ગાંધીનગરમાં રમાઈ રહેલી જૂનિયર બોયઝ ઇન્ટર ડિસ્ટ્રિક્ટ ફૂટબોલ ટુર્નામેન્ટમાં 23 જિલ્લાની ટીમો વચ્ચે રસાકસી; નેશનલ કેમ્પ માટે ખેલાડીઓની પસંદગી પર સૌની નજર
ગાંધીનગર
ગુજરાત સ્ટેટ ફૂટબોલ એસોસિએશનના આયોજન હેઠળ ગાંધીનગરમાં 35મી બલરામ ક્ષેત્રીય મેમોરિયલ ટ્રોફી–2026 અંતર્ગત જૂનિયર બોયઝ ઇન્ટર ડિસ્ટ્રિક્ટ ફૂટબોલ ટુર્નામેન્ટનું રોમાંચક આયોજન ચાલી રહ્યું છે. રાજ્યના 23 જિલ્લાની ટીમો આ પ્રતિષ્ઠિત ટુર્નામેન્ટમાં ભાગ લઈ રહી છે. તમામ ટીમોને સાત ગ્રુપમાં વહેંચવામાં આવી છે અને હાલ ગ્રુપ સ્ટેજની મેચો રમાઈ રહી છે. આ ટુર્નામેન્ટમાંથી ગુજરાતની નેશનલ ટીમના કેમ્પ માટે પ્રતિભાશાળી ખેલાડીઓની પસંદગી પણ કરવામાં આવનાર હોવાથી દરેક મુકાબલો મહત્વનો બની ગયો છે.
23 જિલ્લાની ટીમો વચ્ચે પ્રતિસ્પર્ધા
રાજ્યભરના યુવા ફૂટબોલરોને પોતાની પ્રતિભા દર્શાવવાનો ઉત્તમ મંચ પૂરો પાડતી આ ટુર્નામેન્ટમાં 23 જિલ્લાની ટીમો મેદાનમાં ઉતરી છે. ગ્રુપ સ્ટેજના દરેક મુકાબલામાં ખેલાડીઓ જીત માટે સંપૂર્ણ શક્તિ લગાવી રહ્યા છે. નેશનલ કેમ્પમાં સ્થાન મેળવવાની તક હોવાથી ખેલાડીઓમાં વિશેષ ઉત્સાહ જોવા મળી રહ્યો છે.
મહેસાણાએ જામનગરને 2-0થી હરાવ્યું
દિવસની પ્રથમ મેચમાં મહેસાણા ટીમે શાનદાર રમતનું પ્રદર્શન કરતાં જામનગર સામે 2-0થી જીત નોંધાવી હતી. મહેસાણા તરફથી મૃતુંજય પંચાલ અને અવધૂ પટેલે એક-એક ગોલ ફટકારી ટીમને મહત્વપૂર્ણ વિજય અપાવ્યો. બંને ખેલાડીઓએ આક્રમક રમત બતાવી ટીમને ગ્રુપમાં મજબૂત શરૂઆત અપાવી.
રાજકોટ અને આણંદની એકતરફી જીત
બીજી મેચમાં રાજકોટની ટીમે છોટાઉદેપુર સામે સંપૂર્ણ પ્રભુત્વ જમાવી આસાનીથી વિજય મેળવ્યો. રાજકોટ માટે જાગાણી આરવ, અનિકેત ગુપ્તા, નિત્યારાજસિંહ અને એડમ ગૂસાઈએ એક-એક ગોલ નોંધાવી ટીમને યાદગાર જીત અપાવી.
ત્રીજી મેચમાં આણંદની ટીમે પંચમહાલ સામે 4-0થી એકતરફી વિજય મેળવ્યો. આણંદ માટે અમને બે ગોલ કર્યા, જ્યારે તનીશ અને શ્રીલે એક-એક ગોલ નોંધાવ્યો. આક્રમક રમતના કારણે પંચમહાલની ટીમ આખી મેચ દરમિયાન દબાણમાં રહી.
મહીસાગર અને અમદાવાદનો પણ વિજય
ચોથી મેચમાં મહીસાગરે પાટણ સામે 2-1થી જીત મેળવી હતી. મહીસાગર તરફથી અથર્વ દવે અને ગ્લેન પરેરાએ એક-એક ગોલ કર્યો હતો, જ્યારે પાટણ માટે સ્મિત સુરતીએ એકમાત્ર ગોલ નોંધાવ્યો હતો.
દિવસની છેલ્લી મેચમાં અમદાવાદની ટીમે જુનાગઢ સામે પ્રભાવશાળી પ્રદર્શન કરતાં આસાનીથી વિજય મેળવ્યો. અમદાવાદ તરફથી નાયક પર્વ, ઐશાન પટેલ, આર્યવીરસિંહ, કર્મદિત્યસિંહ અને વેદાંતે ગોલ નોંધાવી ટીમની જીતમાં મહત્વનું યોગદાન આપ્યું.
22 જુલાઈએ પાંચ મહત્વપૂર્ણ મુકાબલા
ટુર્નામેન્ટમાં બુધવાર, 22 જુલાઈએ પણ પાંચ રસપ્રદ મુકાબલા રમાશે. પ્રથમ મેચમાં છોટાઉદેપુર અને જામનગર આમને-સામને આવશે. ત્યારબાદ મહેસાણા સામે રાજકોટ, મહીસાગર સામે આણંદ, પંચમહાલ સામે પાટણ અને દિવસની છેલ્લી મેચમાં જુનાગઢ સામે કચ્છની ટીમ ટકરાશે. ગ્રુપ સ્ટેજમાં સ્થાન મજબૂત બનાવવા માટે આ તમામ મુકાબલા નિર્ણાયક સાબિત થઈ શકે છે.
