ચીનમાં ઘટતી વસ્તી વચ્ચે સરકારનો મોટો નિર્ણય: હવે AI ચેટબોટ્સ નહીં કરી શકે પ્રેમની વાતો

બેઈજિંગ

ચીનમાં ઘટી રહેલી વસ્તી અને નીચા જન્મદરમાં સુધારો કરવા માટે સરકારે એક કડક અને મોટો નિર્ણય લીધો છે. હવે ટેક કંપનીઓ એવા આર્ટિફિશિયલ ઇન્ટેલિજન્સ (AI) ચેટબોટ્સ નહીં બનાવી શકે, જે યુઝર્સને ભાવનાત્મક (ઇમોશનલ) રીતે પોતાના પર નિર્ભર બનાવે અથવા તેમની સાથે રોમેન્ટિક વાતો કરે. આ સાથે જ નવા નિયમો હેઠળ સગીરો માટે AI સાથેના વર્ચ્યુઅલ પ્રેમસંબંધો પર પણ સંપૂર્ણ પ્રતિબંધ મૂકવામાં આવ્યો છે.

વાસ્તવિક સંબંધોને પ્રોત્સાહન આપવાનો હેતુ

ચીન સરકારની આ ચિંતાનું મુખ્ય કારણ દેશમાં સતત ઘટી રહેલો જન્મદર અને વસ્તીમાં ઘટાડો છે. સરકારી અધિકારીઓનું માનવું છે કે જો યુવાનો AI ચેટબોટ્સ સાથે જ ગાઢ ભાવનાત્મક સંબંધો બાંધવા લાગશે, તો તેઓ વાસ્તવિક દુનિયામાં સંબંધો બનાવવા, લગ્ન કરવા અને પરિવાર શરૂ કરવાનું ટાળશે. આ જ કારણ છે કે સરકારે AI સાથીઓ દ્વારા ઊભી થતી આ નિર્ભરતાને અટકાવવા માટે આ કડક પગલાં લીધાં છે.

ટેક કંપનીઓ પર નવો અંકુશ

• ભાવનાત્મક આદત પર રોક: અલીબાબા અને બાઇટડાન્સ જેવી દિગ્ગજ ટેક કંપનીઓના AI પ્રોડક્ટ્સ પર પણ આ નિયમો લાગુ થશે. આ કંપનીઓએ યુઝર્સને જણાવ્યું છે કે નવા નિયમોનું પાલન કરવા માટે કેટલાક ચેટબોટ ફીચર્સ બંધ કરવામાં આવશે.
• ઇમરજન્સી એલર્ટની વ્યવસ્થા: જો કોઈ ચેટબોટને વાતચીત દરમિયાન એવું લાગે કે યુઝર ખૂબ જ તણાવ કે ડિપ્રેશનમાં છે, તો કંપનીએ તાત્કાલિક યુઝરના પરિવાર કે ઇમરજન્સી કોન્ટેક્ટને જાણ કરવી પડશે.
• સરકારી મંજૂરી ફરજિયાત: નવા નિયમો હેઠળ બજારમાં આવતા પહેલા તમામ AI ચેટબોટ્સ અને સેવાઓએ સરકારી રિવ્યુ પ્રોસેસમાંથી પસાર થવું પડશે. સરકાર પાસે અસુરક્ષિત જણાતી સેવાઓને તાત્કાલિક બંધ કરવાનો પણ વિશેષ અધિકાર રહેશે.

અમેરિકાના કેટલાક રાજ્યોમાં માત્ર એ યાદ અપાવવાના નિયમો છે કે ચેટબોટ કોઈ ઇન્સાન નથી, પરંતુ ચીનના આ નવા નિયમો તેના કરતા પણ ઘણા વધુ કડક છે, જેથી દેશના યુવાનોને વર્ચ્યુઅલ દુનિયામાંથી બહાર લાવીને વાસ્તવિક જીવન તરફ પ્રેરિત કરી શકાય.