ગુજરાતનો આઈપીએલની અંતિમ લીગ મેચમાં ચેન્નાઈ સામે પરાજય

આઇપીએલઃ ક્વોલિફાઈ થનારી વધુ એક ટીમ લીગમાં હારી, આશ્વાસન વિજય સાથે ધોનીની ટીમના અભિયાનનો અંત

નરેન્દ્ર મોદી સ્ટેડિયમ ખાતે વધુ એક 200+નો સ્કોર, ચેન્નાઈના 230, સ્થાનિક ખેલાડી ઉર્વિલ ઝળક્યો

અમદાવાદ
ડેવિડ કોનવે અને બ્રાવિસની અડધી સદી ઉપરાંત આયુષ મ્હાત્રે અને સ્થાનિક ખેલાડી ઉર્વિલ પટેલની આક્રમક બેટિંગ બાદ રવીન્દ્ર જાડેજા અને પથિરાણાની વેધક બોલિંગની મદદથી ચેન્નાઈ સુપર કિંગ્સે વર્તમાન સિઝનની અંતિમ લીગ મેચમાં શાનદાર પ્રદર્શન કરીને ગુજરાત ટાઇટન્સ સામે 83 રનથી વિજય હાંસલ કર્યો હતો. ઇન્ડિયન પ્રીમિયર લીગ (આઇપીએલ)ની ટી20 ક્રિકેટ ટુર્નામેન્ટમાં આ સાથે પ્લે ઓફમાં પ્રવેશ નિશ્ચિત કરી ચૂકેલી વધુ એક ટીમનો પરાજય થયો હતો. જોકે પ્લે ઓફના સ્થાનમાં આ પરિણામથી ગુજરાત ટાઇટન્સના ભાવિ પર કોઈ અસર પડી નથી.
અહીંના નરેન્દ્ર મોદી સ્ટેડિયમ ખાતે રમાયેલી મેચમાં પ્રથમ બેટિંગ કરતાં ચેન્નાઈ સુપર કિંગ્સે તેની 20 ઓવરમાં પાંચ વિકેટે 230 રનનો સ્કોર રજૂ કર્યો હતો જેના જવાબમાં ગુજરાત ટાઇટન્સનો ધબડકો થયો હતો અને તે 18.3 ઓવરમાં 147 રન કરી શક્યું હતું. આ પરિણામ છતાં ગુજરાત હાલના તબક્કે પોઇન્ટ ટેબલમાં 18 પોઇન્ટ સાથે મોખરે છે.
231 રનના ટારગેટ સામે રમતાં ગુજરાતની ટીમે નિયમિત અંતરે વિકેટો ગુમાવી હતી. કેપ્ટન શુભમન ગિલ ત્રીજી જ ઓવરમાં અંશુલ કંબોજના બોલે 13 રનના અંગત સ્કોરે આઉટ થઈ ગયો હતો. જોઝ બટલર અને શેરફેન રૂધરફોર્ડ અનુક્રમે પાંચ અને શૂન્યના સ્કોરે આઉટ થઈ જતાં એક તબક્કે ગુજરાતે પાંચમી ઓવર સુધીમાં 30 રનમાં ત્રણ વિકેટ ગુમાવી દીધી હતી. અહીંથી ગુજરાત ટાઇટન્સ ફરીથી મેચમાં આવી શક્યું ન હતું.
શાહરુખ ખાન 19 અને રાશીદ ખાન 12 રન કરી શક્યા હતા. બીજી તરફ ચેન્નાઈ સુપર કિંગ્સે તેનું બોલિંગ આક્રમણ ચુસ્ત બનાવી દીધું હતું. રવીન્દ્ર જાડેજા, અંશુલ કંબોજ અને નૂર અહેમદની વેધક બોલિંગ સામે સ્થાનિક બેટ્સમેન ખાસ ટકી શકયા ન હતા. નૂર અહેમદે 21 રન આપીને ત્રણ વિકેટ ઝડપી હતી. જ્યારે અંશુલ કંબોજે 13 રનમાં ત્રણ વિકેટ ખેરવી હતી.
અગાઉ ચેન્નાઈ સુપર કિંગ્સે ટોસ જીતીને પ્રથમ બેટિંગ કરવાનો નિર્ણય લીધો હતો. આયુષ મ્હાત્રે અને ડેવિડ કોનવેએ ચેન્નાઈ માટે શાનદાર પ્રારંભ કર્યો હતો. ખાસ કરીને મ્હાત્રેએ મજબૂત બેટિંગ કરી હતી. હજી છ મહિના અગાઉ આ જ મેદાન પર વિજય હઝારે ટ્રોફીમાં નાગાલેન્ડ સામે 181 અને સૌરાષ્ટ્ર સામે 148 રન ફટકારનારા મ્હાત્રેએ આ પિચ પર રમવાના પોતાના અનુભવનો લાભ ઉઠાવીને 17 બોલમાં 34 રન ફટકાર્યા હતા જેમાં ત્રણ સિક્સરનો સમાવેશ થતો હતો.
મ્હાત્રે ચોથી ઓવરમાં આઉટ થઈ ગયો હતો પરંતુ કોનવેએ તેની આક્રમક બેટિંગ જારી રાખી હતી. ગુજરાતના ઉર્વિલ પટેલને તેના હોમગ્રાઉન્ડ પર આકર્ષક બેટિંગ કરી હતી. તેણે અમદાવાદની અતિશય ગરમીમાં પણ સ્ટેડિયમમાં હાજર રહેલા પ્રેક્ષકો ખુશ થઈ ગયા હતા.
ઉર્વિલે નાની પણ આક્રમક ઇનિંગ્સ રમીને 19 બોલમાં બે સિક્સર અને ચાર ચોગ્ગા ફટકાર્યા હતા. ચેન્નાઈ સુપર કિંગ્સના 230 રનના સ્કોરમાં બે અડધી સદીનો સમાવેશ થતો હતો. ડેવિડ કોનવેએ 34 બોલમાં અડધી સદી પૂરી કરી હતી. જોકે તેના પછીના જ બોલે તે આઉટ થઈ ગયો હતો. ન્યૂઝીલેન્ડના આ બેટ્સમેને 35 બોલમાં છ ચોગ્ગા અને બે સિક્સર સાથે બાવન રન ફટકાર્યા હતા. ત્યાર બાદ ચેન્નાઈની ઇનિંગ્સની જવાબદારી ડેવાલ્ડ બ્રાવિસ અને રવીન્દ્ર જાડેજાએ સંભાળી લીધી હતી. બંનેએ 39 બોલમાં 74 રનની ભાગીદારી નોંધાવી હતી. જેમાં જાડેજાનું યોગદાન 18 બોલમાં 21 રનનું રહ્યું હતું જ્યારે બ્રાવિસે ઇનિંગ્સના છેલ્લા બોલે આઉટ થતાં અગાઉ 23 બોલમાં ઝંઝાવાતી 57 રન ફટકારી દીધા હતા. આ સાઉથ આફ્રિકન બેટ્સમેને તેની ઇનિંગ્સમાં પાંચ સિક્સર અને ચાર ચોગ્ગા ફટકાર્યા હતા.
ગુજરાત ટાઇટન્સ માટે પ્રસિદ્ધ ક્રિષ્ણાએ બે તથા સાઈ કિશોર, રાશીદ ખાન અને શાહરુખ ખાને એક એક વિકેટ લીધી હતી.

નરેન્દ્ર મોદી સ્ટેડિયમ ખાતે સિઝનમાં નવમી વાર 200+નો સ્કોર નોંધાયો

આઇપીએલમાં રવિવારે ગુજરાત ટાઇટન્સ અને ચેન્નાઈ સુપર કિંગ્સ વચ્ચે રમાયેલી મેચમાં ધોનીની ટીમે 230 રનનો સ્કોર રજૂ કર્યો હતો. આ સાથે નરેન્દ્ર મોદી સ્ટેડિયમ ખાતે નવો ઇતિહાસ રચાયો હતો. આ મેદાન પર આઇપીએલમાં એક સિઝનમાં સૌથી વધુ વખત 200+ના સ્કોર જોવા મળ્યા હતા. 2025ની સિઝનમાં નવ વખત આ મેદાન પર 200નો સ્કોર જોવા મળ્યો છે. એક સિઝનમાં સૌથી વધુ વખત 200થી વધુનો સ્કોર નોંધાયો હોય તેમાં આ રેકોર્ડ છે. અગાઉ 2024માં દિલ્હીના અરુણ જેટલી સ્ટેડિયમ અને કોલકાતાના ઇડન ગાર્ડન્સ ખાતે આઠ આઠ વખત તથા 2023માં મુંબઈના વાનખેડે સ્ટેડિયમ ખાતે આઠ વખત 200+ના સ્કોર નોંધાયા હતા.

ગુજરાત ટાઇટન્સ વિરુદ્ધ ચેન્નાઈ સુપર કિંગ્સ સ્કોરબોર્ડ
ચેન્નાઈ સુપર કિંગ્સ રન બોલ 4 6
આયુષ મ્હાત્રે કો. સિરાઝ બો. પ્રસિદ્ધ 34 17 3 3
ડેવોન કોનવે બો. રાશીદ 52 35 6 2
ઉર્વિલ પટેલ કો. ગિલ બો. સાઇ કિશોર 37 19 4 2
શિવમ દૂબે કો. કોએત્ઝે બો. શાહરુખ 17 8 0 2
ડેવાલ્ડ બ્રાવિસ કો. બટલર બો. પ્રસિદ્ધ 57 23 4 5
રવીન્દ્ર જાડેજા અણનમ 21 18 1 1
એક્સ્ટ્રાઃ 12. કુલઃ (20 ઓવરમાં, પાંચ વિકેટે) 230. વિકેટઃ 1-44, 2-107, 3-144, 4-156, 5-230. બોલિંગઃ મોહમ્મદ સિરાઝઃ 4-0-47-0, અર્શાદ ખાનઃ 2-0-42-0, પ્રસિદ્ધ ક્રિષ્ણાઃ 4-0-22-2, ગેરાલ્ડ કોએત્ઝેઃ 3-0-34-0, રવિ સાઇ કિશોરઃ 2-0-23-1, રાશીદ ખાનઃ 4-0-42-1, શાહરુખ ખાનઃ 1-0-13-1.
ગુજરાત ટાઇટન્સ રન બોલ 4 6
સાઇ સુદર્શન કો. દૂબે બો. જાડેજા 41 28 6 0
શુભમન ગિલ કો. ઉર્વિલ બો. કંબોજ 13 9 1 1
જોઝ બટલર કો. કંબોજ બો. ખલીલ 5 7 0 0
રૂધરફોર્ડ કો. મ્હાત્રે બો. કંબોજ 0 4 0 0
શાહરુખ ખાન કો. પથિરાણા બો. જાડેજા 19 15 0 2
રાહુલ તેવટિયા કો. દૂબે બો. નૂર અહેમદ 14 10 1 0
રાશીદ ખાન કો. ઉર્વિલ બો. નૂર અહેમદ 12 8 1 1
કોએત્ઝે બો. પથિરાણા 5 5 1 0
અર્શાદ ખાન બો. નૂર અહેમદ 20 14 0 3
સાઇ કિશોર કો. ધોની બો. કંબોજ 3 7 0 0
સિરાઝ અણનમ 3 4 0 0
એક્સ્ટ્રાઃ 12. કુલઃ (18.3 ઓવરમાં) 147. વિકેટઃ 1-24, 2-29, 3-30, 4-85, 5-86, 6-105, 7-110, 8-126, 9-142, 10-147. બોલિંગઃ રવીન્દ્ર જાડેજાઃ 3-0-17-2, ખલીલ અહેમદઃ 3-0-17-1, અંશુલ કંબોજઃ 2.3—13-3, શિવમ દૂબેઃ 2-0-33-0, નૂર અહેમદઃ 4-0-21-3, પથિરાણાઃ 3-0-29-1, દીપક હુડાઃ 1-0-15-0.