ખાતાધારકો માટે ઉપાડ મર્યાદા ₹1 લાખ નક્કી, નવા લોન અને ડિપોઝિટ પર પણ રોક
મુંબઈ
ભારતીય રિઝર્વ બેન્ક (RBI)એ ગ્રાહકોના હિતોની સુરક્ષાને ધ્યાનમાં રાખીને મુંબઈ સ્થિત મોગાવીરા કો-ઓપરેટિવ બેન્ક પર અનેક પ્રતિબંધો લગાવ્યા છે. બેન્કની નબળી આર્થિક સ્થિતિ અને નિયમનકારી ચિંતાઓને કારણે આ કાર્યવાહી કરવામાં આવી છે. RBIના આદેશ મુજબ પ્રતિબંધો 12 જૂનના રોજ કામકાજ પૂર્ણ થયા બાદથી અમલમાં આવ્યા છે અને આગામી છ મહિના સુધી લાગુ રહેશે.
ગ્રાહકો કેટલા રૂપિયા ઉપાડી શકશે?
RBIના નિર્દેશો અનુસાર બેન્કના ખાતાધારકો પોતાના બચત, ચાલુ અથવા અન્ય ખાતાઓમાંથી મહત્તમ ₹1 લાખ સુધીની જ રકમ ઉપાડી શકશે. આ મર્યાદા બેન્કની વર્તમાન રોકડ સ્થિતિને ધ્યાનમાં રાખીને નક્કી કરવામાં આવી છે. જોકે, RBIએ જણાવ્યું છે કે પરિસ્થિતિની સમયાંતરે સમીક્ષા કરવામાં આવશે.
બેન્કની કામગીરી પર અનેક નિયંત્રણો
પ્રતિબંધો હેઠળ મોગાવીરા કો-ઓપરેટિવ બેન્ક હવે કોઈ નવા લોન મંજૂર કરી શકશે નહીં તેમજ હાલની લોનનું રિન્યૂઅલ પણ કરી શકશે નહીં. ઉપરાંત, બેન્ક નવા રોકાણો કરી શકશે નહીં, નવી ડિપોઝિટ સ્વીકારી શકશે નહીં અને કોઈ નવી નાણાકીય જવાબદારી પણ લઈ શકશે નહીં. નવા નાણાં ઉછીના લેવા પર પણ પ્રતિબંધ લાદવામાં આવ્યો છે.
RBIએ કેમ લીધો નિર્ણય?
RBIએ જણાવ્યું છે કે બેન્કની કામગીરીમાં સુધારો લાવવા માટે તેના બોર્ડ ઓફ ડિરેક્ટર્સ અને વરિષ્ઠ મેનેજમેન્ટ સાથે સતત સંપર્ક રાખવામાં આવ્યો હતો. તેમ છતાં બેન્ક મોનિટરિંગ સંબંધિત ચિંતાઓ દૂર કરવામાં અને જમાકર્તાઓના હિતોની પૂરતી સુરક્ષા કરવામાં નિષ્ફળ રહી હતી. જેના કારણે આ કડક પગલાં લેવા જરૂરી બન્યા.
ગ્રાહકોના પૈસાનું શું થશે?
RBIએ સ્પષ્ટ કર્યું છે કે આ પગલાંનો અર્થ બેન્કનું લાયસન્સ રદ કરવું નથી, પરંતુ નાણાકીય સ્થિતિ સુધરે ત્યાં સુધી નિયંત્રણો લાગુ રહેશે. જોકે તાજેતરમાં મહારાષ્ટ્રની ‘ધ યશવંત સહકારી બેન્ક’નું લાયસન્સ રદ કરાયાનું ઉદાહરણ પણ સામે આવ્યું છે.
જો કોઈ બેન્ક લિક્વિડેશન પ્રક્રિયામાં જાય તો ગ્રાહકોને ડિપોઝિટ ઈન્સ્યોરન્સ એન્ડ ક્રેડિટ ગેરંટી કોર્પોરેશન (DICGC) હેઠળ મહત્તમ ₹5 લાખ સુધીની જમા રકમનું વીમા સુરક્ષણ મળે છે. RBIના જણાવ્યા અનુસાર યશવંત સહકારી બેન્કના 99.02 ટકા જમાકર્તાઓ તેમની સંપૂર્ણ જમા રકમ મેળવવા પાત્ર હતા. મોગાવીરા કો-ઓપરેટિવ બેન્કના ગ્રાહકો માટે હાલ મુખ્ય બાબત એ છે કે બેન્ક પર પ્રતિબંધો લાગુ થયા છે, પરંતુ બેન્કનું લાયસન્સ હજુ યથાવત છે અને RBI પરિસ્થિતિ પર સતત નજર રાખી રહ્યું છે.
