર તનેજા અને એફએમ આર્શિયા દાસ ઉપરાંત દિલ્હીની પ્રિશિતા ગુપ્તા પર વિશેષ નજર રહેશે. પ્રિશિતા ગુપ્તાએ માત્ર ત્રણ દિવસ પહેલાં રાષ્ટ્રીય સબ-જુનિયર ચેમ્પિયનનો ખિતાબ જીત્યો હતો. આ સફળતાને પગલે આંતરરાષ્ટ્રીય મંચ પર તેમના પ્રદર્શન અંગે પણ ઉત્સુકતા છે.

ચેસ જગતના અગ્રણીઓની ઉપસ્થિતિમાં ઉદ્ઘાટન

ચેમ્પિયનશિપના ઉદ્ઘાટન પ્રસંગે ચેસ જગતના અનેક અગ્રણીઓ ઉપસ્થિત રહ્યા હતા. ઓલ ઇન્ડિયા ચેસ ફેડરેશનના સચિવ અને ગુજરાત સ્ટેટ ચેસ એસોસિએશનના પ્રમુખ દેવ પટેલ મુખ્ય મહેમાન તરીકે ઉપસ્થિત રહ્યા હતા. તેમની સાથે ગુજરાત સ્ટેટ ચેસ એસોસિએશનના ભૂતપૂર્વ ઉપપ્રમુખો જીએમ તેજસ બકરે અને મયુર પટેલ, જીએમ અંકિત રાજપરા, એસોસિએશનના ઉપપ્રમુખો જયેશ મોદી અને હેમલ ઠાનકી તથા ભાવેશ પટેલ ઉપસ્થિત રહ્યા હતા.

આ ઉપરાંત ઓલ ઇન્ડિયા ચેસ ફેડરેશનના સંયુક્ત સચિવ પ્રશાંત કુંડુ અને આર્બિટર્સ કમિશનના ચેરમેન આર. રાજેશ સહિતના અગ્રણીઓએ પણ કાર્યક્રમમાં હાજરી આપી હતી.