સ્ટાર કલાકારોના 12.30એ લાઈવ પરફોર્મન્સ બાદ બે વાગ્યાથી મેચ શરૂ થશેઃ ક્રિકેટ ચાહકોમાં ભારે ઉત્સાહનો માહોલ, શુભમન ગિલના રમવાની શક્યતા
અમદાવાદ
14 ઓક્ટોબર શનિવારે વર્લ્ડ કપ મેચ પહેલા ભારત અને પાકિસ્તાન વચ્ચે રસાકસીભરી મેચ રમાશે. જેના માટે શુક્રવારે પાકિસ્તાન અને ભારતીય ટીમે જોરદાર પ્રેક્ટિસ શરૂ કરી દીધી છે. આ સમયે પાકિસ્તાનનો માસ્ટર બોલિંગ પ્લાન લીક થયો છે. સૂત્રોના જણાવ્યા પ્રમાણે નેટ્સમાં મોદી સ્ટેડિયમમાં પ્રેક્ટિસ સમયે પાકિસ્તાની ટીમે સ્પોટ બોલિંગ પર ધ્યાન કેન્દ્રિત કર્યું હતું. તેવામાં ભારતીય બેટ્સમેન ઘણીવાર વિક ઝોનમાં પોતાની વિકેટ થ્રો કરતા હોય છે એના પર ધ્યાન કેન્દ્રિત કરી શકાય છે. તો ભારતનો વળતો પ્લાન શું હશે એના પર પણ આપણે નજર કરીએ.
અમદાવાદમાં નરેન્દ્ર મોદી સ્ટેડિયમમાં પાકિસ્તાનનો પ્લાન લીક થઈ ગયો છે. તેમણે આ દરમિયાન સ્પોટ બોલિંગ કરીને વિરાટ, રોહિત શર્મા સામે પડકાર ફેંકવાનું નક્કી કર્યું છે. સૂત્રોના જણાવ્યા પ્રમાણે સ્પિન બોલિંગથી લઈ ફાસ્ટ બોલર્સે માત્ર વિક ઝોન હોય તેવા સ્પોટ પર જ ટાર્ગેટ કરવા માટે તૈયારીઓ કરી છે. એટલું જ નહીં સ્પિનર્સને પ્રેક્ટિસ કરાવવા માટે બોલિંગ કોચ મોર્ને મોર્કલે પણ મહત્ત્વપૂર્ણ ભૂમિકા ભજવી હતી. એક ટપ્પો સેટ કરી એમાં જ પિચ થાય બોલ એની પ્રેક્ટિસ પાકિસ્તાની ટીમે કરી હતી.
ફાસ્ટ બોલર હોય કે સ્પીનર્સ તેમને સૌથી વધારે ઓફ સાઈડ અને મીડલ ઓફ લેન્થ પર બોલ કરવા માટે પ્રેક્ટિસ કરાવાઈ હતી. આ સમયગાળા દરમિયાન ફિલ્ડ સેટઅપ કેવી રીતે કરવું અને ભારતીય બેટ્સમેનનાં સ્ટ્રોંગ ઝોનને ધ્યાનમાં રાખી ટ્રેનિંગ શરૂ કરાઈ હતી. ઉલ્લેખનીય છે કે વનડે વર્લ્ડ કપના ઈતિહાસ પર નજર કરો તો ભારત અને પાકિસ્તાન મેચમાં ટીમ ઈન્ડિયાનું પલડું ભારે છે. અત્યારસુધી વનડે વર્લ્ડ કપની જેટલી પણ મેચ થઈ છે એમાં ભારતીય ટીમનું સ્થાન આગવું હતું. ભારતીય ટીમ જીતના આ ટ્રેક રેકોર્ડને કાયમી રાખવા માટે પાકિસ્તાન સામે ઉતરશે.
મીડિયા રિપોર્ટ્સ પ્રમાણે શુભમન ગિલ ભારતીય ટીમના અન્ય ખેલાડીઓ કરતા પહેલા જ અમદાવાદ આવી પહોંચ્યો હતો. જ્યાં તેણે નેટ્સમાં પ્રેક્ટિસ શરૂ કરી દીધી હતી. અહીં તેણે લગભગ 1કલાક નેટ બોલર્સ સામે બેટિંગ કરી અને પછી કેચિંગ પ્રેક્ટિસ કરવા માટે ગયો હતો. આ સમયે ગિલને અશક્તિ પણ નહોતી લાગી કે પ્રોપર સેશનમાં ભાગ લીધો હતો. જોકે તે પાકિસ્તાન સામેની મેચમાં પ્લેઇંગ-11માં હશે કે કેમ એ સસ્પેન્સ છે પરંતુ નિષ્ણાંતો જણાવી રહ્યા છે કે મોટાભાગે ગિલના રમવાના ચાન્સ લાગી રહ્યા છે. જોકે આ અંગે કોઈ સત્તાવાર જાહેરાત કરવામાં આવી નથી.
ઈન્ડિયન ટીમ જ્યારે હોટેલ પહોંચી ત્યારે દરેક ખેલાડીઓનું સાલ અને તિલક લગાવીને સ્વાગત કરવામાં આવ્યું હતું. આ સમયે હાર્દિક પંડ્યા તેમના પુત્ર અગત્સ્ય સાથે બસમાંથી નીચે ઉતર્યા હતા. એટલું જ નહીં વિરાટ કોહલી અને કેએલ રાહુલનું પણ ભવ્ય સ્વાગત થયું હતું. ઈન્ડિયન ટીમે ફિલ્ડિંગ અને બેટિંગ પ્રેક્ટિસ કરવાનું શરૂ કર્યું હતું અને ત્યારપછી હવે મેચ પહેલા રણનીતિને અંતિમ ઓપ અપાઈ રહ્યા છે. વિશ્વના સૌથી મોટા ક્રિકેટ સ્ટેડિયમમાં એક દશકા કરતા વધુ સમયથી ભારત અને પાકિસ્તાન વચ્ચે ટક્કર થવા જઈ રહી છે એના માટે ચુસ્ત પોલીસ બંદોબસ્ત પણ ગોઠવી દેવાયો છે.
અમદાવાદના નરેન્દ્ર મોદી સ્ટેડિયમની પિચ બેટ્સમેન માટે સ્વર્ગ ગણાય છે. આ મેદાન પર બેટ્સમેન ઘણા રન બનાવે છે. અહીં બોલ અને બેટ વચ્ચે ટાઈમિંગ સરળતાથી થતું હોય છે. જેનો બેટ્સમેનો ભરપૂર ફાયદો ઉઠાવે છે. ફાસ્ટ બોલરોને પણ અહીં મદદ મળે છે. આ સિવાય જેમ જેમ મેચ આગળ વધે છે તેમ સ્પિનરો પણ ફરીથી રમતમાં આવે છે. મોટી બાઉન્ડ્રીને કારણે બોલરો અહીં મુક્તપણે બોલિંગ કરી શકે છે.
આ મેદાનમાં અત્યાર સુધીમાં કુલ 29 વન-ડે મેચ રમાઈ છે, જેમાંથી પ્રથમ બેટિંગ કરનાર ટીમે 16 વખત મેચ જીતી છે અને બીજી બેટિંગ કરનારી ટીમ 13 વખત જીતી છે. જે પણ ટીમ ટોસ જીતશે તે પહેલા બેટિંગ કરવા માંગશે અને બોર્ડ પર મોટો સ્કોર નોંધાવવા માગશે.
