લખનૌનો આશ્વાસનરૂપ વિજય,લખનૌના 235 રનના સ્કોર સામે ગુજરાત ટાઇટન્સના 202, શાહરુખના 57
અમદાવાદ
મિચેલ માર્શની શાનદાર સદી બાદ બોલર્સની કમાલથી લખનૌ સુપર જાયન્ટ્સે ઇન્ડિયન પ્રીમિયર લીગ (આઇપીએલ)ની ટી20 ક્રિકેટ ટુર્નામેન્ટની લીગ મેચમાં ગુજરાત ટાઇટન્સ સામે 33 રનથી વિજય હાંસલ કર્યો હતો. જોકે ગુજરાત માટે આ પરાજયની ખાસ અસર પડી નથી કેમ કે તેણે અગાઉથી જ પ્લે ઓફમાં પ્રવેશ કરી લીધો હતો.
અહીંના નરેન્દ્ર મોદી સ્ટેડિયમ ખાતે રમાયેલી મેચમાં પ્રથમ બેટિંગ કરતાં લખનૌ સુપર કિંગ્સે 20 ઓવરમાં બે વિકેટે 235 રનનો સ્કોર રજૂ કર્યો હતો જેના જવાબમાં ગુજરાત ટાઇટન્સે 20 ઓવરમાં નવ વિકેટે 202 રન નોંધાવ્યા હતા.
236 રનના ટારગેટ સામે રમતાં ગુજરાત ટાઇટન્સે મક્કમ પ્રારંભ કર્યો હતો પરંતુ પાંચમી ઓવરમાં 46 રનના કુલ સ્કોરે સાઇ સુદર્શન આઉટ થયો હતો. આ સિઝનન ગુજરાતનો સૌથી સફળ બેટ્સમેન સુદર્શન 16 બોલમાં 21 રન કરી શક્યો હતો. થોડી વારમાં કેપ્ટન શુભમન ગિલ પણ આઉટ થઈ ગયો હતો. આઠમી ઓવરના છેલ્લા બોલે આવેશ ખાનની બોલિંગમાં આઉટ થતાં શુભમન ગિલે 20 બોલમાં 32 રન ફટકાર્યા હતા જેમાં સાત ચોગ્ગા સામેલ હતા.
બે પ્રારંભિક વિકેટ બાદ જોઝ બટલરે શાનદાર બેટિંગ કરી હતી. જોકે 18 બોલમાં 33 રનની ઇનિંગ્સ રમ્યા બાદ બટલર પણ આઉટ થઈ ગયો હતો. વર્તમાન સિઝનમાં ગુજરાત ટાઇટન્સના મોખરાના ત્રણ બેટ્સમેન બાદ બાકીના બેટ્સમેનને ખાસ તક મળી ન હતી. આ મેચમાં તેમનો મોકો મળ્યો હતો જેનો લાભ ઉઠાવીને શાહરુખ ખાન અને શેરફેન રૂધરફોર્ડે શાનદાર બેટિંગ કરી હતી. બંનેએ ઝડપી ભાગીદારી નોંધાવી હતી. બંનેએ 4.3 ઓવરમાં અડધી સદીની ભાગીદારી પૂરી કરી હતી. અંતે 22 બોલમાં 38 રન ફટકારીને રૂધરફોર્ડ આઉટ થયો હતો. તેણે ત્રણ સિક્સર ફટકારવાની સાથે ચોથી વિકેટ માટે શાહરુખ 40 બોલમાં 86 રન ઉમેર્યા હતા જેને કારણે મેચ રસપ્રદ બની હતી. શાહરુખ ખાને 29 બોલમાં ત્રણ સિક્સર ફટકારી હતી પરંતુ તેની વિકેટ સાથે ગુજરાતની જીતની આશા સમાપ્ત થઈ ગઈ હતી.
અગાઉ ગુજરાત ટાઇટન્સના સુકાની શુભમન ગિલે ટોસ જીતીને લખનૌને પ્રથમ બેટિંગ આપી હતી પરંતુ આ વખતે ગિલનો નિર્ણય યોગ્ય ઠર્યો ન હતો કેમ કે ઓપનર એઇડન માર્કરમ અને મિચેલ માર્શે મળીને તેમની ટીમને શાનદાર શરૂઆત અપાવી હતી. બંનેએ ટાઇટન્સના મોટા ભાગના બોલર્સનો આક્રમકતાથી સામનો કર્યો હતો.
બંનેએ પાવરપ્લેમાં જ 53 રન ફટકારી દીધા હતા. શરૂઆતમાં માર્કરમ ઝડપી બેટિંગ કરી રહ્યો હતો પરંતુ ગુજરાતે જેમ જેમ બોલિંગમાં પરિવર્તન કર્યા તેમ તેમ મિચેલ માર્શ ખીલતો ગયો હતો. તેણે અર્શાદ ખાન, પ્રસિદ્ધ ક્રિષ્ણા અને સાઈ કિશોરની બોલિંગમાં સિક્સર ફટકારી હતી તો માર્કરમ પણ પ્રારંભમાં જ અર્શાદ ખાન અને સિરાઝની ઓવરમાં ઘણા રન લીધા હતા.
અંતે દસમી ઓવરમાં ગુજરાત ટાઇટન્સને પહેલી વિકેટ ખેરવવામાં સફળતા મળી હતી. વર્તમાન સિઝનની ઘણી મેચોમાં નજરઅંદાજ કરાયેલો હોવા છતાં સફળ રહેલો સ્પિનર સાઇ કિશોર તેની ટીમને પહેલી વિકેટ અપાવવામાં કામયાબ રહ્યો હતો. તેની બોલિંગમાં માક્રરમ 36 રનના અંગત સ્કોરે શાહરુખ ખાનના હાથમાં ઝડપાઈ ગયો હતો. તેણે 24 બોલની ઇનિંગ્સમાં ત્રણ ચોગ્ગા અને બે સિક્સર ફટકારી હતી. એ વખતે લખનૌનો સ્કોર 90 રન હતો.
ત્યાર બાદ મિચેલ માર્શ સાથે નિકોલસ પૂરણ જોડાયો હતો અને ફરીથી મોટી ભાગીદારી શરૂ થઈ હતી. દરમિયાન મિચેલ માર્શે તેની આઇપીએલની કારકિર્દીની પ્રથમ સદી ફટકારી હતી. આ માટે 56 બોલ રમ્યો હતો. અગાઉ તેનો સર્વોચ્ચ સ્કોર 89 રન હતો જે તેણે 2022ના મે મહિનામાં રાજસ્થાન રોયલ્સ સામે મુંબઈના પાટીલ સ્ટેડિયમ ખાતે નોંધાવ્યો હતો. માર્શ અને પૂરણે 121 રનની ભાગીદારી નોંધાવી હતી.
નિકોલસ પૂરણે આ મેચમાં ઝંઝાવાતી બેટિંગ કરી હતી. તેણે 27 બોલમાં પાંચ સિક્સર સાથે 56 અને કેપ્ટન રિશભ પંતે છ બોલમાં બે સિકસર સાથે 16 રન ફટકાર્યા હતા.
આઇપીએલની 2025ની સિઝનમાંથી અગાઉથી જ પ્લે ઓફની બહાર થઈ ગયેલી લખનૌની ટીમ તેની આગામી મેચમાં 27મી મેએ બેંગલોર ખાતે રમશે જ્યારે ગુજરાત ટાઇટન્સ હવે 25મીએ આ જ મેદાન પર ચેન્નાઈ સુપર કિંગ્સ સામે રમશે.
ગુજરાત ટાઇટન્સ વિરુદ્ધ લખનૌ સુપર જાયન્ટ્સ
લખનૌ સુપર જાયન્ટ્સ રન બોલ 4 6
માર્કરમ કો. શાહરુખ બો. સાઇ કિશોર 36 24 3 2
મિચેલ માર્શ કો. રૂધરફોર્ડ બો. અર્શાદ 117 64 10 8
નિકોલસ પૂરણ અણનમ 56 27 4 5
રિશભ પંત અણનમ 16 6 0 2
એક્સ્ટ્રાઃ 10. કુલઃ (20 ઓવરમાં, બે વિકેટે) 235. વિકેટઃ 1-91, 2-212. બોલિંગઃ મોહમ્મદ સિરાઝઃ 4-0-37-0, અર્શાદ ખાનઃ 3-0-30-1, કેગિસો રબાડાઃ 4-0-45-0, પ્રસિદ્ધ ક્રિષ્ણાઃ 4-0-44-0, આર. સાઇ કિશોરઃ 3-0-34-1, રાશીદ ખાનઃ 2-0-36-0.
ગુજરાત ટાઇટન્સ રન બોલ 4 6
સાઇ સુદર્શન કો. માર્કરમ બો. ઓરૂકે 21 16 4 0
શુભમન ગિલ કો. સમદ બો. આવેશ 35 20 7 0
જોઝ બટલર બો. આકાશ મહારાજ 33 18 3 2
રૂધરફોર્ડ કો. (સબ) બો. ઓરૂકે 38 22 1 3
શાહરુખ કો. (સબ) બો. આવેશ 57 29 5 3
તેવટિયા કો. હિંમતસિંઘ બો. ઓરૂકે 2 3 0 0
અર્શાદ કો. ઓરૂકે બો. શાહબાઝ 1 3 0 0
રાશીદ ખાન અણનમ 4 4 0 0
રબાડા બો. બદોની 2 3 0 0
સાઇ કિશોર બો. બદોની 1 2 0 0
એક્સ્ટ્રાઃ 08. કુલઃ (20 ઓવરમાં, નવ વિકેટે) 202. વિકેટઃ 1-46, 2-85, 3-96, 4-182, 5-186, 6-193, 7-197, 8-200, 9-202. બોલિંગઃ આકાશ મહારાજ સિંઘઃ 3.1-0-29-1, આકાશ દીપઃ 4-0-49-0, વિલિયમ ઓરૂકેઃ 4-0-27-3, આવેશ ખાનઃ 3.5-0-51-2, શાહબાઝ અહેમદઃ 4-0-41-1, આયુષ બદોનીઃ 1-0-4-2.
મોદી સ્ટેડિયમ ખાતે એક ઇનિંગ્સમાં સૌથી વધુ સિકસરનો રેકોર્ડ
લખનૌની ટીમે ટાઇટન્સ સામે 17 સિક્સર ફટકારી, અગાઉ ત્રણ ટીમે 16-16 સિક્સર ફટકારી હતી
ગુજરાત ટાઇટન્સ સામેની મેચમાં ગુરુવારે લખનૌ સુપર કિંગ્સે તેની ઇનિંગ્સ દરમિયાન 17 સિકસર ફટકારી હતી. નરેન્દ્ર મોદી સ્ટેડિયમ ખાતે ઇન્ડિયન પ્રીમિયર લીગ (આઇપીએલ)ની કોઈ એક ઇનિંગ્સમાં સૌથી વધુ સિક્સરનો આ નવો રેકોર્ડ છે. અગાઉ એવી ત્રણ ટીમ હતી જેણે એક ઇનિંગ્સમાં 16-16 સિક્સર ફટકારી હતી. હજી ગઈ સિઝનમાં ગુજરાત ટાઇટન્સ સામેની મેચમાં રોયલ ચેલેન્જર્સ બેંગલોરે તેની ઇનિંગ્સમાં 16 સિક્સર ફટકારી હતી તો આ જ સિઝનમાં પંજાબ કિંગ્સે ગુજરાત સામે રમતાં 243 રનના સ્કોરમાં 16 સિક્સર ફટકારી હતી જ્યારે એ જ દિવસે ગુજરાતની ટીમ વળતી લડત આપતાં પંજાબ સામે 16 સિક્સર ફટકારી હતી.
નરેન્દ્ર મોદી સ્ટેડિયમ ખાતે એક ઇનિંગ્સમાં કોઈ ટીમે દસથી વધારે સિક્સર ફટકારી હોય તો આ 20મો પ્રસંગ હતો. આ ઇનિંગ્સમાં એઇડન માર્કરમે બે, મિચેલ માર્શે આઠ, નિકોલસ પૂરણે પાંચ અને રિશભ પંતે બે સિક્સર ફટકારી હતી.
