ફ્રેનાઝ ચિપીયા, ક્રિત્વિકા અને ઓઇશિકીએ ઓડિશાની ટીમને 3-0થી હરાવી
સુરત
યુટીટી 86મી સિનિયર નેશનલ ઇન્ટર સ્ટેટ ટેબલ ટેનિસ ચેમ્પિયનશિપ 2024માં સોમવારે અહીંના પંડિત દીનદયાલ ઉપાધ્યાય ઇનડોર સ્ટેડિયમ ખાતે સ્થાનિક ખેલાડી ફ્રેનાઝ ચિપીયાએ ધીમા પ્રારંભ બાદ શાનદાર પ્રદર્શન કરીને નેહા કુમારીને 3-2થી હરાવવાની સાથે ગુજરાત વિમેન્સ ટીમે ઓડિશાનો 3-0થી ક્લીન સ્વિપ કર્યો અને ક્વાર્ટર ફાઇનલમાં પ્રવેશ કરી લીધો હતો.
20 લાખ રૂપિયાની ઇનામી રકમ ધરાવતી ચેમ્પિનશિપ ગુજરાત સ્ટેટ ટેબલ ટેનિસ એસોસિયેશન (જીએસટીટીએ) અને ટેબલ ટેનિસ એસોસિયેશન ઓફ સુરત (ટીટીએએસડી)ના સંયુક્ત ઉપક્રમે તથા ટેબલ ટેનિસ ફેડરેશન ઓફ ઇન્ડિયા (ટીટીએફઆઈ)ના નેજા હેઠળ થઈ રહ્યું છે. જેને સ્પોર્ટ્સ ઓથોરિટી ઓફ ઇન્ડિયા (એસએઆઈ) અને સ્પોર્ટ્સ ઓથોરિટી ઓફ ગુજરાત (એસએજી) તથા સુરત મ્યુનિસિપલ કોર્પોરેશન (એસએમસી)નો સહકાર સાંપડેલો છે.
આ ઇવેન્ટના ટાઇટલ સ્પોન્સર અલ્ટિમેટ ટેબલ ટેનિસ (યુટીટી) છે અને હીરો તેના સ્પોન્સર છે અને કો-સ્પોન્સર એનજે ગ્રૂપ છે તો એસોસિયેટ્સ સ્પોન્સરમાં ગુજરાત ટુરિઝમ, ઓએનજીસી, પ્રતિભા ગ્રૂપ અને એરપર્ટ ઓથોરિટી ઓફ ઇન્ડિયા સામેલ છે, સ્ટિગા ઇક્વિપમેન્ટ સ્પોન્સર રહેશે જ્યારે SIDS હોસ્પિટલ મેડીકલ પાર્ટનર રહેશે.
પ્રારંભિક મેચમાં ફ્રેનાઝના ભવ્ય વિજય બાદ અનુભવી ખેલાડી ક્રિત્વિકા સિંહા રોયે ગુજરાતની બીજી મેચમાં તેનો જાદૂ દાખવ્યો હતો અને ટીમને 2-0ની સરસાઈ અપાવી હતી.
ઉભરતી અને પ્રતિભાશાળી ખેલાડી ઓઇશિકી જોઆરદારે ઓડિશાની મયૂરી ચેટરજીને 3*0થી હરાવી હતી.
ગુજરાતની ટીમ હવે સેમિફાઇનલમાં પ્રવેશ માટે તામિલનાડુની મજબૂત ટીમ સામે ટકરાશે જેણએ સોમવારની અન્ય એક મેચમાં ચંદીગઢ સામે 3-0થી વિજય હાંસલ કર્યો હતો.
સુરતની 28 વર્ષીય ખેલાડીએ જણાવ્યું હતું કે “બીજી ગેમ દરમિયાન હરીફની રમત પારખવામાં મને થોડો સમય લાગ્યો હતો પરંતુ મેં તેનો ઉપાય સોધી લીધો હતો અને ધીમે ધીમે આત્મવિશ્વાસ કેળવી લીધો હતો અને રમત રોમાંચક બનાવી હતી.”
દરમિયાન ગુજરાતની મેન્સ ટીમે ચિત્રાક્ષ ભટ્ટની આગેવાનીમાં ગ્રૂપ-સીમાં બીજો ક્રમ મેળવ્યો હતો. પ્રિ ક્વાર્ટર ફાઇનલમાં પ્રવેશવાની સાથે તે હાલમાં દિલ્હી કરતાં બીજા ક્રમે છે. પ્રિ ક્વાર્ટર ફાઇનલમાં ગુજરાતનો મુકાબલો ટીટીએફઆઈ-1 ટીમ સામે થશે.
પરિણામોઃ
ગુજરાત વિમેન્સ જીત્યા વિરુદ્ધ ઓડિશા 3-0
ફ્રેનાઝ ચિપીયા જીત્યા વિરુદ્ધ નેહા કુમારી 3-2 (7-11, 9-11, 11-2, 11-4, 11-6)
ક્રિત્વિકા સિંહા રોય જીત્યા વિરુદ્ધ શ્વેતપદ્મા દલાઈ 3-0 (11-4, 11-3, 11-5)
ઓઇશિકી જોઆરદાર જીત્યા વિરુદ્ધ મયૂરી ચેટરજી 3-0 (11-7, 11-1, 11-5).
