ઈડીએ પવન મુંજાલ વિરુદ્ધ પ્રિવેન્શન ઓફ મની લોન્ડરિંગ એક્ટ હેઠળ કેસ નોંધ્યો, આ પહેલા પણ હીરો મોટોકોર્પ પર કરચોરી અંગે દરોડા પાડવામાં આવ્યા હતા
મુંબઈ
ઈડીએ દેશની સૌથી મોટી ટુ-વ્હીલર કંપની હીરો મોટોકોર્પના એક્ઝિક્યુટિવ ચેરમેન પવન મુંજાલ વિરુદ્ધ મોટી કાર્યવાહી કરી છે. ઈડીએ આજે તેમના ઘર અને અલગ-અલગ ઓફિસો પર દરોડા પાડ્યા છે. ઉલ્લેખનીય છે કે ડીઆરઆઈએ તાજેતરમાં જ પવન મુંજાલના નજીકના સહયોગીને અઘોષિત વિદેશી હૂંડિયામણના કેસમાં પકડ્યો હતો.
સુત્રોમાંથી મળતી માહિતી અનુસાર ઈડીએ મની લોન્ડરિંગની તપાસના ભાગરૂપે હીરો મોટોકોર્પના એક્ઝિક્યુટિવ ચેરમેન પવન મુંજાલ અને કેટલાક અન્ય લોકો વિરુદ્ધ દરોડા પાડ્યા છે. ઈડીએ પવન મુંજાલ વિરુદ્ધ પ્રિવેન્શન ઓફ મની લોન્ડરિંગ એક્ટ હેઠળ કેસ નોંધ્યો છે. પીએમએલએની જોગવાઈઓ અનુસાર દિલ્હી અને ગુરુગ્રામ સ્થિત પરિસરમાં સર્ચ કરવામાં આવ્યું છે. આ દરમિયાન હીરો મોટોકોર્પના શેર લગભગ 1.30 વાગ્યે લગભગ 4 ટકા ઘટ્યા હતા અને રૂ. 3,083 પર ટ્રેડ કરી રહ્યા હતા.
એક રિપોર્ટ અનુસાર સ્થાનિક ઓટોમોબાઈલ કંપની હીરો મોટોકોર્પ સરકારના રડાર પર છે. કોર્પોરેટ અફેર્સ મંત્રાલયએ કંપની સામે તપાસ શરૂ કરી છે. હીરો મોટોકોર્પના કેટલાક વ્યવહારોમાં આવકવેરા વિભાગ દ્વારા કરવામાં આવેલી અગાઉની તપાસ બાદ આ તપાસ શરૂ કરવામાં આવી છે. આ ઉપરાંત એમસીએ થર્ડ પાર્ટી વેન્ડર્સ સાથે કંપનીના સંબંધોનું મૂલ્યાંકન કરશે અને મની લોન્ડરિંગ સંબંધિત કેસોમાં તેની માલિકીનું માળખું પણ તપાસશે.
આ પહેલા પણ હીરો મોટોકોર્પ પર માર્ચ 2022 માં આવકવેરા વિભાગ દ્વારા કરચોરી અંગે દરોડા પાડવામાં આવ્યા હતા. તે દરમિયાન આવકવેરા વિભાગે સર્ચ દરમિયાન હીરો મોટોકોર્પ લિમિટેડના ચેરમેન, ચીફ એક્ઝિક્યુટિવ ઓફિસર અને મેનેજિંગ ડિરેક્ટર પવન મુંજાલના ઘરે પણ તપાસ કરી હતી. વિભાગની મૂળ કંપની સીબીડીટીએ કંપનીનું નામ લીધા વિના એક નિવેદનમાં જણાવ્યું હતું કે તેણે રૂ. 800 કરોડથી વધુના કથિત ગેરકાયદેસર વ્યવસાય ખર્ચ શોધી કાઢ્યા છે.
