સેવા દરમિયાન ઘાયલ થયા, હવે દેશના જવાનો માટે દોડશે યુદ્ધના વીર સૈનિકો

29 નવેમ્બરે યોજાનારી અદાણી અમદાવાદ મેરેથોનમાં પ્રથમવાર વોર વાઉન્ડેડ ફાઉન્ડેશનના ચાર જવાનો લેશે ભાગ; ‘રન ફોર અવર સોલ્જર્સ’ પહેલ દ્વારા સૈન્યના જવાનોના કલ્યાણ માટે અપાશે યોગદાન

અમદાવાદ

દેશની સરહદો પર ફરજ બજાવતી વખતે ગંભીર રીતે ઘાયલ થયેલા ચાર ભૂતપૂર્વ સૈનિકો હવે અમદાવાદની સડકો પર દેશના જવાનોના સન્માન અને કલ્યાણ માટે દોડશે. આગામી 29 નવેમ્બરે યોજાનારી અદાણી અમદાવાદ મેરેથોનમાં પ્રથમવાર વોર વાઉન્ડેડ ફાઉન્ડેશન (WWF)ના જવાનોનું પ્રતિનિધિમંડળ ભાગ લેશે. આ ચારેય સૈનિકોએ પોતાની શારીરિક ઇજાઓ અને મુશ્કેલીઓ સામે હિંમતપૂર્વક લડીને જીવનમાં નવો માર્ગ બનાવ્યો છે. તેમની કહાની સંઘર્ષ, સંકલ્પ અને અદમ્ય મનોબળનું પ્રેરણાદાયી ઉદાહરણ છે.

ઘાયલ સૈનિકોને નવું જીવન આપવાનો પ્રયાસ

વર્ષ 2002થી વોર વાઉન્ડેડ ફાઉન્ડેશન શારીરિક રીતે દિવ્યાંગ બનેલા સૈનિકોને સહારો અને માર્ગદર્શન પૂરું પાડે છે. આ સંસ્થાના ચાર સભ્યો નાયક અશોક કુમાર, સુબેદાર સતબીર સિંહ ચૌહાણ, ભૂતપૂર્વ સિપાહી રાજેશ કુમાર અને ભૂતપૂર્વ ક્રાફ્ટ્સમેન નરેશ કુમાર મેરેથોનમાં ભાગ લઈને પોતાની હિંમત અને જીવન પ્રત્યેના સકારાત્મક અભિગમનો સંદેશ આપશે.

ઇજાઓને હરાવીને મેરેથોન દોડવીર બન્યા અશોક કુમાર

14 મહાર રેજિમેન્ટમાં ફરજ બજાવતા નાયક અશોક કુમાર 30 એપ્રિલ, 1994ના રોજ ભારતીય સેનામાં જોડાયા હતા. 11 ઓક્ટોબર, 2002ના રોજ જમ્મુ-કાશ્મીરના બટાલિક સેક્ટરમાં ઓપરેશન પરાક્રમ દરમિયાન દુશ્મનના મોર્ટાર હુમલામાં તેમના બંને પગ અને ડાબા ઘૂંટણમાં ગંભીર ઇજાઓ થઈ હતી. દિલ્હી અને પુણેમાં સારવાર બાદ તેમણે ફરી ચાલવાનું શરૂ કર્યું. ત્યારબાદ વજન ઘટાડવા અને શારીરિક તંદુરસ્તી પાછી મેળવવા માટે શિસ્તબદ્ધ જીવનશૈલી અપનાવી. આજે તેઓ સમાજસેવક, ફાઉન્ડેશનના સ્વયંસેવક અને નિયમિત મેરેથોન દોડવીર છે.

અશોક કુમારે જણાવ્યું કે ઇજા બાદ શારીરિક પુનર્વસન કરતાં પણ માનસિક મુશ્કેલીઓ અને જીવનમાં આગળ શું કરવું તે પ્રશ્ન વધુ પડકારજનક હતો. ફાઉન્ડેશનના સહકારથી તેમને નવી દિશા મળી. તેઓ કહે છે કે દિવ્યાંગતાને પણ ક્ષમતામાં ફેરવી શકાય છે અને કોઈએ ક્યારેય આશા ગુમાવવી જોઈએ નહીં.

‘એકવાર સૈનિક, હંમેશા સૈનિક’ના મંત્ર સાથે સતબીર સિંહ

સુબેદાર સતબીર સિંહ ચૌહાણ 19 રાજપૂત રેજિમેન્ટમાં ફરજ દરમિયાન 22 ઓગસ્ટ, 2005ના રોજ ગંભીર રીતે ઘાયલ થયા હતા. તેમને હાડકાંમાં ફ્રેક્ચર અને ચેતાતંત્રને નુકસાન થયું હતું. તેમને જીવનભર માટે 100 ટકા દિવ્યાંગ જાહેર કરવામાં આવ્યા હતા. જોકે, આ મુશ્કેલીએ તેમનો જુસ્સો તોડ્યો નથી. આજે તેઓ સાહસિક પ્રવૃત્તિઓ અને મેરેથોનમાં નિયમિત ભાગ લે છે. તેમના મતે, ઇજાએ શરીર બદલ્યું છે, પરંતુ તેમની સૈનિક તરીકેની ઓળખ અને હિંમત નહીં.

એક પગ ગુમાવ્યો, પરંતુ દેશ માટેનો જુસ્સો નહીં

ભૂતપૂર્વ સિપાહી રાજેશ કુમાર મે, 1999માં 6 રાજપૂત રેજિમેન્ટમાં જોડાયા હતા. 6 એપ્રિલ, 2001ના રોજ ઓપરેશન રક્ષક દરમિયાન પૂંછ વિસ્તારમાં અકસ્માતે થયેલા એન્ટી-પર્સનલ માઇન વિસ્ફોટમાં તેમણે એક પગ ગુમાવ્યો હતો. તેમ છતાં તેમણે કુલ 26 વર્ષ સુધી સેનામાં સેવા આપી અને મે, 2025માં નિવૃત્ત થયા. સાથી સૈનિકો સાથે ચારથી પાંચ કિલોમીટરની દોડમાં ભાગ લઈને તેમણે મેડલ મેળવ્યા છે. તેમનાં બાળકોનો ઉત્સાહ તેમને સતત પ્રેરણા આપે છે.

દોડથી સકારાત્મકતા ફેલાવે છે નરેશ કુમાર

ભૂતપૂર્વ ક્રાફ્ટ્સમેન નરેશ કુમારને ઓગસ્ટ, 1999માં થયેલી ગંભીર વિસ્ફોટની ઇજાઓને કારણે સાંભળવામાં તકલીફ થઈ હતી. કાઉન્સેલિંગ, સહાય અને અન્ય ઘાયલ સૈનિકો સાથેના સંવાદથી તેમને નવું મનોબળ મળ્યું. દોડ હવે તેમના જીવનનો મહત્ત્વનો હિસ્સો છે. અનેક મેરેથોનમાં ભાગ લઈ તેઓ સકારાત્મકતાનો સંદેશ ફેલાવે છે.

‘રન ફોર અવર સોલ્જર્સ’ પહેલ બનશે પ્રેરણાનો આધાર

અદાણી અમદાવાદ મેરેથોનની #Run4OurSoldiers પહેલ હેઠળ નોંધણીની આવકનો એક હિસ્સો ભારતીય સશસ્ત્ર દળોના જવાનોના કલ્યાણ માટે ફાળવવામાં આવે છે. ગયા વર્ષે આ મેરેથોનમાં 3,000થી વધુ સંરક્ષણ કર્મચારીઓએ ભાગ લીધો હતો. આ વખતે ચાર ઘાયલ ભૂતપૂર્વ સૈનિકોની ભાગીદારી મેરેથોનને વિશેષ પ્રેરણાદાયી બનાવશે. 29 નવેમ્બરે તેઓ માત્ર દોડશે નહીં, પરંતુ દેશની સેવા કરતા જવાનો પ્રત્યે સન્માન, હિંમત અને ક્યારેય હાર ન માનવાનો સંદેશ પણ આપશે.