અમદાવાદમાં ITF M25 મેન્સ ટેનિસ ટુર્નામેન્ટ શનિવારથી શરૂ થશે

12 દેશના 80 ખેલાડી ભાગ લેશે, ગુજરાતના આર્યન શાહ અને દેવ જાવિયા પણ રમશે

અમદાવાદ
તાજેતરમાં જ ઇન્ટરનેશનલ ટેનિસ ફેડરેશનની વિમેન્સ ટેનિસ ટુર્નામેન્ટ બાદ ગુજરાતને વધુ એક પ્રતિષ્ઠિત ટેનિસ ટુર્નામેન્ટ ફાળવવામાં આવી છે. આઇટીએફ એમ25 મેન્સ ટેનિસ ટુર્નામેન્ટનો 23મી માર્ચથી અલ્ટેવોલ-એલેકઝાન્ડર વાસ્કે ટેનિસ યુનિવર્સિટી, અમદાવાદ ખાતે પ્રારંભ થઈ રહ્યો છે. આ ટુર્નામેન્ટ 30મી સુધી ચાલશે અને તે માટેના ક્વોલિફાઈંગ રાઉન્ડ 23 અને 24મીએ યોજાશે.
30,000 અમેરિકી ડોલરની ઇનામીરકમ ધરાવતી આઇટીએફ એમ25 મેન્સ ટેનિસ ટુર્નામેન્ટના મેઇન ડ્રો 25થી 30મી માર્ચે યોજાશે અને તેને સ્પોર્ટ્સ ઓથોરિટી ઓફ ગુજરાત (એસએજી)નો સહયોગ સાંપડેલો છે.  30મીએ સિંગલ્સ ફાઇનલ રમાશે અને 29મીએ ડબલ્સની ફાઇનલ મેચ રમાશે. આ એક પ્રતિષ્ઠિત ટેનિસ ટુર્નામેન્ટ હોવાને કારણે ગુજરાતના યુવાન ખેલાડીઓ અને રમતપ્રેમીઓ માટે આ એક સોનેરી તક સમાન ઇવેન્ટ બની રહેશે.
ટુર્નામેન્ટના ડાયરેક્ટર સ્વપ્નીલ દેસાઈએ આ અંગે માહિતી આપતા જણાવ્યું હતું કે ટુર્નામેન્ટને એસએજી તરફથી આર્થિક સહાય પણ સાંપડેલી છે અને આ પ્રકારની ટુર્નામેન્ટમાં ભાગ લેવાથી રાજ્યના યુવાન ખેલાડીઓએ ખૂબ જ લાભ થતો હોય છે. આ ટુર્નામેન્ટમાં ગુજરાતના જાણીતા ખેલાડીઓ આર્યન શાહ અને દેવ જાવિયા પણ ભાગ લેનારા છે અને તેઓ સીધા જ મેઇન ડ્રોમાં રમશે.  આ ઉપરાંત 12 દેસના લગભગ 80 જેટલા ખેલાડી આ ટુર્નામેન્ટમાં ભાગ લેનારા છે. આ દેશોમાં કોરિયા, જાપાન, ગ્રેટ બ્રિટન, ઓસ્ટ્રેલિયા, રશિયા, ઇટાલી, તુર્કી, અમેરિકા, કઝાકસ્તાન,  ચેક રિપબ્લિક, કોસોવો અને યજમાન ભારતના ખેલાડીનો સમાવેશ થાય છે.
ટુર્નામેન્ટના મોખરાના ચાર ક્રમાંકિત ખેલાડીઓમાં જય ક્લાર્ક (ગ્રેટ બ્રિટન, 264 એટીપી રેટિંગ), ઓલિવર ક્રોફર્ડ (ગ્રેટ બ્રિટન, 375), મોરેની બોઉઝિગે (ઓસ્ટ્રેલિયા, 401), અગોર આઘાફોનોવ (કઝાકસ્તાન, 476)નો સમાવેશ થાય છે. મોખરાના ક્રમનો જય ક્લાર્ક આ અગાઉ રોજર ફેડરર જેવા વર્લ્ડ નંબર વન ખેલાડી સામે ગ્રાન્ડસ્લેમ ટુર્નામેન્ટમાં રમી ચૂકયો છે જ્યારે ઓલિવર એક સમયના વિશ્વના સાતમા ક્રમના રિચાર્ડ ગેસકેટ સામે ગ્રાન્ડસ્લેમમાં રમ્યો હતો.
આ ટુર્નામેન્ટમાં ભારત માટે ડેવિસ કપ રમી ચૂકેલા કરણ શાહ (એટીપી ક્રમાંક 488), આર્યન શાહ (અમદાવાદ, 569), સિદ્ધાર્થ વિશ્વકર્મા (790) અને સિદ્ધાર્થ રાવત (852) પણ રમવાના છે.
અલ્ટેવોલ-એલેકઝાન્ડર વાસ્કે ટેનિસ યુનિવર્સિટીના ચિરાગ પટેલે જણાવ્યું હતું કે અમદાવાદમાં આ પ્રકારની ઉચ્ચકક્ષાની ટુર્નામેન્ટના આયોજનથી સ્થાનિક ખેલાડીઓને વર્લ્ડ ક્લાસ ટેનિસ ખેલાડીઓની રમત નિહાળવા મળશે જેનાથી તેમને ભવિષ્યમાં ઘણો લાભ થઈ શકે છે. આ ઉપરાંત તમામ મેચો વિશ્વભરમાં લાઇવ સ્ટ્રીમ કરવામાં આવશે. આ ઉપરાંત ટેનિસ કોર્ટ પર મેચ નિહાળવા માટે વિનામૂલ્યે પ્રવેશ આપવામાં આવશે.