કોમનવેલ્થ કબડ્ડી ચેમ્પિયનશિપમાં ભારતની સતત પાંચમી જીત; કેન્યા અને મલેશિયાની મહિલા ટીમોનો પણ દબદબો
અમદાવાદ:
અમદાવાદના વીર સાવરકર સ્પોર્ટ્સ કોમ્પ્લેક્સ ખાતે ચાલી રહેલી કોમનવેલ્થ કબડ્ડી ચેમ્પિયનશિપ 2026માં ભારતીય પુરુષ ટીમે શાનદાર પ્રદર્શન કરતાં તાન્ઝાનિયાને 48-20થી હરાવીને સેમિફાઇનલમાં પ્રવેશ કર્યો છે. મંગળવારે રમાયેલી આ મેચમાં ભારતીય ખેલાડીઓએ રેડિંગ અને ડિફેન્સ બંને વિભાગમાં પ્રભુત્વ જમાવ્યું હતું. ભારતે અત્યાર સુધી રમાયેલી પાંચેય ગ્રુપ મેચોમાં વિજય મેળવીને ગ્રુપમાં પોતાનું ટોચનું સ્થાન નિશ્ચિત કર્યું છે. હવે ભારતે ગુરુવારે શ્રીલંકા સામે ગ્રુપની અંતિમ મેચ રમવાની છે.
પ્રથમ હાફથી જ ભારતનો દબદબો
ભારતીય ટીમે મેચની શરૂઆતથી જ આક્રમક રમત દાખવીને 3-0ની સરસાઈ મેળવી હતી. આઠમી મિનિટે ભારતે તાન્ઝાનિયાને ઓલઆઉટ કરીને પોતાની લીડ બે આંકડામાં પહોંચાડી દીધી હતી. ભારતીય ખેલાડીઓએ સમગ્ર પ્રથમ હાફ દરમિયાન દબદબો જાળવી રાખ્યો હતો અને હાફ ટાઇમ સુધીમાં 25-8ની મજબૂત સરસાઈ મેળવી લીધી હતી.
બીજા હાફમાં પણ ભારતીય ટીમે પોતાના પ્રદર્શનની ગતિ જાળવી રાખી હતી. ભારતના રેડર્સની ઝડપી હિલચાલ અને ચપળ ફૂટવર્ક સામે તાન્ઝાનિયાના ડિફેન્ડર્સ નિષ્ફળ રહ્યા હતા. ભારતીય ટીમે કુલ 30 રેડ પોઇન્ટ્સ મેળવ્યા હતા, જ્યારે તાન્ઝાનિયાની ટીમ 15 રેડ પોઇન્ટ્સ જ મેળવી શકી હતી.
ડિફેન્સમાં પણ ભારતીય ખેલાડીઓનો દમ
ભારતીય ડિફેન્ડર્સે પણ ટીમની જીતમાં મહત્ત્વપૂર્ણ યોગદાન આપ્યું હતું. ભારતે ટેકલ પોઇન્ટ્સમાં તાન્ઝાનિયાને 10-5થી પાછળ રાખ્યું હતું. શુભમ શિંદેએ પાંચ, દીપક એસએ ત્રણ અને પરવેશ ભૈંસવાલે બે ટેકલ પોઇન્ટ્સ મેળવીને શાનદાર પ્રદર્શન કર્યું હતું.
ભારતીય ખેલાડીઓએ એકજૂટ થઈને ડિફેન્સ કરતાં તાન્ઝાનિયાના રેડર્સને વધુ પોઇન્ટ્સ મેળવવાની તક આપી નહોતી. પ્રેક્ષકોના ‘ઇન્ડિયા, ઇન્ડિયા’ના નારાઓ વચ્ચે ભારતીય ટીમે સમગ્ર મેચમાં છ વખત તાન્ઝાનિયાને ઓલઆઉટ કરીને પોતાની જીતને વધુ ભવ્ય બનાવી હતી.
કેન્યાની મહિલા ટીમનો વિજયી સિલસિલો યથાવત્
સ્પર્ધાના પાંચમા દિવસે મહિલા વિભાગમાં કેન્યાએ સ્કોટલેન્ડને 61-16થી હરાવીને પોતાનો અણનમ વિજયી સિલસિલો જાળવી રાખ્યો હતો. કેન્યાની લાવેન્ડા ઓધિયામ્બોએ 16 પોઇન્ટ્સ મેળવીને ટીમની જીતમાં મુખ્ય ભૂમિકા ભજવી હતી. એસ્થર ઓમોલોએ નવ અને જોય વાનેસા ઓન્યાન્ગોએ છ પોઇન્ટ્સનું યોગદાન આપ્યું હતું.
કેન્યાએ રેડ પોઇન્ટ્સમાં 37-12 અને ટેકલ પોઇન્ટ્સમાં 13-4ની સરસાઈ મેળવી હતી. આ ઉપરાંત સ્કોટલેન્ડને આઠ વખત ઓલઆઉટ કરીને કેન્યાની ટીમે પોતાની તાકાતનો પરચો આપ્યો હતો.
મલેશિયા અને બાંગ્લાદેશની પણ શાનદાર જીત
મહિલા વિભાગની અન્ય એક મેચમાં મલેશિયાએ સિંગાપોરને 62-17થી પરાજય આપ્યો હતો. મલેશિયા તરફથી શમિત્રાએ 17 અને દર્શિનીએ 12 પોઇન્ટ્સ મેળવ્યા હતા. સિંગાપોર તરફથી સિંદિની આનંદરાજને 11 પોઇન્ટ્સ નોંધાવ્યા હતા.
પુરુષ વિભાગમાં બાંગ્લાદેશે સિંગાપોરને 60-28થી હરાવ્યું હતું. બાંગ્લાદેશ તરફથી મિજાનુર રહેમાને 12 અને દિપાયોન ગોલ્ડરે 10 પોઇન્ટ્સ મેળવીને જીતમાં મહત્ત્વનું યોગદાન આપ્યું હતું. બાંગ્લાદેશે રેડ પોઇન્ટ્સમાં 39-22 અને ટેકલ પોઇન્ટ્સમાં 13-4ની સરસાઈ મેળવી હતી.
કેનેડાએ સ્કોટલેન્ડને હરાવ્યું, મલેશિયાનો ઇંગ્લેન્ડ સામે વિજય
દિવસની અન્ય મેચમાં કેનેડાએ સ્કોટલેન્ડને 62-30થી હરાવીને સ્પર્ધામાં પોતાની બીજી જીત નોંધાવી હતી. કેનેડાની જીતમાં ભારતીય મૂળના ખેલાડીઓ અનમોલ ઠાકુર અને મનપ્રીત સિંહે અનુક્રમે 19 અને 15 પોઇન્ટ્સ મેળવીને નોંધપાત્ર યોગદાન આપ્યું હતું. કેનેડાએ રેડ પોઇન્ટ્સમાં 37-18 અને ટેકલ પોઇન્ટ્સમાં 15-9ની સરસાઈ મેળવી હતી.
આ ઉપરાંત મલેશિયાની પુરુષ ટીમે પણ મજબૂત રમત દાખવીને ઇંગ્લેન્ડને 55-29થી પરાજય આપ્યો હતો.
23 ટીમોના 400થી વધુ ખેલાડીઓનો જમાવડો
એમેચ્યોર કબડ્ડી ફેડરેશન ઓફ ઇન્ડિયા (AKFI) દ્વારા આયોજિત અને ઇન્ટરનેશનલ કબડ્ડી ફેડરેશન (IKF) દ્વારા માન્યતા પ્રાપ્ત આ ચેમ્પિયનશિપમાં પુરુષ અને મહિલા વિભાગની કુલ 23 ટીમોના 400થી વધુ ખેલાડીઓ ભાગ લઈ રહ્યા છે. આ સ્પર્ધામાં બંને વિભાગના વિજેતાઓને પ્રથમ કોમનવેલ્થ કબડ્ડી ચેમ્પિયનનો ખિતાબ એનાયત કરવામાં આવશે.
