અમદાવાદમાં વોલીબોલ ચેમ્પિયન્સ લીગની ટ્રોફીનું અનાવરણ , ખેલાડીઓની પ્રથમ હરાજી યોજાઈ

ધિરજ મંજેરી અને કુલવંત બાલિયાને ટ્રોફીનું અનાવરણ કર્યું; પ્રથમ સિઝન માટે ટીમો અને ખેલાડીઓની રચનાની પ્રક્રિયાને વેગ મળ્યોઃ ખેલાડીને ઓછામાં ઓછા 3 લાખથી લઈને 25 લાખથી વધુની રકમ મળશે

અમદાવાદ,

વોલીબોલ ચેમ્પિયન્સ લીગ (VCL)એ રવિવારે અમદાવાદમાં પોતાની ચેમ્પિયનશિપ ટ્રોફીનું અનાવરણ કરવાની સાથે પ્રથમ પ્લેયર ઓક્શનનું આયોજન કર્યું હતું. લીગની પ્રથમ સિઝન શરૂ થાય તે પહેલાં યોજાયેલો આ કાર્યક્રમ VCL માટે મહત્વપૂર્ણ સીમાચિહ્ન બની રહ્યો છે. ધ લીલા ગાંધીનગર ખાતે યોજાયેલા કાર્યક્રમમાં લીગના સ્થાપકો ધિરજ મંજેરી અને કુલવંત બાલિયાને ટ્રોફીનું અનાવરણ કર્યું હતું.

ટ્રોફી અનાવરણ સાથે પ્રથમ સિઝનની તૈયારીઓને વેગ

કાર્યક્રમ દરમિયાન VCLના સ્થાપકોએ લીગની પ્રથમ ટુર્નામેન્ટ અંગેની યોજનાઓ રજૂ કરી હતી. તેમાં ટીમોની રચના, ખેલાડીઓની પસંદગી અને આગામી સિઝન માટેના રોડમેપ અંગે માહિતી આપવામાં આવી હતી. ટ્રોફીનું અનાવરણ લીગની સ્પર્ધાત્મક સફરની શરૂઆતના મહત્વપૂર્ણ તબક્કા તરીકે જોવામાં આવી રહ્યું છે.

ખેલાડીઓ અને ટીમો એક મંચ પર

પ્રથમ પ્લેયર ઓક્શન દરમિયાન વિવિધ ટીમો અને ખેલાડીઓ એકસાથે આવ્યા હતા. ઓક્શન દ્વારા લીગની ટીમોએ પોતાની સ્ક્વોડ તૈયાર કરવાની દિશામાં પ્રથમ મહત્વપૂર્ણ પગલું ભર્યું હતું. આ કાર્યક્રમ સાથે ગુજરાતમાં પ્રથમ વખત રાષ્ટ્રીય સ્તરની પ્રોફેશનલ વોલીબોલ લીગ માટે પ્લેયર ઓક્શન યોજાયું હોવાનો દાવો કરવામાં આવ્યો છે.

‘ખેલાડીઓને પ્રોફેશનલ પ્લેટફોર્મ આપવાનો ઉદ્દેશ’

VCLના સ્થાપક ધિરજ મંજેરીએ જણાવ્યું હતું કે ટ્રોફીનું અનાવરણ અને પ્લેયર ઓક્શન લીગ માટે મહત્વપૂર્ણ પડાવ છે. તેમણે કહ્યું કે હવે લીગ આયોજનના તબક્કામાંથી મેદાન પર અમલીકરણ તરફ આગળ વધી રહી છે. VCLનો હેતુ વોલીબોલ ખેલાડીઓને એવું પ્રોફેશનલ પ્લેટફોર્મ આપવાનો છે, જ્યાં તેઓ ઉચ્ચ સ્તરે સ્પર્ધા કરી શકે, પોતાની ક્ષમતાનો વિકાસ કરી શકે અને રમતમાં સફળ કારકિર્દી બનાવી શકે.

તેમણે વધુમાં જણાવ્યું કે લીગ દ્વારા ખેલાડીઓને ઉચ્ચ સ્તરે પ્રદર્શન કરવાની તક આપવાની સાથે સમગ્ર ભારતમાં ચાહકો સુધી સ્પર્ધાત્મક વોલીબોલ પહોંચાડવાનો પ્રયાસ કરવામાં આવશે.

‘ઓક્શનથી ભારતીય પ્રતિભાની ઝલક મળી’

VCLના અન્ય સ્થાપક કુલવંત બાલિયાને ઓક્શનના પ્રતિસાદને પ્રોત્સાહક ગણાવ્યો હતો. તેમના જણાવ્યા અનુસાર, ઓક્શનથી ભારતીય વોલીબોલમાં ઉપલબ્ધ પ્રતિભા અંગે સ્પષ્ટ અંદાજ મળ્યો છે. તેમણે કહ્યું કે VCLનું લક્ષ્ય એવી સુવ્યવસ્થિત લીગ ઊભી કરવાનું છે, જે ખેલાડીઓ અને ટીમોને લાંબા ગાળે સહયોગ આપી શકે. તેમણે કહ્યું કે હરાજીમાં કેટેગરી અનુસાર બેઝ પ્રાઈઝ છે જેમાં ઓછામાં ઓછા 3 લાખ રુપિયા અને 25 લાખથી વધુની રકમ પણ ખેલાડીને મળે એમ છે.

કુલવંત બાલિયાને ઉમેર્યું કે ચેમ્પિયનશિપ ટ્રોફી એ સિઝનમાં ટીમો જે ખિતાબ માટે સ્પર્ધા કરશે તેનું પ્રતીક છે, જ્યારે પ્લેયર ઓક્શન લીગના સ્પર્ધાત્મક તબક્કાની શરૂઆત દર્શાવે છે.

8 જુલાઈએ થઈ હતી VCLની સત્તાવાર જાહેરાત

વોલીબોલ ચેમ્પિયન્સ લીગની સત્તાવાર શરૂઆત 8 જુલાઈ, 2026ના રોજ ધિરજ મંજેરી અને કુલવંત બાલિયાને કરી હતી. લીગનો મુખ્ય ઉદ્દેશ ભારતમાં વોલીબોલ ખેલાડીઓ માટે પ્રોફેશનલ પ્લેટફોર્મ ઊભું કરવો અને રમતના સમગ્ર ઇકોસિસ્ટમને મજબૂત બનાવવાનો છે.

VCLની પ્રથમ સિઝનમાં ઉચ્ચ કક્ષાના ખેલાડીઓ અને ટીમો ભાગ લેશે. સુવ્યવસ્થિત સ્પર્ધા દ્વારા ચાહકોને ઉચ્ચ સ્તરની વોલીબોલ મેચોનો અનુભવ કરાવવાની સાથે ભારતમાં આ રમત માટે વધુ મજબૂત માળખું ઊભું કરવાનો પ્રયાસ કરવામાં આવશે.

હવે ટીમોનું ધ્યાન પ્રથમ સિઝન પર

ટ્રોફીનું અનાવરણ અને પ્રથમ પ્લેયર ઓક્શન પૂર્ણ થયા બાદ VCL હવે આગામી તબક્કાની તૈયારીઓ તરફ આગળ વધશે. ટીમો અને ખેલાડીઓ પ્રથમ સિઝનમાં શ્રેષ્ઠ પ્રદર્શન કરવા માટે તૈયારીઓ શરૂ કરશે.