નેશનલ હેલ્થ સર્વિસના મૂળ ભારતીય સાઈકિયાટ્રિસ્ટને છ વર્ષની જેલ

બ્રિટિશ શિક્ષક અહીં કિશોરોને બાળકોને કઈ રીતે ત્રાસ અપાય તે શીખવતો અને આને લગતી તસવીરો પણ મોકલતો હતો

લંડન

બાળકોના જાતીય શોષણને લગતી વેબસાઈટ ચલાવા બદલ નેશનલ હેલ્થ સર્વિસના મૂળ ભારતીય સાઈકિયાટ્રિસ્ટને છ વર્ષની જેલની સજા ફટકારવામાં આવી છે. ભારતમાં કામ કરી ચૂકેલો બ્રિટિશ શિક્ષક અહીં કિશોરોને બાળકોને કઈ રીતે ત્રાસ અપાય તે શીખવતો અને આને લગતી તસવીરો પણ મોકલતો હતો. આ શિક્ષકને પણ કોર્ટે દોષિત જાહેર કર્યો છે. આ બંને અલગ-અલગ કેસો પર ગત અઠવાડિયે ચુકાદા આવ્યા છે.
33 વર્ષીય ડૉ. કબીર ગર્ગે લખનૌની કિંગ જ્યોર્જ મેડિકલ યુનિવર્સિટીમાંથી MBBSનો અભ્યાસ પૂર્ણ કર્યો છે. જે બાદ તે બેંગાલુરુની ઈન્સ્ટીટ્યૂટ ઓફ મેન્ટલ હેલ્થ એન્ડ ન્યૂરોસાયન્સિસ (નિમહન્સ) સાથે જોડાયો હતો. આ ડૉક્ટરને 23 જૂનના રોજ વૂલવિચ ક્રાઉન કોર્ટે સજા ફટકારી છે. તેનું નામ હંમેશા માટે સેક્સ ઓફેન્ડર રજિસ્ટરમાં નોંધાઈ ગયું છે. નવેમ્બર 2022માં કબીર ગર્ગની ધરપકડ કરવામાં આવી હતી. બાળકોને શારીરિક ત્રાસ આપતી તસવીરો પૂરી પાડવા સહિતના આઠ કેસોમાં તે દોષિત જાહેર થયો છે.
જે મહિને કબીર ગર્ગની ધરપકડ થઈ તે જ મહિને નેશનલ ક્રાઈમ એજન્સીએ 34 વર્ષીય મેથ્યૂ સ્મિતની પણ ધરપકડ કરી હતી. મેથ્યૂ ઈસ્ટ ડલવીચમાં આવેલી સ્કૂલનો બ્રિટિશ ડેપ્યૂટી હેડ ટીચર હતો. સાઉથવૉક ક્રાઉન કોર્ટે 20 જૂને મેથ્યૂને દોષિત જાહેર કર્યો અને 4 ઓગસ્ટના રોજ તેને સજા સંભળાવવામાં આવશે. લૂઈશમમાં રહેતો કબીર ગર્ગ ધ એનેક્સ નામની સાઈટના મોડરેટરો પૈકીનો એક હતો. આ સાઈટ પરનો દુનિયાભરમાંથી 90 હજાર જેટલો સભ્યો છે અને અહીં બાળકોની સતામણીને લગતું સાહિત્ય રોજેરોજ શેર કરવામાં આવે છે. સાઈટના 30 જેટલા એડમિનિસ્ટ્રેટર પૈકીનો કબીર એક હતો.
મોડરેટર તરીકે કબીર સાઈટના નિયમોનું પાલન થાય તેનું ધ્યાન રાખતો અને બાળકોની જાતીય સતામણીની તસવીરો કઈ રીતે શેર કરવી તેના સલાહ-સૂચનો આપતો હતો. ગત નવેમ્બરમાં જ્યારે પોલીસે તેને એક બેડના ફ્લેટમાંથી પકડ્યો ત્યારે કથિત રીતે તેના મોડરેટર અકાઉન્ટમાં લોગ-ઈન કરેલું હતું. નેશનલ ક્રાઈમ એજન્સીને 7 હજાર કરતાં વધારે અયોગ્ય તસવીરો અને વિડીયો તેમજ અસંખ્ય મેડિકલ જર્નલના આર્ટિકલ્સ મળી આવ્યા હતા, જે મનોચિકિત્સક તરીકે તેને પ્રાપ્ત થયા હતા. જેમાંથી એકનું ટાઈટલ હતું, “અ સ્ટડી ઓન ચાઈલ્ડ અબ્યૂઝ ઈન્ડિયા”. સ્પેશિયાલિસ્ટ પ્રોસિક્યૂટર બેથની રેને કહ્યું, “બાળકોના માનસપટ પર જાતીય સતમાણીની કેવી અસર પડે તેની કબીર ગર્ગને યોગ્ય સમજણ છે તેમ છતાં તેણે આવા ગુના આચાર્ય તે આઘાતજનક છે.”
મેથ્યૂ સ્મિતની પણ જ્યારે ધરપકડ કરવામાં આવી ત્યારે તે ભારતમાં એક કિશોર વયના બાળક સાથે વાત કરી રહ્યો હતો અને રૂપિયાના બદલે તેની પાસેથી બાળકની સેક્સ્યુઅલ તસવીરોની માગ કરી હતી. તેના કમ્પ્યૂટરમાં બાળકોની જાતીય સતામણીની વેબસાઈટ ખુલ્લી હતી. તેના ડિવાઈસમાંથી 1.2 લાખ જેટલી વાંધાજનક તસવીરો મળી આવી છે.
નેશનલ ક્રાઈમ એજન્સીના અધિકારીઓને તપાસમાં જાણવા મળ્યું કે, તે નેપાળમાં હતો ત્યારે તેણે ભારતમાં બાળકોની પાંચ વર્ષ સુધી સતામણી કરવા માટે બે ભારતીય કિશોરોને 65 હજાર પાઉન્ડ (આશરે 68 લાખ રૂપિયા) આપ્યા હતા. 2007થી 2014ની વચ્ચે મેથ્યૂ સ્મિતે ભારતના વિવિધ અનાથ આશ્રમ અને એનજીઓમાં કામ કર્યું હતું. આ સમયગાળામાં તેણે બાળકો સાથે કરેલા સંભવિત દુર્વ્યવહારના પુરાવા પણ તપાસનીશ અધિકારીઓને મળી આવ્યા છે. સ્પેશિયાલિસ્ટ પ્રોસિક્યુટર ક્લેર બ્રિન્ટને કહ્યું, “મેથ્યૂ સ્મિતે બાળકોની અણછાજતી તસવીરો માટે રૂપિયા ચૂકવ્યા હતા પરિણામે ભારતમાં બાળકો સાથે ભયાવહ દુર્વ્યવહાર થયો હતો.”