કેપ્ટન સૂર્યકુમાર યાદવે અભિષેક શર્મા અને તિલક વર્માનું સમર્થન કરતા કહ્યું કે ટીમ તેમની પાછળ મજબૂતીથી ઊભી છે. તેણે દક્ષિણ આફ્રિકા સામેની મેચ પહેલા મધ્ય ઓવરોમાં સમજદારીપૂર્વક બેટિંગ અને અંતિમ ઓવરોમાં આક્રમક બેટિંગની રણનીતિની જરૂરિયાત પર ભાર મૂક્યો
એસવીએન,અમદાવાદ
અમદાવાદના નરેન્દ્ર મોદી સ્ટેડિયમ ખાતે દક્ષિણ આફ્રિકા સામેની સુપર 8 સીઝનની મહત્વપૂર્ણ મેચ પહેલા કેપ્ટન સૂર્યકુમાર યાદવે મીડિયાને સંબોધન કર્યું . તેણે ખરાબ ફોર્મમાં ઝઝૂમી રહેલા યુવા બેટ્સમેનોનો બચાવ તો કર્યો જ, પરંતુ ટીમની નવી અને આક્રમક બેટિંગ રણનીતિ પણ રજૂ કરી.
મેનેજમેન્ટ અભિષેક શર્માની સાથે
અભિષેકના સતત ત્રણ મેચમાં શૂન્ય રન પર આઉટ થવા અંગે સૂર્યાએ સ્પષ્ટ કર્યું કે ટીમ મેનેજમેન્ટ તેની સાથે છે. કેપ્ટને કહ્યું , જ્યારે તે રન બનાવે છે , ત્યારે તમે જોયું છે કે શું થાય છે. તે તેની પોતાની આગવી રમત રમે એ જરૂરી છે. જો તે રન બનાવે છે, તો સારું , નહીં તો અમે તેને કવર કરવા માટે અહીં છીએ. તેણે ગયા વર્ષે અમારા માટે યોગદાન આપ્યું હતું , અને હવે અમે તેની સાથે ઊભા છીએ.
તિલક વર્મા અને મધ્યમ ઓવરોની રણનીતિ
અભિષેક ઉપરાંત, સૂર્યાએ તિલક વર્મા પર પણ વિશ્વાસ વ્યક્ત કર્યો. તેણે સ્વીકાર્યું કે તિલક તેની બેટિંગથી ખુશ નહીં હોય , પરંતુ નંબર 3 પર તેની ક્ષમતા પર કોઈ શંકા નથી. ટીમના અભિગમ વિશે વાત કરતા, સૂર્યાએ કહ્યું , અમે એવી ટીમ બનવા માંગતા નથી જે ફક્ત આડેધડ હિટ કરે છે. ક્યારેક વિકેટો વહેલી પડી જાય છે , તેથી અમારે 7 થી 15 ઓવર વચ્ચે સ્માર્ટ રીતે રમવું પડશે. અમારી પાસે છેલ્લી પાંચ ઓવરમાં 60-70 રન ઉમેરવા માટે પૂરતો ફાયરપાવર છે .
ટોસની અસરને અવગણવામાં આવી
અમદાવાદમાં ઝાકળની ભૂમિકાની ઘણીવાર ચર્ચા થાય છે , પરંતુ સૂર્યાએ તેને વધુ પડતી ગણાવીને ફગાવી દીધી હતી. તેણે વિશ્વાસપૂર્વક કહ્યું કે જો પ્રથમ ઇનિંગમાં પૂરતા રન હોય , તો બોલિંગ યુનિટ કોઈપણ લક્ષ્યનો બચાવ કરી શકે છે. કેપ્ટનના મતે , તેમની પાસે એવા ખેલાડીઓ છે જે દરેક પરિસ્થિતિમાં અનુકૂલન સાધવા સક્ષમ છે.
