આરસીબી ચહલને હરાજીમાં ખરીદવા માગતી હતીઃ માઈક હેસન

ચહલને રિલીઝ કરવા પાછળનું કારણ સમજાવવા ફોન કરવામાં આવ્યો હતો, તે નારાજ હતો અને તેણે વાતચીતમાં રસ દાખવ્યો ન હતો

નવી દિલ્હી

રોયલ ચેલેન્જર્સ બેંગ્લોરે આઈપીએલ 2022માં સ્પિનર ​​યુઝવેન્દ્ર ચહલને રિટેન કર્યો ન હતો અને તેને મેગા ઓક્શનમાં મોકલ્યો હતો. આ અત્યાર સુધીનો સૌથી ચોંકાવનારો નિર્ણય છે. કારણ કે ચહલ આઈપીએલ અને ટી20આઈ ક્રિકેટમાં ભારતનો સૌથી સફળ બોલર છે. આરસીબીએ આવું કેમ કર્યું તે અંગે કોઈએ ક્યારેય કોઈ ખુલાસો કર્યો નથી. પરંતુ આઈપીએલ 2024 પહેલા આરસીબીના પૂર્વ ક્રિકેટ ડિરેક્ટર માઈક હેસને આ અંગે ઘણા ખુલાસા કર્યા છે. તેણે કહ્યું કે, “ચહલને રિલીઝ કરવા પાછળનું કારણ સમજાવવા માટે વ્યક્તિગત ફોન કરવામાં આવ્યો હતો. તે નારાજ હતો અને તેણે વાતચીતમાં રસ દાખવ્યો ન હતો.

હેસને કહ્યું, “અમે મોટી બોલી લગાવીને ચહલને હરાજીમાં ખરીદવા માગતા હતા. હું તે જાણું છું કારણ કે આ બધા આયોજનમાં હું ટીમની સાથે હતો. મને યાદ છે કે પછી જ્યારે મેં ચહલને ફોન કર્યો ત્યારે તે નારાજ થઈ ગયો હતો. તે સમયે તેને હરાજીની ગતિશીલતા સમજાવવાનો પ્રયાસ કરવો ખૂબ મુશ્કેલ હતું. ચહલ ખૂબ જ દુખી હતો અને આવું થવું સ્વાભાવિક છે. તે આરસીબીના સૌથી મહત્વપૂર્ણ ખેલાડીઓમાંથી એક હતો અને તેને રિટેન કરવામાં આવ્યો ન હતો. પરંતુ હું દરેકને ખાતરી આપી શકું છું કે તે સમયે અમે જે સમસ્યાઓનો સામનો કરી રહ્યા હતા તેનાથી તેઓ સારી રીતે વાકેફ હતા.”

હેસને આગળ કહ્યું, “મેં ચહલ સાથે વાત કરી હતી જ્યારે અમે પ્રારંભિક રિટેનશન કર્યું હતું અને અમે માત્ર ત્રણ ખેલાડીઓને રિટેન કરી રાખ્યા હતા કારણ કે અમને લાગ્યું કે અમે હરાજીમાં હર્ષલ પટેલ અને ચહલ બંનેને પાછા ખરીદવાનો પ્રયાસ કરવા માગતા હતા. પરંતુ મેગા ઓક્શનને કારણે મામલો થોડો જટિલ બન્યો હતો. આઈપીએલના સર્વશ્રેષ્ઠ ખેલાડીઓમાંથી એક હોવા છતાં તેને માર્કી ખેલાડીઓની યાદીમાં સ્થાન મળ્યું ન હતું. તેનું નામ 64 ખેલાડીઓ બાદ હરાજીમાં આવ્યું છે. તેનો અર્થ એ થયો કે અમે તેને ખરીદીશું કે નહીં તેની ખાતરી આપવી અમારા માટે ખરેખર મુશ્કેલ હતું. આ કારણે આરસીબીએ હર્ષલને ખરીદ્યો, પરંતુ ચહલને રાજસ્થાન રોયલ્સે ખરીદ્યો. તેના સ્થાને આરસીબીએ શ્રીલંકાના ઓલરાઉન્ડર વાનિન્દુ હસરંગાને પોતાની ટીમમાં સામેલ કર્યો હતો.”