ગુજરાતમાં ૨૭મા “વિશ્વ દ્રષ્ટિ દિવસ”ની ઉજવણી

‘મોતિયા અંધત્વ મુક્ત ગુજરાત’ અભિયાન હેઠળ મોંઘી નેત્ર સારવાર વિનામૂલ્યે; રાષ્ટ્રીય નેત્રજ્યોતિ અભિયાનમાં ગુજરાત દેશમાં અગ્રેસર

અમદાવાદ

વિશ્વ આરોગ્ય સંસ્થા (WHO)ના નિર્દેશ અનુસાર દર વર્ષે ઓક્ટોબરના બીજા ગુરુવારે વિશ્વભરમાં “વિશ્વ દ્રષ્ટિ દિવસ” (World Sight Day)ની ઉજવણી કરવામાં આવે છે. આ અંતર્ગત આરોગ્ય મંત્રી પ્રફુલ પાનશેરીયાના માર્ગદર્શન હેઠળ અમદાવાદ સિવિલ હોસ્પિટલની ૧૨૦૦ બેડની હોસ્પિટલ ખાતે ૨૭મા “વિશ્વ દ્રષ્ટિ દિવસ”ની રાજ્યકક્ષાની ઉજવણી કરવામાં આવી રહી છે.

‘Love your Eyes’ થીમ સાથે આંખોની સંભાળ અંગે જાગૃતિ

આ વર્ષે વિશ્વ દ્રષ્ટિ દિવસની વૈશ્વિક થીમ “Love your Eyes” અને **“It’s not just sight, It’s entire future”**ના અભિગમ સાથે ઉજવણી કરવામાં આવી રહી છે. દિવસની ઉજવણીનો મુખ્ય હેતુ નાગરિકોમાં આંખોના સ્વાસ્થ્ય અંગે જાગૃતિ વધારવાનો તેમજ ખાસ કરીને બાળકોમાં વધી રહેલી દ્રષ્ટિ સંબંધિત સમસ્યાઓ અંગે સમાજને સજાગ કરવાનો છે.

આ પ્રસંગે આરોગ્ય મંત્રી પ્રફુલ પાનશેરીયાએ જણાવ્યું હતું કે, સરકાર દ્વારા શરૂ કરવામાં આવેલી “મોતિયા અંધત્વ મુક્ત ગુજરાત” ઝુંબેશ અંતર્ગત નાગરિકોને અત્યાધુનિક તબીબી સુવિધા વિનામૂલ્યે ઉપલબ્ધ કરાવવામાં આવી રહી છે.

₹૬૦થી ₹૮૦ હજારની સારવાર સરકારી વ્યવસ્થામાં નિઃશુલ્ક

ઝુંબેશ હેઠળ મોતિયાના દર્દીઓને અત્યાધુનિક ‘હાઇડ્રોફોબિક નેત્રમણિ’ (IOL) સાથે ‘ફેકોઇમલ્સિફિકેશન’ પદ્ધતિથી વિનામૂલ્યે ઓપરેશનની સુવિધા આપવામાં આવે છે. ખાનગી હોસ્પિટલોમાં આ પ્રકારની સર્જરીનો ખર્ચ અંદાજે ₹૬૦,૦૦૦થી ₹૮૦,૦૦૦ સુધી થતો હોય છે, જ્યારે રાજ્યની સરકારી આરોગ્ય વ્યવસ્થા હેઠળ આ સારવાર નાગરિકોને મફતમાં મળી રહી છે.

રાષ્ટ્રીય નેત્રજ્યોતિ અભિયાનમાં ગુજરાત પ્રથમ ક્રમે

આરોગ્ય મંત્રીએ વધુમાં જણાવ્યું કે કેન્દ્ર સરકારના “રાષ્ટ્રીય નેત્રજ્યોતિ અભિયાન” હેઠળ મોતિયાના સારવાર લક્ષ્યાંકોની સરખામણીમાં ગુજરાતે ઉત્કૃષ્ટ કામગીરી કરી છે અને સમગ્ર દેશમાં સતત પ્રથમ સ્થાન જાળવી રાખ્યું છે.

રાજ્યમાં આધુનિક આરોગ્ય માળખું, મેડિકલ કોલેજો, સુસજ્જ આઇ હોસ્પિટલો અને ચક્ષુદાન કેન્દ્રોના વ્યાપક નેટવર્કના માધ્યમથી નાગરિકોને ગુણવત્તાસભર નેત્ર સારવાર પૂરી પાડવા સરકાર પ્રતિબદ્ધ છે.

૨૦૩૦ સુધી અંધત્વનો દર ૦.૨૦ ટકા કરવાનો લક્ષ્યાંક

રાજ્યમાં અંધત્વનો દર હાલમાં ૦.૨૫ ટકા છે, જેને વર્ષ ૨૦૩૦ સુધીમાં ઘટાડીને ૦.૨૦ ટકા કરવાનો લક્ષ્યાંક રાખવામાં આવ્યો છે. આ માટે ૪૦ વર્ષ કે તેથી વધુ વયના નાગરિકો માટે ત્રિ-સ્તરીય “કોમ્યુનિટી આઈ સ્ક્રિનિંગ” કાર્યક્રમ હાથ ધરાયો છે.

આ અભિયાન અંતર્ગત ગ્રામીણ તેમજ શહેરી વિસ્તારોમાં વયસ્કોની સમયસર આંખોની તપાસ કરવામાં આવશે. દ્રષ્ટિ સંબંધિત સમસ્યાઓનું વહેલું નિદાન થાય અને સમયસર સારવાર મળી રહે તે માટે રાજ્યભરમાં વિશેષ જાગૃતિ અભિયાન પણ યોજાશે.

TECHO+ પોર્ટલ પર ડિજિટલ ટ્રેકિંગ

વિશ્વ દ્રષ્ટિ દિવસના રાજ્યકક્ષાના કાર્યક્રમ દરમિયાન નેત્ર સંભાળને લગતા ડેટા એન્ટ્રી અને ડિજિટલ ટ્રેકિંગ માટે TECHO+ પોર્ટલ પર NPCBVI (રાષ્ટ્રીય અંધત્વ અને દ્રષ્ટિ ખામી નિયંત્રણ કાર્યક્રમ) મોડ્યુલનું અનાવરણ કરવામાં આવશે.

આ ઉપરાંત શાળા આરોગ્ય–રાષ્ટ્રીય બાળ સ્વાસ્થ્ય કાર્યક્રમ (RBSK 2.0) હેઠળ ૦થી ૧૮ વર્ષના બાળકોની દ્રષ્ટિ તપાસ, જરૂરિયાતમંદ બાળકોને વિનામૂલ્યે ચશ્માંનું વિતરણ તથા જરૂરી નેત્ર સારવારના ડેટાને પણ આ પોર્ટલ સાથે સંકલિત કરવામાં આવ્યો છે. પરિણામે દરેક બાળકની નેત્ર સારવારનું ડિજિટલ મોનિટરિંગ શક્ય બનશે.

‘૨૦-૨૦-૨૦ નિયમ’ સહિત આંખોની સંભાળ અંગે માર્ગદર્શન

ડિજિટલ યુગમાં વધતા સ્ક્રીન ટાઇમને ધ્યાનમાં રાખીને નિષ્ણાતો દ્વારા આંખોની સંભાળ અંગે માર્ગદર્શન આપવામાં આવશે. તેમાં આંખોના થાકથી બચવા માટે ‘૨૦-૨૦-૨૦ નિયમ’, બાળકો માટે વધુમાં વધુ આઉટડોર પ્રવૃત્તિઓ, વિટામિન-એથી ભરપૂર પૌષ્ટિક આહાર અને નિયમિત નેત્ર તપાસના મહત્વ અંગે લોકોને માહિતગાર કરવામાં આવશે.