રાજભાષા હિન્દીના શ્રેષ્ઠ અમલીકરણ બદલ સંરક્ષણ મંત્રાલયને ‘રાજભાષા કીર્તિ પુરસ્કાર’માં પ્રથમ સ્થાન

300થી વધુ કર્મચારીઓ ધરાવતા મંત્રાલયો/વિભાગોની શ્રેણીમાં સંરક્ષણ મંત્રાલય પ્રથમ સ્થાને; ગૃહમંત્રી અમિત શાહે અધિક સચિવ મનીષ ત્રિપાઠીને પુરસ્કાર અર્પણ કર્યો

નવી દિલ્હી

રાજભાષા હિન્દીના ક્ષેત્રમાં ઉત્કૃષ્ટ અમલીકરણ બદલ ભારત સરકારના ગૃહ મંત્રાલયના રાજભાષા વિભાગ દ્વારા વર્ષ 2025-26 માટે સંરક્ષણ મંત્રાલયને ‘રાજભાષા કીર્તિ પુરસ્કાર’થી સન્માનિત કરવામાં આવ્યું છે. 300થી વધુ કર્મચારીઓ ધરાવતા મંત્રાલયો અને વિભાગોની શ્રેણીમાં સંરક્ષણ મંત્રાલયે પ્રથમ સ્થાન મેળવ્યું છે.

હિન્દી દિવસ નિમિત્તે પુરસ્કાર એનાયત

આ પ્રતિષ્ઠિત પુરસ્કાર 14 સપ્ટેમ્બર 2026ના રોજ હિન્દી દિવસ નિમિત્તે નવી મુંબઈના સિડકો એક્ઝિબિશન સેન્ટર ખાતે આયોજિત હિન્દી દિવસ સમારોહ અને છઠ્ઠા અખિલ ભારતીય રાજભાષા સંમેલન દરમિયાન એનાયત કરવામાં આવ્યો હતો. ગૃહ અને સહકારિતા મંત્રી અમિત શાહે સંરક્ષણ મંત્રાલયના અધિક સચિવ મનીષ ત્રિપાઠીને આ સન્માન અર્પણ કર્યું હતું.

સરકારી કામગીરીમાં હિન્દીના ગુણવત્તાયુક્ત ઉપયોગને પ્રોત્સાહન

આ પુરસ્કાર સંરક્ષણ મંત્રાલયમાં રાજભાષા હિન્દીના ઉત્કૃષ્ટ ઉપયોગ, અસરકારક અમલીકરણ અને હિન્દી પ્રત્યેની સતત પ્રતિબદ્ધતાને માન્યતા આપે છે. સરકારી કામગીરીમાં હિન્દીના વધુમાં વધુ અને ગુણવત્તાયુક્ત ઉપયોગને પ્રોત્સાહન આપવા માટે મંત્રાલય દ્વારા કરવામાં આવી રહેલા સતત પ્રયાસોને પણ આ સન્માનથી બિરદાવવામાં આવ્યા છે.

દેશભરમાંથી 7 હજાર જેટલા હિન્દી સેવીઓની ભાગીદારી

ગૃહ મંત્રાલયના રાજભાષા વિભાગ દ્વારા આયોજિત આ બે દિવસીય સંમેલનમાં કેન્દ્ર સરકારના વિવિધ મંત્રાલયો અને વિભાગો, જાહેર ક્ષેત્રના ઉપક્રમો, બેંકો તેમજ નગર રાજભાષા કાર્યાન્વયન સમિતિઓ (નરાકાસ)ના અધિકારીઓ સહિત દેશભરમાંથી અંદાજે 7,000 હિન્દી સેવીઓ ભાગ લઈ રહ્યા છે.

મહારાષ્ટ્રના મુખ્યમંત્રી સહિત અનેક મહાનુભાવો ઉપસ્થિત

હિન્દી દિવસ સમારોહમાં મહારાષ્ટ્રના મુખ્યમંત્રી દેવેન્દ્ર ફડણવીસ, નાયબ મુખ્યમંત્રી એકનાથ શિંદે તેમજ નાયબ મુખ્યમંત્રી સુનેત્રા અજિતદાદા પવાર સહિત અનેક મહાનુભાવો ઉપસ્થિત રહ્યા હતા.