સરદાર પટેલની 151મી જન્મજયંતિએ 225 બાઈકચાલકોની રેલી બનશે વિશેષ આકર્ષણ; અમિત શાહ અને ભૂપેન્દ્ર પટેલે આપી લીલી ઝંડી
રાજપીપળા:
સરદાર વલ્લભભાઈ પટેલની 151મી જન્મજયંતિના અવસરે 31 ઓક્ટોબર, 2026ના રોજ નર્મદા જિલ્લાના એકતાનગર ખાતે યોજાનારી રાષ્ટ્રીય એકતા પરેડમાં આ વર્ષે ‘નશામુક્ત ભારત’નો સંદેશ વિશેષ આકર્ષણનું કેન્દ્ર બનશે. વડાપ્રધાન નરેન્દ્રભાઈ મોદીની ઉપસ્થિતિમાં યોજાનારી આ ભવ્ય ઉજવણીમાં ‘ફાઇટ અગેઇન્સ્ટ ડ્રગ્સ’ની થીમ હેઠળ દેશભરના પોલીસ અને સુરક્ષા દળોના 225 બાઈકચાલકોની રાષ્ટ્રીય રેલી યુવા પેઢીને નશાથી દૂર રહી સ્વસ્થ જીવન જીવવા અને રાષ્ટ્રનિર્માણમાં યોગદાન આપવા પ્રેરિત કરશે.
દિલ્હીથી એકતાનગર સુધી નશામુક્તિનો સંદેશ
દેશભરમાં નશામુક્તિ અંગે જનજાગૃતિ ફેલાવવાના ઉદ્દેશ સાથે શરૂ થયેલી આ રાષ્ટ્રીય બાઈક રેલીને કેન્દ્રીય ગૃહમંત્રી અમિત શાહે 21 ઓક્ટોબરે નવી દિલ્હીથી લીલી ઝંડી આપી પ્રસ્થાન કરાવ્યું હતું. ત્યારબાદ 25 ઓક્ટોબરે ગુજરાતના મુખ્યમંત્રી ભૂપેન્દ્રભાઈ પટેલે ગાંધીનગર સચિવાલય પરિસરમાંથી રેલીને આગળ વધારી હતી. વિવિધ શહેરો અને વિસ્તારોમાં નશામુક્તિનો સંદેશ પહોંચાડતી આ રેલી હવે 31 ઓક્ટોબરે એકતાનગરની રાષ્ટ્રીય એકતા પરેડમાં જોડાશે.
225 બાઈકચાલકો દ્વારા ‘એક ભારત, શ્રેષ્ઠ ભારત’નો સંદેશ
આ રાષ્ટ્રીય અભિયાનમાં દેશનાં વિવિધ રાજ્યો અને કેન્દ્રશાસિત પ્રદેશોના 225 બાઈકચાલકો જોડાયા છે. લદ્દાખ, જમ્મુ-કાશ્મીર, પંજાબ, દિલ્હી, ઉત્તર પ્રદેશ, રાજસ્થાન, મહારાષ્ટ્ર, કર્ણાટક, તેલંગાણા અને કેરળ સહિતનાં વિસ્તારોની પોલીસ ટીમો આ રેલીમાં સહભાગી બની છે.
આ ઉપરાંત CRPF, BSF, ITBP, NSG, NDRF અને CISF જેવા કેન્દ્રીય સુરક્ષા દળોના પ્રતિનિધિઓ પણ આ અભિયાનનો ભાગ બન્યા છે. વિવિધ ભાષાઓ, સંસ્કૃતિઓ અને પ્રદેશોનું પ્રતિનિધિત્વ કરતા આ જવાનો એક મંચ પર જોડાઈને ‘એક ભારત, શ્રેષ્ઠ ભારત’ની ભાવનાને મજબૂત બનાવશે. સરદાર પટેલના રાષ્ટ્રીય એકતાના સંદેશ સાથે નશામુક્તિના અભિયાનને જોડતી આ પહેલ સામાજિક જાગૃતિનું પણ પ્રતીક બની રહેશે.
‘Say No to Drugs, Say Yes to Life’ની પ્રેરણા
માદક પદાર્થોનું સેવન વ્યક્તિના સ્વાસ્થ્ય, પારિવારિક જીવન અને ભવિષ્ય પર ગંભીર અસર કરી શકે છે. ખાસ કરીને યુવા પેઢીને નશાના દૂષણથી દૂર રાખવી અને તેમને સકારાત્મક પ્રવૃત્તિઓ તરફ પ્રેરિત કરવી આજના સમયની મહત્ત્વપૂર્ણ જરૂરિયાત છે. ‘Say No to Drugs, Say Yes to Life’ના સંદેશ સાથે આ રેલી યુવાનોને સ્વસ્થ જીવનશૈલી અપનાવવા અને જવાબદાર નાગરિક બનવા પ્રેરણા આપશે.
આ અભિયાન એ પણ દર્શાવે છે કે પોલીસ અને સુરક્ષા દળોની ભૂમિકા માત્ર કાયદો અને વ્યવસ્થા જાળવવા પૂરતી સીમિત નથી, પરંતુ સમાજમાં જાગૃતિ લાવવા અને રાષ્ટ્રના ભવિષ્યને સુરક્ષિત બનાવવામાં પણ તેમનું મહત્ત્વપૂર્ણ યોગદાન છે.
એકતા પરેડમાં રેલી બનશે મુખ્ય આકર્ષણ
31 ઓક્ટોબરે એકતાનગર ખાતે યોજાનારી રાષ્ટ્રીય એકતા પરેડમાં માર્ચ પાસ્ટ, વિવિધ ઝાંખીઓ અને સાંસ્કૃતિક પ્રસ્તુતિઓ સાથે આ બાઈક રેલી પણ વિશેષ આકર્ષણ બની રહેશે. સરદાર પટેલની રાષ્ટ્રીય એકતાની વિરાસતને નશામુક્ત ભારતના સંકલ્પ સાથે જોડતી આ પહેલ દેશના યુવાનોને નશાથી દૂર રહેવા, સ્વસ્થ જીવન જીવવા અને રાષ્ટ્રની પ્રગતિમાં સક્રિય યોગદાન આપવા પ્રેરિત કરશે.
આમ, એકતાનગરની રાષ્ટ્રીય એકતા પરેડ-2026માં ‘નશામુક્ત ભારત’નો સંદેશ માત્ર એક અભિયાન પૂરતો નહીં, પરંતુ યુવા પેઢી અને સમગ્ર સમાજ માટે સ્વસ્થ, સુરક્ષિત અને સશક્ત ભારતના નિર્માણનો સંકલ્પ બનીને ગુંજશે.
