કોલંબો ટેસ્ટ બચાવનાર સોનલ દિનુશા 29 સ્થાન ઉપર પહોંચ્યા, ભારતીય ખેલાડીઓનું પણ શાનદાર પ્રદર્શન
દુબઈ:
આઈસીસી દ્વારા ટેસ્ટ ક્રિકેટની નવી રેન્કિંગ જાહેર કરવામાં આવી છે, જેમાં પાકિસ્તાનના સ્ટાર બેટ્સમેન બાબર આઝમ ટોપ-10માંથી બહાર થઈ ગયા છે. આ તરફ, ભારત સામેની કોલંબો ટેસ્ટની બંને ઇનિંગ્સમાં શાનદાર સદી ફટકારીને શ્રીલંકાને હારથી બચાવનાર સોનલ દિનુશાએ રેન્કિંગમાં 29 સ્થાનની લાંબી છલાંગ લગાવી છે અને તે હવે 25મા સ્થાને પહોંચી ગયા છે.
સોનલ દિનુશા અને ભારતીય બેટ્સમેનોનું શાનદાર પ્રદર્શન
શ્રીલંકાના ડાબોડી બેટ્સમેન સોનલ દિનુશાએ ભારત વિરુદ્ધ કોલંબો ટેસ્ટની બંને ઇનિંગ્સમાં સદી ફટકારીને કમાલ કર્યો હતો, જેના કારણે મેચ ડ્રો રહી હતી. આ પ્રદર્શનના આધારે તેઓ સીધા 25મા સ્થાને પહોંચી ગયા છે. આ ઉપરાંત, ભારતના દેવદત્ત પડિક્કલે પ્રથમ ઇનિંગ્સમાં 117 રન બનાવીને પાંચ સ્થાનની છલાંગ લગાવી છે અને કારકિર્દીની સર્વશ્રેષ્ઠ 54મી રેન્કિંગ હાંસલ કરી છે. ધ्रुવ જુરલે પણ અણનમ 115 રનની ઇનિંગ્સ રમીને 83મા સ્થાનમાંથી સીધા 65મા સ્થાને જગ્યા બનાવી લીધી છે.
ટેસ્ટ બેટિંગ રેન્કિંગમાં ભારતીયોનો દબદબો
આઈસીસીની તાજી ટેસ્ટ બેટિંગ રેન્કિંગમાં રિષભ પંત સાતમા સ્થાન સાથે ટોચના ભારતીય બેટ્સમેન તરીકે યથાવત છે, જ્યારે કેપ્ટન શુભમન ગિલ બે સ્થાન ઘસીને 9મા સ્થાને આવ્યા છે. ઈંગ્લેન્ડના કેપ્ટન હેરી બ્રુક રેન્કિંગમાં પ્રથમ નંબર પર જળવાઈ રહ્યા છે. બીજી ઇનિંગ્સમાં અડધી સદી ફટકારનાર શ્રીલંકાના કામિંદુ મેન્ડિસે પણ ટોપ-10માં પુનરાગમન કર્યું છે. બોલિંગ વિભાગમાં શ્રીલંકાના ઝડપી બોલર અસિથા ફર્નાન્ડો 11મા સ્થાને પહોંચ્યા છે, જ્યારે ભારતીય સ્પિનર માનવ સુથાર 44મા અને મોહમ્મદ સિરાજ 17મા સ્થાને પહોંચી ગયા છે.
રોબિન્સન અને જોશ ટંગને મોટો ફાયદો
ઈંગ્લેન્ડના ઝડપી બોલરો ઓલી રોબિન્સન અને જોશ ટંગને પાકિસ્તાન સામેની ટેસ્ટ શ્રેણીમાં શાનદાર પ્રદર્શનનો મોટો ફાયદો મળ્યો છે. રોબિન્સન મેચમાં કુલ 8 વિકેટ ઝડપીને 6 સ્થાનની છલાંગ લગાવીને પાંચમા સ્થાને પહોંચી ગયા છે. જ્યારે જોશ ટંગ ચાર સ્થાન ઉપર ચઢીને કારકિર્દીની સર્વશ્રેષ્ઠ 13મી રેન્કિંગ પર પહોંચ્યા છે. પાકિસ્તાનના ઝડપી બોલર મોહમ્મદ અબ્બાસ 9 વિકેટ ઝડપીને સંયુક્ત રીતે 15મા સ્થાને આવી ગયા છે.
બાબર આઝમ ટોપ-10માંથી બહાર, ડેવાલ્ડ બ્રેવિસ ટી-20માં ટોપ-5માં સામેલ
પાકિસ્તાનના બેટ્સમેન સાઉદ શકીલે 97 રનની ઇનિંગ્સના દમ પર 15 સ્થાનની છલાંગ લગાવીને 18મું સ્થાન મેળવ્યું છે અને હવે તે બાબત આઝમ પછી પાકિસ્તાનના બીજા સૌથી ઊંચી રેન્કિંગવાળા બેટ્સમેન બની ગયા છે. બીજી તરફ, કેપ્ટન બાબર આઝમ પાંચ સ્થાન ગગડીને 15મા સ્થાને સરકી ગયા છે. આ સિવાય, સાઉથ આફ્રિકાના યુવા ખેલાડી ડેવાલ્ડ બ્રેવિસે ત્રિકોણીય શ્રેણીમાં શાનદાર પ્રદર્શન કરીને ટી-20 ઇન્ટરનેશનલ બેટિંગ રેન્કિંગમાં ચોથું સ્થાન પ્રાપ્ત કરી લીધું છે.
