મહિલા રમતવીરોની સહભાગીદારીથી અને ખેલ મહાકુંભથી રમતગમત ક્ષેત્રે આવેલ ક્રાંતિ ગુજરાત માટે ગૌરવની વાત: SAG ડિરેક્ટર જનરલ આઈ. આર. વાળા, મહિલાઓ એકબીજાનો હાથ પકડી આગળ વધે તે અનિવાર્ય: ઇન્ફ્લુએન્સર સપના વ્યાસ
અમદાવાદ
સ્પોર્ટ્સ જર્નાલિસ્ટ્સ એસોસિએશન ઓફ ગુજરાત (SJAG) દ્વારા વિશ્વ મહિલા દિવસ 2026ની ઉજવણીના ભાગરૂપે રમતગમત ક્ષેત્રે ઉત્કૃષ્ટ પ્રદાન કરનાર મહિલા શક્તિને સન્માનિત કરવા માટે એવોર્ડ સમારોહનું આયોજન કરવામાં આવ્યું હતું.
સ્પોર્ટ્સ ઓથોરિટી ઓફ ગુજરાતના સહયોગથી યોજાયેલા આ કાર્યક્રમમાં મુખ્ય અતિથિ આઈ. આર. વાળા, ઓથોરિટ ઑફ ગુજરાતના ડિરેક્ટર જનરલ અને અતિથિ વિશેષ જાણીતા ઈન્ફ્લુએન્સર સપના વ્યાસની ઉપસ્થિતિમાં રાજ્યની પ્રતિભાશાળી મહિલા ખેલાડીઓને વિવિધ શ્રેણીમાં એવોર્ડ આપી નવાજવામાં આવ્યા હતા.
આ પ્રસંગે સ્પોર્ટ્સ ઓથોરિટ ઑફ ગુજરાતના ડિરેક્ટર જનરલ આઈ. આર. વાળાએ પ્રાસંગિક ઉદ્બોધન આપતા જણાવ્યું હતું કે વર્ષ 2010માં તત્કાલીન મુખ્યમંત્રી અને વર્તમાન વડાપ્રધાન નરેન્દ્ર મોદી દ્વારા શરૂ કરાયેલ ‘ખેલ મહાકુંભ’ આજે એક વટવૃક્ષ બની ગયું છે. છેલ્લા ખેલ મહાકુંભમાં નોંધાયેલા 72 લાખ રમતવીરો પૈકી 29 લાખ મહિલા રમતવીરો છે, જે રાજ્યમાં રમતગમત પ્રત્યે વધતી જાગૃતિનું ઉત્તમ ઉદાહરણ છે.
વધુમાં આઈ. આર. વાળાએ ઉમેર્યું કે, સરકાર ‘ઇન-સ્કૂલ’ અને ‘DLSS’ જેવી યોજનાઓ દ્વારા ખેલાડીઓનો રહેવા, જમવા અને તાલીમનો તમામ ખર્ચ ઉઠાવી રહી છે. વર્ષ 2036ના ઓલિમ્પિકને ધ્યાનમાં રાખીને ગુજરાતના ખેલાડીઓ મેડલ ટેલીમાં સ્થાન મેળવે તે માટે સરકાર અને વાલીઓના સામૂહિક પ્રયાસો અનિવાર્ય છે.
અતિથિ વિશેષ અને જાણીતા ઈન્ફ્લુએન્સર સપના વ્યાસે મહિલાઓને પ્રોત્સાહિત કરતા જણાવ્યું હતું કે સ્ત્રીઓએ એકબીજાની દુશ્મન બનવાને બદલે એકબીજાનો હાથ પકડીને આગળ લાવવા પ્રયત્ન કરવો જોઈએ. સમાજની જૂની માન્યતાઓને તોડીને મહિલાઓએ મજબૂત મિત્રતા કેળવવી જોઈએ, જે આજના માનસિક સ્વાસ્થ્યના યુગમાં અત્યંત અનિવાર્ય છે.
SJAGના પ્રમુખ તુષાર ત્રિવેદીએ એસોસિએશનના ઉદ્દેશ્ય વિશે વાત કરતા જણાવ્યું કે, છેલ્લા 15 વર્ષથી SJAG ખેલાડીઓની સિદ્ધિઓને જનતા સુધી પહોંચાડવાનું કાર્ય કરે છે. ખાસ કરીને કોઈ પ્રતિભાશાળી મહિલા ખેલાડી સન્માનથી વંચિત ન રહી જાય તે માટે આ વિશેષ આયોજન કરવામાં આવ્યું છે.
એસોસિએશનના પેટ્રન હિતેશ પટેલે કહ્યું કે, મુખ્યમંત્રી ભૂપેન્દ્ર પટેલના માર્ગદર્શન હેઠળ નારણપુરામાં વીર સાવરકર સ્પોર્ટ્સ સ્ટેડિયમ જેવી અત્યાધુનિક સુવિધાઓ ઊભી કરવામાં આવી છે, જે ગ્રામીણ અને શહેરી તમામ ખેલાડીઓ માટે આશીર્વાદરૂપ બનશે.
આ સમારોહમાં મહિલાઓને વિવિધ કેટેગરીમાં એવોર્ડ એનાયત કરવામાં આવ્યા હતા.
ઈમર્જીંગ પ્લેયર
– ભાર્ગવી ભગોરા (તીરંદજી)
– વાકા લક્ષ્મી (ચેસ)
– ચાર્લી સોલંકી (ક્રિકેટ)
પ્લેયર ઓફ ધ ગેમ
– મૈત્રી પઢિયાર (તીરંદાજી)
– રિધ્ધિબા વાઘેલા ( હોકી-લેક્રોસ)
– કાજલ વાજા (એથ્લેટિક્સ)
– પ્રથા પવાર (ટેબલ ટેનિસ)
– આહના જયોર્જ (બાસ્કેટબોલ)
પ્રાઈડ ઓફ ગુજરાત એવોર્ડ
– પારુલ પરમાર (પેરા બેડમિન્ટન)
– નિરમા ઠાકોર (એથ્લેટિક્સ-મેરાથોન)
– ઓપીના ભીલાર (ખો-ખો)
– રીતુ પ્રજાપતિ (ફેન્સિંગ)
– ગરિમા વ્યાસ (પેરા સ્વિમિંગ)
– દ્રષ્ટિ પંત (ફૂટબોલ-ફૂટસલ)
– પૂજા ટીકમાની (હાફ મેરાથોન)
કોન્ટ્રિબ્યૂશન ઈન સ્પોર્ટ્સ
– રચના કામાણી (ફૂટબોલ)
લાઈફ ટાઈમ એચિવમેન્ટ એવોર્ડ
– Lef. નૌરીન જે. વેપન્ના (હોકી-સ્પોટર્સ મેન્ટર)
આ કાર્યક્રમમાં સ્પોર્ટ્સ જર્નાલિસ્ટ્સ એસોસિએશન ઓફ ગુજરાત (SJAG) નાં હોદ્દેદારો પ્રમુખ તુષાર ત્રિવેદી, સેક્રેટરી નરેન્દ્ર આઈ. પંચોલી, જોઈન્ટ સેક્રેટરી અશોક મિસ્ત્રી અને જિજ્ઞેશ વોરા, એક્ઝિક્યુટીવ કમિટીના સભ્યો અલી અસગર દેવજાણી, રાકેશ ગાંધી, સાબુ ચેરિયન, પેટર્ન હિતેષ પટેલ (પોચી) ઉપરાંત રામકૃષ્ણ પંડિત, શૈલેષ નાયક, ઉદય પટેલ સહિત વરિષ્ઠ પત્રકારો, રમતગમત પ્રેમીઓ અને વિવિધ એસોસિએશનના પ્રતિનિધિઓ મોટી સંખ્યામાં ઉપસ્થિત રહ્યા હતા.
